أعمال الرُّسُل 6 - كِتاب العَهد الجَّديد مِن الكِتاب المُقَدَّس

إختِيار السَّبعَه

¹ و في الأيام ديلاك لَمَّن التَّلاميذ زادو، اليَهود البِتكَلَّمو اللُغَه الأغريقيَّه إشتَكو عَلى اليَهود الوَطَنيين عَلَشان ما كانو يِتذَكَّرو أرَامِلُم في التَّعيين كُلّو يوم.

² عَلَشان كِدا، الإتناشَر رُسُل نادو كُل التَّلاميذ و قالو: ”ما مُناسِب لينا نَخَلّي كِلمَة الله و نَخدِم في الطَّرَبيزات.

³ كِدا، يا أخوان، إختارو سَبعَه رُجال مِنَّكُم المَعروفين، مَليانين بِالرّوح و الحِكمَه، و بِنَدّيهُم السُّلطَه عَلى الحاجات دي.

⁴ و لَكِن نِحنا نِستَمِر في الصَّلاه و خِدمَة الكِلمَه.“

⁵ و كُل التَّلاميذ كانو مَبسوطين مِن الكَلام دا. و إختارو اسْتِفَانُوس، راجِل مَليان بِالإيمان و الرّوح القُدُس، و فِيلُبُّس و بُرُوخُورُس و نِيكَانُور و تِيمُون و بَرْمِينَاس و نِيقُولاوُس الصَّدَّق بِالدّين اليَهودي مِن أنطاكيّا.

⁶ و قَدَّموهُم لِلرُّسُل، و صَلّو و خَتّو عَليهُم الإيدين.

⁷ و كِلمَة الله كانَت تَكبَر، و نِمرَت التَّلاميذ بِقَت كَتيرَه جِدّاً في أُورُشَلِيم. و نِمرَه كَتيرَه مِن القُسُس كانو بِطيعُو الإيمان.

قَبض اسْتِفَانُوس

⁸ و اسْتِفَانُوس كان مَليان نِعمَه و قُوَّه، و كان بِسَوّي عَجايِب و عَلامات كَبيرَه بين النّاس.

⁹ و قامو جُزو مِن النّاس الكانو في نوع الدّين اليَهودي البِسَمّوهو بيت الرَّب بِتاع الحُرّين، و القَيْرَوَانِيِّين و الإسكَندَريين و المِن كِيلِيكِيَّا و آسيا، و هُم كانو يَقاوِمو اسْتِفَانُوس.

¹⁰ و ما قِدرو يَقولو أي شي ضِد حِكمَة اسْتِفَانُوس ولّا الرّوح الكان بِتكَلَّم بيهو.

¹¹ و هُم أدّو هَدِيَّه بِالسِّر لِرُجال عَشان يَقولو: ”نِحنا سِمِعناهو يتكَلَّم بِكَلام بَطّال ضِد مُوسَى و ضِد الله.“

¹² و حَرَّكو النّاس و الشُّيوخ و مُعَلِّمين القانون. و قامو و قَبَضو عَليهو، و جابوهو لِلمَجِلس.

¹³ و جابو شاهِدين كِضِب البِقولو: ”الرّاجِل دا ما بِوَقِّف أبَداً يتكَلَّم كِلمات بَطّالَه ضِد المَحَل المُقَدَّس دا و ضِد القانون.

¹⁴ عَشان سِمِعناهو يَقول يَسُوع النّاصِري دا بِخَرِّب المَحَل دا و بِغَيِّر العادات السَّلَّما لينا مُوسَى.“

¹⁵ و كُل القَاعِدين في المَجِلس عايَنو ليهو، و شافو وَشّو كان زي وَش مَلاك.