أعمال الرُّسُل 5 - كِتاب العَهد الجَّديد مِن الكِتاب المُقَدَّس

حَنانيّا و سَفّيرَه

¹ و راجِل إسمو حَنانيّا و مَرَتو سَفّيرَه باعو جُزو مِن أموالُم.

² و هو أخَد جُزو مِن التَّمَن لِنَفسو، و مَرَتو عِرفَت داك. لَكِن هو جاب الباقي، و خَتّاهو في رِجلين الرُّسُل.

³ و بُطْرُس قال: ”يا حَنانيّا، لِشِنو الشّيطان مَلا قَلبَك حَتّى تَكَضِّب عَلى الرّوح القُدُس، و تاخُد جُزو مِن تَمَن الزِّراعَه لِنَفسَك؟

⁴ قُبّال ما بِعتا، ما كان حَقَّتَك؟ و بَعَد ما بِعتا، القُروش ما كانَت حَقَّتَك؟ مالَك فَكَّرتَ في قَلبَك تَسَوّي حاجَه زي دي؟ إنتَ ما كَضَّبتَ عَلى النّاس لَكِن عَلى الله.“

⁵ و وَكِت حَنانيّا سِمِع الكَلام دا، وَقَع و مات. و خوف عَظيم وَقَع عَلى كُل السِّمِعو بِداك.

⁶ و الشَّباب قامو و لَفّو جِسمو و شالوهو بَرَّه و دَفَنوهو.

⁷ و بَعَد دا بِتلاتَه ساعات تَقريباً، مَرَتو دَخَلَت، و هي ما كانَت بِتَعرِف الحَصَل.

⁸ و بُطْرُس قال ليها: ”قولي لَي، إنتي و راجلِك بِعتو الزِّراعَه بِالتَّمَن دا؟“ هي قالَت: ”أيوَه، بِالتَّمَن دا.“

⁹ و بُطْرُس قال ليها: ”مالكُم؟ كيف إتَّفَقتو عَلى تَجرِبَة روح الرَّب؟ شوفي! الرُّجال الدَّفَنو راجلِك عَلى الباب، و هُم بِشيلوكي بَرَّه.“

¹⁰ و طَوّالي وَقَعَت في رِجلينو و ماتَت. و وَكِت الشَّباب دَخَلو، لِقوها مَيِّتَه، و شالوها بَرَّه و دَفَنوها جَمب راجِلا.

¹¹ و خوف عَظيم وَقَع عَلى كُل الكَنيسَه و عَلى كُل السِّمِعو بِداك.

¹² و الرُّسُل عَمَلو عَلامات و عَجايِب كَتيرَه بين النّاس. و كُلُّهُم كانو بِنَفس واحدَه في بَراندات سُلَيْمَان.

¹³ و ما في واحِد مِن التّانيين عِندو شَجاعَه حَتّى يوصَل بيهُم. لَكِن النّاس كانو بِحتَرِموهُم.

¹⁴ لَكِن المؤمِنين كانو بِتلَمّو لِلرَّب أكتَر و أكتَر، عَدَد كَبير مِن الرُّجال و النِّسوان.

¹⁵ و النّاس كانو بِجيبو العَيّانين لِلسِّكَك، و بِخُتّوهُم عَلى عَناقريب و بُروش، عَلَشان إذا مُمكِن ضُل بُطْرُس يَقَع عَلى بَعض مِنَّهُم.

¹⁶ و عَدَد كَبير مِن النّاس أجتَمَعو في أُورُشَلِيم مِن كُل البِلاد الجَّمبو، و هُم يَشيلو العَيّانين و النّاس التَّعبانين عَشان فيهُم الشّياطين. و كُلُّهُم كانو بِلقو العافيَه.

طَرَد و قَضيَّة الرُّسُل

¹⁷ و قامو رَئيس القُسُس و كُل المَعاهو، و هُم حِزب الصَدّوقيين، و إتمَلو مِن الحَسَد.

¹⁸ و قَبَضو عَلى الرُّسُل، و خَتّوهُم في السِّجِن البِكون لِكُل النّاس.

¹⁹ لَكِن مَلاك الرَّب فَتَح أبواب السِّجِن في اللّيل، و مَرَّقُم، و قال ليهُم،

²⁰ ”أمشو، و أقيفو في الهيكَل، و كَلِّمو النّاس بِكُلّو كِلمات الحَياة دي.“

²¹ و لَمّا سِمِعو دا، دَخَلو الهيكَل في الصَّباح بَدري و إبتَدو يَعَلِّمو. و لَمّا رَئيس القُسُس و المَعاهو جو، جَمَعو المَجِلس و كُلّو شُيوخ إِسْرَائِيل. و رَسَّلو لِلسِّجِن عَشان يَجيبو الرُّسُل.

²² و لَكِن لَمّا الضُّبّاط جو، ما لِقوهُم في السِّجِن. و عَلَشان كِدا، رَجَعو و خَبَّرو.

²³ و قالو: ”لِقينا السِّجِن مَقفول شَديد و الحارِسين واقفين قِدّام الأبواب، و لَكِن لَمّا فَتَحناها، ما لِقينا واحِد جُوَّه.“

²⁴ و وَكِت رَئيس الهيكَل و القُسُس الكُبار سِمِعو الكَلام دا، كانو بِتحَيَّرو عَن البِيَحصَل بَعَد دا.

²⁵ في الوَكِت داك، واحِد جا و خَبَّرُم و قال: ”شوفو! الرُّجال الإنتو خَتّيتوهُم في السِّجِن، هُم واقفين في الهيكَل يَعَلِّمو النّاس.“

²⁶ عَلَشان كِدا، الرَئيس مَرَق مَعَ الضُّبّاط و جاب الرُّسُل بِدون شِدَّه، عَشان كانو بِخافو مِن النّاس يِمكِن يَضرُبوهُم بِحُجار.

²⁷ و لَمّا جابوهُم، وَقَّفوهُم قِدّام المَجلِس و رَئيس القُسُس سألُم.

²⁸ و قال: ”أدّيناكُم أمر ما تَعَلِّمو بِالإسم دا. لَكِن شوفو، إنتو مَليتو أُورُشَلِيم بِتَعليمكُم، و عاوزين تَخُتّو عَلينا دَم الإنسان دا.“

²⁹ و بُطْرُس و الرُّسُل التّانيين رَدّو و قالو ليهُم: ”نِحنا لازِم نَسمَع الله أكتَر مِن النّاس.

³⁰ إله أبَهاتنا قَوَّم يَسُوع مِن بين المَيِّتين، الإنتو كَتَلتوهو لَمّا عَلَّقتوهو عَلى الخَشَب.

³¹ و الله رَفَعو بِيَمينو يَكون رَئيس و مُخَلِّص، عَشان يَدّي لِإِسْرَائِيل التّوبَه و غُفران الخَطايا.

³² و نِحنا شاهِدين ليهو بِالحاجات دي، و نِحنا و الرّوح القُدُس الأدّاهو الله لِلبِطيعوهو.“

³³ و لَمّا سِمِعو دا، زِعِلو شَديد، و دارو يَكتُلوهُم.

³⁴ لَكِن كان في راجِل فرِّيسي، إسمو غَمَالَائِيل. و هو مُعَلِّم لِلقانون، و مُحتِرَم قِدّام كُل النّاس. و قام و أمَرُم ياخدو الرُّجال بَرَّه لِوَكِت قَليل.

³⁵ في الوَكِت دا قال ليهُم: ”يا رُجال إِسْرَائِيل، خَلّو بالكُم بِالإنتو دايرين تَعمِلو بِالرُّجال ديل.

³⁶ عَشان قُبّال الأيام دي، قام توداس، القال عَن نَفسو، هو كَبير. و بَعض مِن الرُّجال إتلَمّو ليهو أُربُعمِيَّه تَقريباً. لَكِن هو كان مَكتول، و كُل المَشو وَراهو أتفَرتَقو، و كُلّو بِقو كَلام فاضي.

³⁷ و بَعَد دا قام يَهُوذَا، الجَّليلي، في أيام كِتابَة الأسامي، و جَرَّ بَعض النّاس وَراهو. هو كَمان كان مَكتول و كُل المَشو وَراهو إتشَتَّتو.

³⁸ و هَسَّع، بَقول ليكُم: كونو بَعيد مِن الرُّجال ديل و خَلّوهُم! عَشان إذا كان الفِكر دا ولّا العَمَل دا مِن النّاس، هو بِبقى و لا حاجَه.

³⁹ و إذا هو مِن الله، ما بِتَقدَرو تَوَقِّفو الرُّجال ديل، لَكِن بِتحارِبو الله كَمان!“

⁴⁰ و هُم إتَّفَقو مَعاهو و نادو الرُّسُل و جَلَدوهُم. و أمَرُم ما يِتكَلَّمو بِإسم يَسُوع. و بَعَد دا خَلّوهُم يَمشو.

⁴¹ و عَلَشان كِدا، هُم مَشو مِن المَجلِس مَبسوطين عَلَشان حَسَبوهُم مُستَحِقّين أن يَكونو ما مُحتَرمين عَشان إسمو.

⁴² و كانو كُلّو يوم في الهيكَل و في البُيوت، و ما بَطَّلو أبَداً بِعَلِّمو و بِبَشِّرو بِيَسُوع المَسيح.