أعمال الرُّسُل 28 - كِتاب العَهد الجَّديد مِن الكِتاب المُقَدَّس

الوصول في مَالِطَه

¹ و لَمّا وِصِلنا بِسَلامَه، لِقينا الجَّزيرَه إسِما مَالِطَه.

² و ناس الجَّزيرَه عَمَلو لينا مَعروف فوق العادَه، عَشان هُم وَلَّعو نار و قِبلو كُلُّنا، عَشان الدُّنيا كانَت مَطَرَه و كان في بَرد.

³ و بُولُس جَمَع شوَيَة خَشَب، و خَتّاها عَلى النّار. و دَبيب مَرَق بِسَبَب الحَر، و مَسَكو بِإيدو.

⁴ و لَمّا ناس الجَّزيرَه شافو الدَّبيب مَسَك بِإيدو، قالو بَعضَهُم لِبَعض: ”ما في شَك الزّول دا كاتِل النّاس، و لَو هو مُخَلَّص مِن البَحَر، العَدِل ما خَلّاهو يَعيش.“

⁵ لَكِن بُولُس هَزَّ الدَّبيب لِلنّار و ما كان في عَوَجَه.

⁶ لَكِن النّاس كانو يَنتَظِرو إنّو بِكون عِندو وَرَم، ولّا طَوّالي يَقَع و يَموت. لَكِن بَعَد ما هُم إستَنّو مُدَّه طَويلَه، و شافو ما في عَوَجَه، غَيَّرو فِكرُم و قالو هو إلَه.

⁷ و كانَت في قَريبَه مِن المَحَل داك الأراضي بِتاعَت رَئيس الجَّزيرَه إسمو بُوبْلِيُوس. و هو قِبِلنا و عامَلنا ضيفانو بِلُطف تلاتَه أيام.

⁸ و كان أبو بُوبْلِيُوس راقِد في عَنقَرِيبو، عِندو حُمَّه و عَيّان بِدُسُنتاريَا. و بُولُس دَخَل ليهو، و صَلّى، و خَتَّ إيدينو عَليهو، و شَفاهو.

⁹ و لَمّا دا كان حَصَل، كُل العَيّانين في الجَّزيرَه كانو بِجو و بِقو طَيبين.

¹⁰ و إحتَرمونا بِإحتِرام عَظيم. و لَمّا سافَرنا، قَدَّمو لينا الحاجات المُحتاجين ليها.

الوصول في رُومِيَه

¹¹ و بَعَد تلاتَه شُهور، سافَرنا في مُركَب مِن الإسكَندَريَّه، فوقا عَلامَة التّيمان. و المُركَب دي كانَت في هِناك كُل الشِّتا.

¹² و نَزَلنا في سِرَكوسا و قَعَدنا تَلاتَة أيام.

¹³ و مِن هِناك، دَوَّرنا و سافَرنا في البَحَر لِرِيغِيُون. و بَعَد يوم واحِد، ريح الجَّنوب هَبَّت. و في اليوم التّاني، وِصِلنا لِبُوطِيُولِي.

¹⁴ و هِناك لِقينا أخوان، و هُم إترَجّونا نَقعُد مَعاهُم سَبعَة أيام. و كِدا جينا لِرُومِيَه.

¹⁵ و لَمّا الأخوان هِناك سِمِعو بِخَبَرنا، هُم مَرَقو عَشان يَقابِلونا، و مَشو لِسوق أَبِيُّوس و اللّوكَندات التّلاتَه. و وَكِت بُولُس شافُم، شَكَر الله و شَدّا حيلو.

¹⁶ و لَمّا دَخَلنا رُومِيَه، أدّو إذِن لِبُولُس يَقعُد بَراهو مَعَ العَسكَري الكان بِحرَسو.

بُولُس يَبَشِّر سَنَتين في رُومِيَه

¹⁷ و بَعَد تَلاتَة أيام، بُولُس نادى كُبار اليَهود. و لَمّا إتلَمّو، قال ليهُم: ”يا رُجال و أخوان، أنا ما سَوّيت شي ضِد الشَّعب، و لا ضِد عادات أبَهاتنا. لَكِن خَتّوني في السِّجِن في أُورُشَلِيم، و سَلَّموني لِإيدين ناس رومانيين.

¹⁸ و ديل بَعَد ما إمتَحَنوني، كانو عاوزين يَفِكّوني، عَلَشان ما لِقو فِيني ذَنب واحِد لِلموت.

¹⁹ و لَكِن لَمّا اليَهود قاوَمو دا، أنا عِرِفتَ لازِم أرفَع طَلَبي لِقَيصَر، و لَو ما عِندي شي أشتَكي بيهو أُمَّتي.

²⁰ و بِالسَّبَب دا، ناديتكُم عَشان أشوفكُم و أكَلِّمكُم. عَلَشان خاطِر رَجاء إِسْرَائِيل أنا مَربوط بِالجَّنزير دا.“

²¹ و قالو ليهو: ”ما قِبِلنا مِن اليَهُودِيَّه جَوابات عَنَّك، و ما في واحِد مِن الأخوان جا و خَبَّرنا عَنَّك حاجَه بَطّالَه.

²² لَكِن نِحنا عاوزين نَسمَع فِكرَك، فِشان بِنَعرِف النّاس في كُلّو مَحَل بِقاوِمو الحِزب دا.“

²³ و إختارو ليهو يوم، و كَتيرين جو ليهو لِبيتو. و إبتَدا يَشهَد بِمَلَكوت الله، و يَكَلِّمُم كَتير بِالبِخُص يَسُوع مِن قانون مُوسَى و مِن الأنبياء، مِن الصَّباح لِغايَة المِسا.

²⁴ و بَعض مِنَّهُم قِبلو الكَلام الهو قال ليهُم، و لَكِن بَعض مِنَّهُم ما آمَنو.

²⁵ و ما إتَّفَقو بَعضَهُم مَعَ بَعض، و إبتَدو يَمرُقو، بَعَد ما بُولُس قال كِلمَه واحدَه: ”الرّوح القُدُس كَلَّم أبَهاتكُم كوَيس بِإِشَعْيَاء النَّبي،

²⁶ القال: أمشي لِلشَّعب دا و قول ليهُم: بِتَسمَعو سَمَع لَكِن ما بِتَفهَمو أبَداً، و بِتعاينو بِعُيونكُم لَكِن ما بِتشوفو أبَداً.

²⁷ عَلَشان قَلب الشَّعب دا بِقى قَوّي، و إضنينُم تُقال عَشان يَسمَعو، و قَفَلو عُيونُم عَشان ما يَشوفو بِعُيونُم، و لا يَسمَعو بِإضنينُم، و لا يَفهَمو بِقُلوبُم، و لا يَرجَعو و بَشفيهُم.

²⁸ فِشان كِدا، أنا دَايِركُم تَعرِفو خَلاص الله دا كان مُرسَل لِلأُمَم، و هُم بِيَسمَعو.“

²⁹ و لَمّا قال دا، اليَهود مَرَقو، و هُم إتكَلَّمو كَتير مَعَ بَعض.

³⁰ و بُولُس قَعَد سَنَتين كُلّو في بيت هو أجَّرو لِنَفسو. و كان بِقبَل كُل البِدخُلو ليهو.

³¹ و كان بِبَشِّر بِمَلَكوت الله، و بِعَلِّم البِخُص بِالرَّب يَسُوع المَسيح بِدون خوف، و ما في واحِد يَمنَعو.