أعمال الرُّسُل 24 - كِتاب العَهد الجَّديد مِن الكِتاب المُقَدَّس

بُولُس قِدّام فِيلِكْس

¹ و بَعَد خَمسَة أيام، رَئيس القُسُس نَزَل مَعَ بَعض مِن الشُّيوخ و مِتكَلِّم إسمو تَرْتُلُّس. و هُم جابو قِدّام المُدير شَكاويهُم ضِد بُولُس.

² و لَمّا نادوهو، تَرْتُلُّس إبتَدا يَشتَكي عَليهو، و قال: ”عَلَشان نِحنا حَصَّلنا بيك عَلى سَلام كَتير، و تَرتيبَك جاب لِلأُمَّه دي حاجات كوَيسَه،

³ نِحنا نَقبَل داك، يا فِيلِكْس، في كُلّو شي و في كُلّو مَحَل بِكُلّو شُكر.

⁴ لَكِن عَلَشان ما نَتَعِّبَك زِيادَه، نَطلُب مِنَّك تَسمَعنا شوَيَه بِرَحمَتَك.

⁵ عَشان لِقينا الرّاجِل دا كان بِخرَب و بِحَرِّك دَوشَه بين كُل اليَهود الفي الدُّنيا، و هو رَئيس جَماعَة النّاصِريين.

⁶ و هو جَرَّب يَنَجِّس الهيكَل كَمان. عَلَشان كِدا، قَبَضنا عَليهو. و كُنّا عاوزين نَحكُم عَليهو حَسَب قانونّا،

⁷ لَكِن لِيسِيَاس رَئيس الجُّيوش جا، و اَخَدو مِن إيدينّا بِشِدَّه كَتيرَه.

⁸ و أمَر المُشتَكين عَليهو يَجو ليك. و لَمّا تَمتَحِنو، إنتَ بِتَقدَر تَعرِف مِنّو، كُل الشَّكاوي النَّشتَكيهو بيهو.“

⁹ و اليَهود إتَّفَقو مَعاهو في الشِّكايَه و قالو: ”الحاجات دي بِالحَق كِدا.“

¹⁰ و بُولُس رَدَّ عَليهُم لَمّا المُدير أشَّر ليهو بِإيدو عَشان يتكَلَّم، و قال: ”عَلَشان بَعرِف إنتَ قاضي لِلأُمَّه دي مِن مُدَّة سِنين كَتيرَه، أنا بَتكَلَّم فِشان نَفسي بِفَرَح.

¹¹ و إنتَ تَقدَر تَعرِف ما كان زِيادَه مِن إتناشَر يوم مِن الوَكِت الأنا مَشيت لِأُورُشَلِيم عَشان أعبُد الله.

¹² و هُم ما لِقوني في الهيكَل أشاكِل أي واحِد، ولّا أحَرِّك زَحمَة النّاس، ما في بُيوت الرَّب و لا في المَدينَه.

¹³ و هُم ما بِقدَرو يَثَبِّتو الشَّكاوي البِشتَكوني بيها هَسَّع.

¹⁴ و لَكِن بَعتَرِف ليكُم بِدا، أنا بِحَسَب الطَّريق البِسَمّوهو حِزب، أعبُد إلَه أبَهاتنا. و بآمِن بِكُل المَكتوب في القانون و الأنبياء.

¹⁵ و عِندي رَجاء بِالله، زي ما هُم كَمان عِندَهُم رَجاء. و بَنتَظِر إنّو بِتكون في قيامَه مِن بين المَيِّتين لِلبارين و الخاطيين.

¹⁶ كِدا بَعِلِّم نَفسي عَشان يَكون لَي دايماً ضَمير بِدون لوم قِدّام الله و النّاس.

¹⁷ و بَعَد سِنين كَتيرَه، جيت عَشان أجيب هَدايا لِأُمَّتي و أقَدِّم تَقدِمات.

¹⁸ و لَمّا كُنتَ بَسَوّي دا، لِقوني نَضيف حَسَب القانون في الهيكَل. و ما في زَحمَة النّاس مَعاي ولّا دَوشَه.

¹⁹ لَكِن كانو في بَعض مِن اليَهود مِن آسيا. و ديلاك لازِم يَجو قِدَّامَك، و يَشتَكو إذا عِندَهُم عَلي شي.

²⁰ و خَلّو ديل، الفي هِنا، نُفوسُم يَقولو شِنو اللِقو فِيني مِن ذَنب، وَكِت ما كُنتَ واقِف قِدّام المَجلِس.

²¹ إلّا الكِلمَه الوَحيدَه دي، الكورَكتَ بيها و أنا واقِف بِينُم: ’فِشان القيامَه مِن بين المَيِّتين يَحكُمو عَلي اليوم.“

²² لَكِن فِيلِكْس، عَلَشان كان بِيَعرِف بِالظَّبط عَن الطَّريق دا، صَرَفُم و قال: ”لَمّا لِيسِيَاس، رَئيس الجُّيوش بِجي، أنا بَمتَحِن الحاجات بِتاعتَك.“

²³ و أمَر رَئيس العَساكِر يَحرَس بُولُس، لَكِن يَدّيهو شوَيَة حُرّيَّه، و ما يَمنَع أي واحِد مِن أصحابو يَخدِمو.

²⁴ و بَعَد أيام قَليلَه، فِيلِكْس جا مَعَ دُرُوسِلا، مَرَتو، و هي يَهُودِيَّه. و هو رَسَّل و جاب بُولُس، و سِمِع مِنّو عَن الإيمان بِيَسُوع المَسيح.

²⁵ و وَكِت ما كان بِتكَلَّم عَن البِر و مَسِك النَّفس و الحُكم الجّاي، فِيلِكْس خاف و قال: ”هَسَّع كِفايَه، أمشي. و لَمَّن ألقى فُرصَه، بَناديك.“

²⁶ و كَمان كان عِندو رَجاء مِن بُولُس إنّو يَدّيهو قُروش. و عَلَشان كِدا، كان بِجيبو مَرّات كَتيرَه و يتكَلَّم مَعاهو.

²⁷ و لَمّا سَنَتين فاتو، بُورْكِيُوس فَسْتُوس أخَد مَكان فِيلِكْس. و عَلَشان فِيلِكْس كان عاوِز يَبسِط اليَهود، هو ساب بُولُس في السِّجِن.