أعمال الرُّسُل 27 - كِتاب العَهد الجَّديد مِن الكِتاب المُقَدَّس

بُولُس يَسافِر لِرُومِيَه

¹ و لَمّا كانو دايرين نَسافِر بِمُركَب لِإِيطَالِيَه، سَلَّمو بُولُس و مَسجونين تانيين لِرَئيس العَساكِر، إسمو يُولِيُوس مِن قِسم أُغُسْطُس.

² و رِكِبنا مُركَب مِن أَدْرَامِيت قَرَّبَت تَسافِر لِلمَحَلّات عَلى الطَّرف، الفي آسيا. و أرَستَرخُس، راجِل مِكِدوني مِن تَسَالُونِيكِي، كان مَعانا.

³ و في اليوم التّاني، وِصِلنا لِصَيدا. و يُولِيُوس عَمَل مَعروف لِبُولُس و أدّاهو إذِن يَمشي لِأصحابو، عَشان يَدُّوهو المُحتاج ليهو.

⁴ و لَمّا سافَرنا في البَحَر مِن هِناك، مَشينا مِن تِحِت قُبرُص، عَشان الهَبوب كانَت ضِدَّنا.

⁵ و بَعَد ما قَطَعنا البَحَر البِجانِب كِيلِيكِيَّا و بَمفِليَه، جينا لِميرا في لِيكِيَّه.

⁶ و هِناك رَئيس العَساكِر لِقى مُركَب مِن الإسكَندَريَّه تَسافِر لِإيطاليَا، و هو دَخَّلنا فيها.

⁷ و مَشينا بِشيش أيام كَتيرَه، و بِالتَّعب وِصِلنا قَريب مِن كِنيدُس. و لَمّا الرّيح ما خَلَّتنا نِستَمِر في سِكَّتنا، مَشينا مِن تِحِت كَريت قَريب مِن سَلموني.

⁸ و مَرينا بِالطَّرف بِالتَّعب، و جينا لِمَحَل إسمو المَواني الطَّيبَه، قَريب مِن مَدينَة لَسَائِيَه.

⁹ و وَكِت طَويل فات، و السَّفَر في البَحَر كان فيهو خَطَر، عَشان الصّوم، عيد اليَهود، كان فات. عَلَشان كِدا بُولُس حَزَّرُم و قال ليهُم،

¹⁰ ”يا رُجال، بَشوف السَّفَر دا بِكون بِضَرَر و خَسارَه كَتيرَه، ما لِلبُضاعَه و المُركَب بَس، لَكِن عَلى نُفوسنا كَمان.“

¹¹ و لَكِن رَئيس العَساكِر سِمِع لِرَئيس المُركَب و السيد بِتاعو أكتَر مِن القالو ليهُم بُولُس.

¹² و ما دام مَحَل المَراكِب ما كوَيس لِلقُعاد في الشِّتا، الأكتَر مِنَّهُم كانو عاوزين يَسافِرو مِن هِناك. و إفتَكَرو يِمكِن يَقدَرو يَجو لِفينِكس، و يَقعُدو هِناك وَكِت الشِّتا. و هي مَحَل المَراكِب في كَريت مَفتوح لِريح الجَّنوب الغَربي، و لِريح الشِّمال الغَربي.

الهَبوب

¹³ و لَمّا هَبَّت ريح الجَّنوب بِالرّاحَه، إفتَكَرو هُم حَصَّلو عَلى الكانو دايرين، و رَفَعو المِرساة، و مَشو حَول كَريت قَريب مِن الطَّرف.

¹⁴ و لَكِن بَعَد شوَيَه ريح هَبوب شَديدَه مِن الجَّزيرَه، إسِما أُورُوكْلِيدُون، ضَرَبَتُم.

¹⁵ و لَمّا الهَبوب قَبَضَت المُركَب و ما كان مُمكِن تَقابِل الريح، سَلَّمنا ليها و كُنّا مَطرودين.

¹⁶ و مَشينا تِحِت جَزيرَه صَغَيرَه إسِما كُودَا. و بِالتَّعب قِدِرنا نَمسِك المُركَب الصَّغَيرَه.

¹⁷ و لَمّا رَفَعوها، هُم رَبَطو المُركَب بِحِبال زي حِزام. و عَلَشان كانو خايفين يَقَعو عَلى رَملَه السّيرتِس، نَزَّلو المِرساة و خَلّو المُركَب تَكون مَطرودَه.

¹⁸ و اليوم التّاني، عَلَشان الهَبوب شَدَّت عَلينا، إبتَدو يَرمو البُضاعَه بَرَّه.

¹⁹ و في اليوم التّالِت رَمو بِإيدينُم عِدَة المُركَب.

²⁰ و لَمّا ما قِدِرنا نَشوف الشَّمِش ولّا النُّجوم أيام كَتيرَه، و الهَبوب شَدَّدَت عَلينا، في الآخِر، ما كان عِندَنا رَجاء في خَلاصنا كُلّو كُلّو.

²¹ و بَعَد ما صامو وَكِت طَويل، قام بُولُس في وَسطُم و قال: ”يا رُجال، كان لازِم تَسمَعو لَي و ما تَسافِرو مِن كَريت، و ما تَجِيبو لِنُفوسكُم الضَّرَر دا و الخَسارَه.

²² و هَسَّع بَطلُب مِنَّكُم تَشِدّو حيلكُم، عَلَشان ما بِتكون خَسارَة زول واحِد مِنَّكُم إلّا المُركَب.

²³ عَشان في اللّيلَه دي، مَلاك الإلَه، الأنا حَقّو و أنا بَخدِمو، وَقَف جَمبي.

²⁴ و قال: ما تَخاف، يا بُولُس، إنتَ لازِم تِقيف قِدّام قَيصَر. و شوف! الله أدّاك كُل النّاس المِسافرين مَعاك.

²⁵ و كِدا، شِدّو حيلكُم، يا رُجال، عَشان أنا بآمِن بِالله إنّو بِكون زي ما هو قال لَي.

²⁶ و لَكِن لازِم نِترَمي عَلى جَزيرَه.“

خَراب المُركَب

²⁷ و بَعَد أربَعتاشَر ليلَه، و نِحنا لِسَّع كُنّا مَطرودين في بَحَر أدريَا، في نُص اللّيل تَقريباً، البَحّارَه إفتَكَرو نِحنا قَرَّبنا مِن الطَّرف،

²⁸ و قاسو المويَه، و لِقوها مِيَّه و عِشرين قَدَم. و لَمّا إتقَدَّمو شوَيَه و قاسو مَرَّه تانيَه، لِقوها تِسعين قَدَم.

²⁹ و عَلَشان كُنّا نَخاف نَقَع عَلى مَحَلّات حَجَريَّه، هُم رَمو مِن مؤَخِّرة المُركَب أربَعَه مَراسي، و كانو يَطلُبو أن يَكون النَّهار.

³⁰ و البَحّارَه جَرَّبو يَهرُبو مِن المُركَب، و نَزَّلو المُركَب الصَّغَيرَه لِلبَحَر، زي ما هُم عاوزين يَرمو مَراسي مِن مُقَدِّمة المُركَب.

³¹ و بُولُس قال لِرَئيس العَساكِر و لِلعَساكِر: ”إذا ديل ما بِستَنّو في المُركَب، إنتو ما بِتَقدَرو تَخلَصو.“

³² و في الوَكِت دا، العَساكِر قَطَعو حِبال المُركَب الصَّغَيرَه، و خَلّوها تَقَع.

³³ و لَمّا النَّهار قَرَّب يَجي، بُولُس كان بِطلُب لِكُلُّهُم عَشان ياكُلو و قال: ”لِمُدَّة أربَعتاشَر يوم، إنتو مُنتَظِرين و تِستَمِرّو تَصومو، و ما أكَلتو شي.

³⁴ عَلَشان كِدا، بَطلُب مِنَّكُم تَقبَلو أكِل، عَشان في فايدَه مِن دا لِحَياتكُم. و شَعرَه ما بِتَقَع مِن راس واحِد مِنَّكُم.“

³⁵ و لَمّا قال دا، أخَد عيش، و شَكَر الله قِدّام كُلُّهُم، و كَسَّر، و إبتَدا ياكُل.

³⁶ و كُلُّهُم بِقو مَبسوطين، و هُم كَمان أكَلو.

³⁷ و كُلُّنا في المُركَب كُنّا ميتين و سِتَّه و سَبعين زول.

³⁸ و لَمّا شَبَعو مِن الأكِل، إبتَدو يَعمِلو المُركَب خَفيفَه، و رَمو الدُّرَه في البَحَر.

³⁹ و لَمّا بِقى النَّهار، ما عِرفو الأرض، لَكِن شافو مَحَل في طَرف البَحَر الفيهو رَملَه. و كانو عاوزين يَدفَعو ليهو المُركَب إذا كان مُمكِن.

⁴⁰ و قَطَعو المَراسي و خَلّوها في البَحَر، و فَكّو حِبال الدَّفَّه. و بَعَد دا رَفَعو القُماش القِصَير لِلهَبوب، و إتقَدَّمو لِلطَّرف.

⁴¹ لَكِن وَقَعو عَلى مَكان بين بَحرين، و دَفَعو المُركَب لِلطَّرف. و المُقَدِّمة دَخَل في الرَّملَه و ما إتحَرَّك، و المؤَخِّرة إتكَسَّر مِن شِدَّة أمواج المويَه.

⁴² و كان فِكر العَساكِر يَكتُلو المَسجونين عَلَشان واحِد مِنَّهُم ما يَعوم و يَهرَب.

⁴³ لَكِن رَئيس العَساكِر، عَلَشان كان عاوِز يَخَلِّص بُولُس، وَقَّفُم مِن فِكرُم. و أمَر البِقدَرو يَعومو يَرمو نُفوسُم في الأوَّل و يَمشو لِلطَّرف.

⁴⁴ و التّانيين يَمشو بَعضَهُم عَلى خَشَب، و بَعضَهُم عَلى حِتَت مِن المُركَب. و كِدا، كُلُّهُم وِصلو بِسَلامَه لِلطَّرف.