أعمال الرُّسُل 7 - كِتاب العَهد الجَّديد مِن الكِتاب المُقَدَّس

اسْتِفَانُوس قِدّام المَجلِس

¹ و رَئيس القُسُس قال: ”كَلام المُشتَكين هو الحَق؟“

² و قال: ”يا أخوان و أبَهات، أسمَعو! إلَه المَجد ظَهَر لِأبونا إِبْرَاهِيم، و هو في عِراق قُبّال ما سَكَن في حاران.

³ و قال ليهو: أمرُق مِن بَلَدَك و مِن أهلَك، و أمشي لِلبَلَد الأنا بَوَرّيك.

⁴ و كِدا، مَرَق مِن بَلَد الكَلدانيين و سَكَن في حاران. و مِن هِناك بَعَد موت أبوهو، الله رَسَّلو لِلبَلَد دي الإنتو هَسَّع ساكنين فيها.

⁵ و ما أدّاهو فيها ميراث ولّا حِتَّت أرض عَشان يَخُت رِجلو فوقا. لَكِن الله قال بِالحَق هو يَدّيهو مُلك ليهو و لِأولادو بَعدو. و في الوَكِت داك إِبْرَاهِيم ما كان عِندو وَلَد.

⁶ و الله إتكَلَّم كِدا و قال: أولادَك بِكونو زي ناس مِن بَلَد تانيَه في بَلَد غَريبَه، و هِناك بِكونو عَبيد و بِظلِموهُم أُربُعمِيَّة سَنَه.

⁷ و أنا بَحكُم عَلى الأُمَّه البِتَعمِلُم عَبيد، يَقول الرَّب. و بَعَد دا، بِيَمرُقو و بيَعبُدوني في المَحَل دا.

⁸ و هو أدّا إِبْرَاهِيم إتِّفاق الطَّهور. و كِدا إِبْرَاهِيم وِلِد إِسْحَاق، و طَهَّرو اليوم التّامِن. و إِسْحَاق وِلِد يَعْقُوب و يَعْقُوب وِلِد رؤساء الأبَهات الإتناشَر.

⁹ و رؤساء الأبَهات حَسَدو يُوسِف و باعوهو لِمَصِر. و لَكِن الله كان مَعاهو،

¹⁰ و خَلَّصو مِن كُلّو أتعابو، و أدّاهو نِعمَه و حِكمَه قِدّام فِرعون مَلِك مَصِر. و فِرعون عَمَلو رَئيس عَلى مَصِر و عَلى كُلّو أهل بيتو.

¹¹ بَعدين جا جوع في كُلّو مَصِر و كَنعان، و تَعب شَديد. و أبَهاتنا ما قِدرو يَلقو أكِل.

¹² و لَمّا يَعْقُوب سِمِع في دُرَه في مَصِر، هو رَسَّل أبَهاتنا أوَّل مَرَّه.

¹³ و في المَرَّه التّانيَه، يُوسِف كَلَّم أخوانو عَن نَفسو هو مِنو. و يُوسِف وَرّا أهلو لِفِرعون.

¹⁴ و بَعَد دا يُوسِف رَسَّل و نادى يَعْقُوب أبوهو و كُلّو أهلو، خَمسَه و سَبعين زول عَشان يَجو ليهو.

¹⁵ و يَعْقُوب نَزَل لِمَصِر و مات هِناك، هو و أبَهاتنا.

¹⁶ و شالوهو لِشَكيم، و دَفَنوهُم في القَبُر الإِبْرَاهِيم إشتَراهو بِتَمَن فِضَّه مِن أولاد حَمور في بَلَد شَكيم.

¹⁷ و لَمّا الوَكِت قَرَّب عَشان الله يَتِم كَلامو لِإِبْرَاهِيم، عَدَد النّاس كان بِزيد، و هُم بِقو كَتيرين جِدّاً في مَصِر،

¹⁸ لِغايَة ما قام مَلِك تاني الما عِرِف يُوسِف.

¹⁹ المَلِك دا غَشّا جِنسَنا، و ظَلَم أبَهاتنا، حَتّى رَمو أطفالُم بَرَّه عَلَشان يَموتو.

²⁰ و في الوَكِت داك، مُوسَى إتوَلَد، و كان جَميل جِدّاً، و حَفَظوهو تلاتَه شُهور في بيت أبوهو.

²¹ و لَمّا خَلّوهو، بِت فِرعون مَلِك مَصِر أخَدَتو، و رَبَّتو لِنَفسا زي وَلَدا.

²² و مُوسَى إتعَلَّم كُلّو حِكمَة المَصريين، و كان عِندو قُدرَه في كَلامو و أعمالو.

²³ و وَكِت عُمر مُوسَى بِقى أربَعين سَنَه، دَخَل في قَلبو يَزور أخوانو بَني إِسْرَائِيل.

²⁴ و شاف واحِد مِنَّهُم كان مَظلوم، و قام ساعَدو و إنتَقَم لِلمَظلوم، و ضَرَب المَصري.

²⁵ و مُوسَى إفتَكَر أخوانو بِيَفهَمو أن الله بِدّيهُم الخَلاص بِإيدو. لَكِن هُم ما فِهمو.

²⁶ و في اليوم التّاني جا ليهُم، و هُم يَشاكلو بَعضَهُم مَعَ بَعض. و جَرَّب يَوَرّيهُم طَريق السَّلام و قال: يا رُجال، إنتو أخوان، لِشِنو تَشاكلو بَعضَكُم مَعَ بَعض؟

²⁷ لَكِن الكان بِشاكِل جارو لَزَّ مُوسَى و قال: مِنو سَوّاك رَئيس و قاضي عَلينا؟

²⁸ إنتَ عاوِز تَكتُلني مِثِل ما كَتَلتَ المَصري أُمبارِح؟

²⁹ و مُوسَى هَرَب بِسَبَب الكَلام دا، و بِقى زول غَريب في بَلَد مَديان. و هِناك وِلِد وَلَدين.

³⁰ و لَمّا تَمَّت ليهو أربَعين سَنَه، مَلاك الرَّب ظَهَر لِمُوسَى في خَلا جَبَل سينا في نار في شَجَرَه.

³¹ و لَمّا مُوسَى شاف دا، إتعَجَّب مِن المَنظَر. و وَكِت ما هو قَرَّب عَشان يَعايِن فيها، جا ليهو صوت الرَّب:

³² أنا إلَه أبَهاتَك، إلَه إِبْرَاهِيم و إِسْحَاق و يَعْقُوب. و مُوسَى رَجَف و خاف يَعايِن.

³³ و الرَّب قال ليهو: أقلَع جِزَمَك مِن رِجلينَك، عَشان المَحَل الأنتَ واقِف فوقو، دي أرض مُقَدَّسَه.

³⁴ أنا بِالحَق شُفتَ ظُلم النّاس بِتاعي في مَصِر، و سِمِعتَ صوت الشَّكوى، و نَزَلتا عَشان أخَلِّصُم. تَعال هَسَّع. أنا بَرَسِّلَك لِمَصِر.

³⁵ دا مُوسَى الهُم كانو نَكَروهو لَمّا قالو: مِنو عَمَلَك رَئيس و قاضي لينا؟ هو الإنسان الرَّسَّلو الله عَشان يَكون رَئيس و مُخَلِّص بِمُساعدَة المَلاك الظَّهَر ليهو في الشَّجَرَه.

³⁶ هو طَلَّعُم مِن مَصِر، و عَمَل عَجايِب و عَلامات في بَلَد مَصِر، و في البَحَر الأحمَر، و في الخَلا مُدَّة أربَعين سَنَه.

³⁷ دا مُوسَى القال لِبَني إِسْرَائِيل: الله بِقَوِّم ليكُم نَبي زَيي مِن أخوانكُم.

³⁸ و دا هو الكان مَعَ الكَنيسَه في الخَلا، و مَعَ المَلاك الكَلَّمو في جَبَل سينا، و مَعَ أبَهاتنا. و أخَد كِلمات حَيَّه عَشان يَدّيها لينا.

³⁹ لَكِن أبَهاتنا أبو يَسمَعوهو و رَفَضوهو نَفسو، و إبتَدو يَفَكِّرو في الحاجات الفي مَصِر.

⁴⁰ و قالو لِهَارُون: أعمِل لينا أصنام البِمشو قِدّامنا. و مُوسَى دا الطَّلَّعنا مِن بَلَد مَصِر، ما بِنَعرِف حَصَل ليهو شِنو!

⁴¹ و هُم عَمَلو عِجِل في الأيام ديلاك، و قَدَّمو ضَبيحَه لِلصَّنَم، و كانو مَبسوطين بِأعمال إيدينُم.

⁴² لَكِن الله دَوَّر مِنَّهُم و خَلّاهُم يَعبُدو نُجوم السَّما، زي ما هو مَكتوب في كِتاب الأنبياء: إنتو قَدَّمتو لَي ضَبايح و تَقدِمات أربَعين سَنَه في الخَلا، يا بيت إِسْرَائِيل؟

⁴³ لا، لَكِن شِلتو خيمَة مُولُوك، و نَجمَة الصَّنَم بِتاعكُم رَمفان، الأصنام السَّوّيتوها عَشان تَعبُدوها. عَلَشان كِدا، بَرَسِّلكُم بَعيد لِغادي بَلَد بابِل.

⁴⁴ و أبَهاتنا كانو عِندَهُم خيمَة الشَّهادَه في الخَلا. و زي ما الله أدّا أمر لِمُوسَى، هو عَمَلو زي الوَرّاهو الله.

⁴⁵ و بَعدين أبَهاتنا لَمّا اَخَدو الخيمَه، جابوها مَعاهُم لَمّا دَخَلو الأرض مَعَ يَشُوع. و اَخَدو الأرض مِن الأُمَم، و الله طَرَدُم قِدّامُم. و الخيمَه إستَنَّت هِناك لِغايَة أيام دَاوُد،

⁴⁶ اللِقى نِعمَه قِدّام الله، و طَلَب إذِن عَشان يَلقا بيت لِإلَه يَعْقُوب.

⁴⁷ لَكِن سُلَيْمَان بَنى ليهو بيت.

⁴⁸ لَكِن الله العالي ما بِسكُن في هياكِل السَّوَّتا الإيدين. زي ما يَقول النَّبي:

⁴⁹ السَّما كُرسي لَي، و الأرض بَمبَر لِرِجليني. نوع البيت البِتَبنو لَي بِكون شِنو؟ يَقول الرَّب، و مَحَل راحَتي بِكون وين؟

⁵⁰ إيدي ما عَمَلَت الحاجات دي كُلّو؟

⁵¹ يا ناس رؤسكُم قَوّيين و قُلوبكُم بَطّالين و إضنينكُم ما بِسمَعو كَلام الحَق! إنتو بِتقاوِمو الرّوح القُدُس دايماً. زي ما أبَهاتكُم كانو بيَعمِلو، إنتو كَمان بِتَعمِلو.

⁵² ياتو نَبي مِن الأنبياء، أبَهاتكُم ما طَرَدوهو؟ و هُم كَتَلو النّاس الإتنَبّو مِن قُبّال بِالبار الجّاي. و هَسَّع إنتو نَكَرتوهو و كَتَلتوهو.

⁵³ إنتو الأخَدتو القانون بِإيد المَلائكَه و ما حَفَظتوهو.“

موت اسْتِفَانُوس

⁵⁴ و لَمّا سِمِعو دا، كانو زَعلانين كَتير خَلاص، و عَضو بِسِنونُم عَليهو.

⁵⁵ لَكِن اسْتِفَانُوس كان مَليان بِالرّوح القُدُس، و عايَن لِلسَّما، و شاف مَجد الله و يَسُوع واقِف عَن يَمين الله.

⁵⁶ و قال: ”شوفو، أنا بَشوف السَّما مَفتوحَه، و إبن الإنسان واقِف عَن يَمين الله.“

⁵⁷ و هُم كورَكو بِصوت عالي، و قَفَلو إضنينُم، و هَجَمو عَليهو بِفِكر واحِد.

⁵⁸ و رَموهو بَرَّه مِن المَدينَه و إبتَدو يَرموهو بِحُجار. و الشّاهِدين خَتّو هِدُومُم في رِجلين شاب إسمو شَاوُل.

⁵⁹ و وَكِت ما كانو بِرمو اسْتِفَانُوس بِحُجار، هو كان بِصَلّي و يَقول: ”يا رَب يَسُوع، أقبَل روحي.“

⁶⁰ و بَعَد دا، وَقَع عَلى رُكبَتيهو و كورَك بِصوت عالي: ”يا رَب، ما تَخُت الخَطيَّه دي لِحِسابُم.“ و لَمّا قال كِدا، هو نام.