أعمال الرُّسُل 25 - كِتاب العَهد الجَّديد مِن الكِتاب المُقَدَّس

بُولُس قِدّام فَسْتُوس

¹ و لَمّا فَسْتُوس وِصِل لِلمُديرِيَّه، طَلَع بَعَد تَلاتَة أيام مِن قَيْصَرِيَّه لِأُورُشَلِيم.

² و القُسُس الكُبار و رؤساء اليَهود خَبَّروهو بِشَكاويهُم عَلى بُولُس، و سألوهو كَتير.

³ و طَلَبو مِنّو يَعمِل مَعروف، و يَرَسِّل بُولُس لِأُورُشَلِيم، عَلَشان هُم قَطَعو الدَرِب عَشان يَكتُلوهو.

⁴ و فَسْتُوس رَدَّ عَليهُم: ”بُولُس مَحروس في السِّجِن في قَيْصَرِيَّه، و أنا عاوِز أمشي لِهِناك بَعَد شوَيَه.

⁵ خَلّو المَعروفين مِنَّكُم يَجو مَعاي، عَشان يَشتَكو عَلى الرّاجِل دا إذا فيهو ذَنب.“

⁶ و بَعَد ما إستَنّى مَعاهُم تَمانيَه ولّا عَشَرَة أيام، نَزَل لِقَيْصَرِيَّه. و اليوم التّاني قَعَد عَلى كُرسي المَحكَمَه، و أمَرُم يَجيبو بُولُس.

⁷ و لَمّا بُولُس جا، اليَهود النَّزَلو مِن أُورُشَلِيم وَقَفو حَواليهو، و قَدَّمو عَليهو شَكاوي كَتيرَه و صَعبَه. و ما قِدرو يَثَبِّتوها.

⁸ و بُولُس قال في رَدّو: ”أنا ما عَمَلتَ خَطيَّه ضِد قانون اليَهود ولّا ضِد الهيكَل ولّا ضِد قَيصَر.“

⁹ لَكِن فَسْتُوس كان عاوِز يَبسِط اليَهود، و قال لِبُولُس: ”إنتَ داير تَطلَع لِأُورُشَلِيم و تَحاكِم هِناك قِدامي، في الحاجات دي؟“

¹⁰ و بُولُس قال: ”أنا واقِف قِدّام كُرسي مَحكَمَة قَيصَر، المَحَل اللازِم أحاكِم فيهو. ما ظَلَمتَ اليَهود في شي، و إنتَ بِتَعرِف دا بِالتَّمام.

¹¹ لَكِن، إذا أنا عِندي ذَنب، ولّا عَمَلتَ شي يِستَحِق الموت، ما آبى أموت. و لَكِن إذا الشَّكاوي اليَهود ديل يَشتَكوني بيها مُش الحَق، و لا واحِد يَقدَر يِسِلِّمني ليهُم. أنا بَرفَع طَلَبي لِقَيصَر.“

¹² و بَعَد ما فَسْتُوس إتكَلَّم مَعَ مَجلِسو، رَدَّ عَليهو: ”لِقَيصَر رَفَعتَ طَلَبَك، لِقَيصَر بِتَمشي!“

فَسْتُوس يَشاوِر أَغْرِيبَاس

¹³ و بَعَد ما فاتَت شوَيَة أيام، أَغْرِيبَاس المَلِك و بَرْنِيكِي وِصلو لِقَيْصَرِيَّه، عَشان يَسَلِّمو عَلى فَسْتُوس.

¹⁴ و ما دام قَعَدو هِناك أيام كَتيرَه، فَسْتُوس إتكَلَّم مَعَ المَلِك عَن قَضيَّة بُولُس، و قال: ”فِيلِكْس خَلّى راجِل هِنا في السِّجِن.

¹⁵ و لَمّا كُنتَ في أُورُشَلِيم، القُسُس الكُبار و شُيوخ اليَهود قَدَّمو لَي شَكاوي، و طَلَبو الحُكم عَليهو.

¹⁶ و رَدّيت عَليهُم، دي ما عادَة ناس رومانيين أن يَسَلِّمو واحِد قُبّال ما هو، المُشتَكي عَليهو، يَقابِل وَش لِوَش المُشتَكين. و كِدا يَدُّوهو فُرصَه يَحرَس نَفسو مِن الشَّكوى.

¹⁷ و لَمّا جو هِنا مَعاي، قَعَدتَ في اليوم البَعدو عَلى كُرسي المَحكَمَه بِسُرعَه، و أمَرتُم يَجيبو الرّاجِل.

¹⁸ و لَمّا المُشتَكين عَليهو وَقَفو، ما جابو عَليهو ذَنب واحِد، زي ما كُنتَ بَفتَكِر.

¹⁹ و لَكِن كانو عِندَهُم عَليهو أسئلَه بِخُصوص الدّين بِتاعُم، و عَن إنسان إسمو يَسُوع، المات، و بُولُس كان بِقول هو حَي.

²⁰ و عَلَشان ما عِرِفتَ كيف أمتَحِن الحاجات دي، سألتو، إنتَ داير تَمشي لِأُورُشَلِيم و تَحاكِم هِناك عَلى الحاجات دي؟

²¹ و لَكِن لَمّا بُولُس رَفَع طَلَبو عَلَشان يَكون مَحفوظ لِحُكم مَلِك قَيصَر، أمَرتُم يَحرِسوهو لِغايَة ما أرَسِّلو لِقَيصَر.“

²² و أَغْرِيبَاس قال لِفَسْتُوس: ”أنا عاوِز أسمَع الرّاجِل دا.“ و هو قال: ”بُكرَه بِتَسمَع ليهو.“

²³ و اليوم التّاني أَغْرِيبَاس و بَرْنِيكِي جو بِكِبِر عَظيم، و دَخَلو مَحَل المَحكَمَه مَعَ رؤساء الجُّيوش و كُبار المَدينَه. و فَسْتُوس أمَرُم، و هُم جابو بُولُس.

²⁴ و فَسْتُوس قال: ”يا مَلِك أَغْرِيبَاس و كُل الرُّجال الحاضرين مَعانا، إنتو تَشوفو الرّاجِل دا! كُلّو زَحمَة اليَهود قَدَّمو لَي طَلَب بِخُصوصو في أُورُشَلِيم و هِنا. و كورَكو إنّو ما لازِم يَعيش بَعَد دا.

²⁵ و لَكِن أنا لِقيتو ما عَمَل حاجَه تِستَحِق الموت. لَكِن عَلَشانو رَفَع طَلَبو لِلمَلِك قَيصَر، قَرَّرتَ أرَسِّلو لِرُومِيَه.

²⁶ و لَكِن ما عِندي شي بِتأكيد بِخُصوصو عَشان أكتِب عَنّو لِلسَّيد. عَلَشان كِدا جِبتو قِدّامكُم، و خُصوصاً قِدَّامَك، يا مَلِك أَغْرِيبَاس، فِشان يَكون لَي بَعَد الإمتِحان دا، حاجَه عَشان أكتِب عَنّو.

²⁷ عَلَشان بَفتَكِر إنّو ما مَعقول أرَسِّل مَحبوس و ما بَوَرّي الشَّكاوي العَليهو.“