أعمال الرُّسُل 3 - كِتاب العَهد الجَّديد مِن الكِتاب المُقَدَّس

بُطْرُس يَشفي الرّاجِل الأعرَج

¹ و بُطْرُس و يُوحَنَّا كانو يَطلَعو لِلهيكَل لِصَلاه السّاعَه تلاتَه بَعَد الضُّهر.

² و ناس كانو يَشيلو راجِل أعرَج مِن بَطُن أُمّو. و كُلّو يوم كانو بِخُتّوهو عِند باب الهيكَل الإسمو الجَّميل، عَلَشان يَسأل صَدَقَه مِن الداخلين الهيكَل.

³ و لَمّا شاف بُطْرُس و يُوحَنَّا دايرين يدخُلو الهيكَل، هو طَلَب مِنَّهُم صَدَقَه.

⁴ و بُطْرُس و يُوحَنَّا عايَنو ليهو، و بُطْرُس قال ليهو: ”عايِن لينا.“

⁵ و الرّاجِل خَتَّ بالو ليهُم و إفتَكَر بياخُد مِنَّهُم حاجَه.

⁶ و بُطْرُس قال: ”ما عِندي فِضَّه ولّا دَهَب، لَكِن العِندي بَدّيهو ليك. بِإسم يَسُوع النّاصِري، قوم و أمشي.“

⁷ و مَسَكو بِإيدو اليَمين، و رَفَعو. و طَوّالي رِجلينو و كَعبينو إتشَدَّدو.

⁸ و هو نَطَّ و قام و بَدا يَمشي، و دَخَل مَعاهُم لِلهيكَل، و هو يَمشي و يَنوط و يَحمِد الله.

⁹ و كُل النّاس شافوهو و هو ماشي و يَحمِد الله.

¹⁰ و عِرفوهو زات الرّاجِل دا الكان بِقعُد في الباب الجَّميل بِتاعَت الهيكَل، و بِطلُب الصَّدَقَه. و هُم إستَغرَبو و إتعَجَّبو عَلَشان الحاجَه الحَصَلَت ليهو.

¹¹ وَكِت هو كان بِمسِك بُطْرُس و يُوحَنَّا، كُل النّاس جَرو ليهُم لِلبَراندَه الإسِما بَراندات سُلَيْمَان، و هُم مُستَغرِبين.

¹² و لَمّا بُطْرُس شاف دا، قال لِلنّاس: ”يا رُجال إِسْرَائِيل، مالكُم تِستَغرَبو مِن دا؟ و لِشِنو تَعاينو لينا زي نِحنا عَمَلنا الرّاجِل دا يَمشي بِقُوَّتنا ولّا عَشان نِحنا قِدِّيسين؟

¹³ عَشان إله إِبْرَاهِيم و إِسْحَاق و يَعْقُوب، إله أبَهاتنا مَجَّد إبنو يَسُوع. إنتو سَلَّمتوهو و نَكَرتوهو قِدّام بِيلاطُس لَمّا هو كان داير يَفِكّو.

¹⁴ و لَكِن إنتو نَكَرتو القُدّوس البار، و طَلَبتو مِن بِيلاطُس أن يَدّيكُم راجِل كاتِل النّاس.

¹⁵ و كَتَلتو رَئيس الحَياة القَوَّمو الله مِن بين المَيِّتين. و نِحنا شاهِدين لِداك.

¹⁶ و الرّاجِل دا بِقى شَديد بِالإيمان بِإسم يَسُوع. و إنتو بِتشوفو و بِتَعرِفوهو. و الإيمان بِيَسُوع أدّا الرّاجِل دا العافيَه التّامَّه قِدّام كُلُّكُم.

¹⁷ و هَسَّع، يا أخوان، أنا بَعرِف إنتو عَمَلتو دا بِدون فَهم زي رؤساكُم سَوّو كَمان.

¹⁸ و كِدا الله عَمَل الهو كَلَّمنا بيهو مِن قُبّال بِخَشم كُل الأنبياء إنّو مَسيحو لازِم يَتعَب.

¹⁹ عَلَشان كِدا، توبو و أرجَعو لِلَّه، فِشان الله يَشيل خَطاياكُم مِنَّكُم، و عَلَشان وَكِت الرّاحَه بِجي مِن قِدّام الرَّب.

²⁰ و هو يَرَسِّل المَسيح يَسُوع المُعَيَّن ليكُم مِن قُبّال.

²¹ و هو لازِم يِستَنّى في السَّما لِغايَة الوَكِت بِجي، لَمّا الله يَرَجِّع كُلّو شي. و هو إتكَلَّم عَن دا بِخَشم كُلّو أنبياهو مِن زَمان.

²² عَشان مُوسَى قال: الله رَبّكُم بِقَوِّم ليكُم مِن أخوانكُم نَبي مِتلي. لازِم تَسمَعو ليهو في كُل البِكَلِّمكُم بيهو.

²³ و كُلّو واحِد ما يَسمَع لِلنَّبي داك، يَكتُلوهو.

²⁴ و كِدا كُل الأنبياء مِن صَمُوئِيل و النّاس الإتكَلَّمو بَعدو، إتنَبّو بِالأيام دي.

²⁵ و إنتو أولاد الأنبياء و أولاد الإتِّفاق. و الله أدّى أبَهاتنا الإتِّفاق دا. هو قال لِإِبْرَاهِيم: بِأولادَك كُلّو قَبايل الأرض بِكونو مُبارَكين.

²⁶ عَشان الله بَعَد ما قَوَّم خَدّامو، رَسَّلو ليكُم في الأوَّل، فِشان يَبارِكُم و يَرَجِّع كُلّو واحِد مِنَّكُم مِن خَطاياهو.“