أعمال الرُّسُل 4 - كِتاب العَهد الجَّديد مِن الكِتاب المُقَدَّس

بُطْرُس و يُوحَنَّا قِدّام المَجلِس

¹ و وَكِت ما بُطْرُس و يُوحَنَّا كانو بِتكَلَّمو مَعَ النّاس، قَرَّبو ليهُم القُسُس و رَئيس الهيكَل و الصَّدّوقيين.

² هُم كانو زَعلانين مِن الرُّسُل، عَلَشان كانو بِعَلِّمو النّاس و بِنادوهُم في يَسُوع بِالقيامَه مِن بين المَيِّتين.

³ و قَبَضوهُم و خَتّوهُم في السِّجِن لِليوم التّاني، عَلَشان بِقى المِسا.

⁴ و كَتيرين مِن النّاس السِّمِعو الكِلمَه، آمَنو، و عَدَد الرُّجال بِقى خَمسَة آلاف تَقريباً.

⁵ و في اليوم التّاني، رؤساهُم و شُيوخُم و مُعَلِّمين القانون إتلَمّو في أُورُشَلِيم،

⁶ مَعَ حَنَّان، رَئيس القُسُس، و قَيَافا و يُوحَنَّا و الإِسْكَنْدَر و كُل الكانو مِن أهل بيت رَئيس القُسُس.

⁷ و لَمّا جابوهُم و خَتّوهُم في الوَسِط، سألوهُم: ”بِأي قُوَّه و بِأي إسم عَمَلتو دا؟“

⁸ في الوَكِت دا، بُطْرُس و هو كان مَليان مِن الرّوح القُدُس، قال ليهُم: ”يا رؤساء النّاس و شُيوخ إِسْرَائِيل،

⁹ إن كان في سؤَال اللّيلَه بِسَبَب العَمَل الكَويس العَمَلنا لِلرّاجِل الأعرَج دا بِشِنو هو بِقى كوَيس،

¹⁰ خَلّي دا يَكون مَعروف لِكُلُّكُم و كُلّو ناس إِسْرَائِيل. بِإسم يَسُوع المَسيح النّاصِري، الإنتو صَلَبتوهو، لَكِن الله قَوَّمو مِن بين المَيِّتين، بيهو الرّاجِل دا واقِف قِدّامكُم بِعافيَه تَمام.

¹¹ دا هو الحَجَر الإنتو أبيتوهو، يا بَنّاين، البِقي راس الرُّكن.

¹² و ما في خَلاص بِأي واحِد تاني. عَشان في كُل الدُّنيا الله ما أدّا لِلنّاس إسِم تاني البيهو لازِم نَلقى الخَلاص.“

¹³ و لَمّا شافو شُجاعَة بُطْرُس و يُوحَنَّا، و لِقوهُم رُجال ما مِتعَلِّمين و زي أي زول تاني، هُم إتعَجَّبو. و عِرفوهُم كانو مَعَ يَسُوع.

¹⁴ لَكِن ما دام شافو الزّول البِقي كوَيس واقِف مَعاهُم، ما قِدرو يَقولو أي شي.

¹⁵ عَلَشان كِدا أمَروهُم يَمرُقو مِن المَجلِس، و إتكَلَّمو بِسِر مَعَ بَعض.

¹⁶ و قالو: ”بِنَعمِل شِنو بِالراجلين ديل؟ كُل القَاعِدين في أُورُشَلِيم بِيَعرِفو هُم عَمَلو عَلامَه مَعروفَه، و ما بِنَقدَر نَنكِرا.

¹⁷ و لَكِن عَشان ما يِتفَرتَك زِيادَه بين النّاس، خَلّونا نَهَدِّدهُم ما يِتكَلَّمو مَعَ أي واحِد مِن النّاس بَعَد دا، بِالإسِم دا.“

¹⁸ بَعدين نادوهُم و أمَروهُم ما يِتكَلَّمو أبَداً بِإسم يَسُوع ولّا يَعَلِّمو بيهو.

¹⁹ و بُطْرُس و يُوحَنَّا رَدّو و قالو ليهُم: ”أحكُمو إنتو، دا هو الحَق قِدّام الله أن نَسمَع ليكُم أكتَر مِن الله؟

²⁰ عَشان ما نَقدَر نَبَطِّل كَلامنا عَن الشّوفناهو و سِمِعناهو.“

²¹ و بَعَد ما هَدَّدوهُم زِيادَه، فَكّوهُم. و هُم ما قِدرو يَلقو كيف يَعمِلو ليهُم حاجَه بَطّالَه بِسَبَب النّاس. عَلَشان كُل النّاس كانو بِمَجِّدو الله عَلى الحَصَل.

²² عَشان الرّاجِل البِقي كوَيس بِسَبَب العَلامَه دي، كان عُمرو أكتَر مِن أربَعين سَنَه.

صَلاة المؤمِنين

²³ و لَمّا فَكّوهُم، بُطْرُس و يُوحَنَّا مَشو لِلنّاس بِتوعُم و خَبَّروهُم بِكُل القالو ليهُم القُسُس الكُبار و الشُّيوخ.

²⁴ و لَمّا سِمِعو دا، رَفَعو أصواتُم لِلَّه بِصوت واحِد و قالو: ”يا سَيِّد، إنتَ العَمَلتَ السَّما و الأرض و البَحَر و كُل الفيها.

²⁵ و إنتَ القُلتَ بِالرّوح القُدُس بِخَشم أبونا دَاوُد وَلَدَك: لِشِنو الأُمَم زِعِلو، و النّاس فَكَّرو بِالما ليهو فايدَه؟

²⁶ مُلوك الأرض قامو، و الرّؤساء إتلَمّو سَوا ضِد الرَّب و ضِد مَسيحو.

²⁷ بِالحَق هِيرُودُس و بِيلاطُس البُنْطي إتلَمّو مَعَ الأُمَم و ناس إِسْرَائِيل في المَدينَه دي، ضِد خَدّامَك القُدّوس يَسُوع الأنتَ مَسَحتو،

²⁸ عَشان يَعمِلو كُل القُدرَتَك و إرادَتَك جَهَّزو مِن قُبّال عَلَشان يَحصَل.

²⁹ و هَسَّع، يا رَب، شوف تَهديدُم و أَدِّي خَدّامينَك أن يِتكَلَّمو بِكِلمَتَك بِشَجاعَه كَتيرَه.

³⁰ مِد إيدَك عَشان تَسَبِّب الشِّفا و العَلامات و العَجايِب بِإسم إبنَك القُدّوس يَسُوع.“

³¹ و لَمّا صَلّو، المَحَل الهُم كانو بِتلَمّو فيهو إتهَزَّ. و كُلُّهُم إتمَلو مِن الرّوح القُدُس. و كانو بِيِتكَلَّمو بِكَلام الله بِشَجاعَه.

³² و كُل المؤمِنين كانو عِندَهُم قَلب واحِد و فِكر واحِد. و لا واحِد قال حاجَه مِن أموالو كانَت ليهو بَس، لَكِن كانو عِندَهُم كُلّو شي مَعَ بَعض.

³³ و الرُّسُل كانو بِقُوَّه عَظيمَه بِشهَدو بِقيامَة الرَّب يَسُوع، و نِعمَه عَظيمَه كانَت عَلى كُلُّهُم.

³⁴ و واحِد فيهُم ما كان مُحتاج، عَشان كُل الكانو عِندَهُم زِراعَه ولّا بُيوت كانو بِبيعوها و بِجيبو القُروش مِن الحاجات الباعوها،

³⁵ و يَخُتّوها في رِجلين الرُّسُل. و هُم قَسَمو لِكُلّو واحِد زي ما كان مُحتاج.

³⁶ و يُوسِف كان لَاوِي مِن قُبرُص. و الرُّسُل سَمّوهو بَرْنَابَا، يَعني إبن الشَّجاعَه.

³⁷ و كان عِندو زِراعَه. و باعَها و جاب القُروش و خَتّاهو في رِجلين الرُّسُل.