أعمال الرُّسُل 23 - كِتاب العَهد الجَّديد مِن الكِتاب المُقَدَّس

بُولُس قِدّام مَجلِس العَهود

¹ بُولُس عايَن لِلمَجِلس و قال: ”يا رُجال و أخوان، أنا عِشتَ قِدّام الله بِضَمير فيهو سَلام حَتّى اليوم دا.“

² و حَنانيّا، رَئيس القُسُس أمَر الواقفين قَريب مِن بُولُس يَضرُبوهو عَلى خَشمو.

³ و بُولُس قال ليهو: ”الله بِضرُبَك، يا حيطَه مُبيَّضَه! إنتَ قاعِد تَحكُم عَلي بِحَسَب القانون، و إنتَ تأمر بِضَربي بِعَكس لِلقانون؟“

⁴ و الواقفين قالو: ”إنتَ تَشتِم رَئيس القُسُس بِتاع الله؟“

⁵ و بُولُس قال: ”يا أخوان، ما عِرِفتَ هو رَئيس القُسُس، عَشان مَكتوب، ما تَقول كِلمَه بَطّالَه عَن رَئيس شَعبَك.“

⁶ و عَلَشان بُولُس عِرِف جُزو مِنَّهُم صَدّوقيين و الجُّزو التّاني فَرّيسيِّين، كورَك في المَجِلس: ”يا رُجال و أخوان، أنا فرِّيسي، إبن فرِّيسي. و بِسَبَب رَجاء قيامَة المَيِّتين يَحكُمو عَلي.“

⁷ و لَمّا قال دا، حَصَل شَكلَه بين الفَرِّيسِيِّين و الصَّدّوقيين. و الإجتِماع إنقَسَم.

⁸ عَشان الصَدّوقيين بِقولو ما في قيامَه، و لا مَلاك، و لا روح. و لَكِن الفَرِّيسِيِّين بِعتَرِفو بِكُلّو داك.

⁹ و كان في كوراك شَديد. و قامو بَعض مِن مُعَلِّمين القانون، قِسِم الفَرِّيسِيِّين، و إتشاكَلو شَديد، و قالو: ”ما بِنَلقى في الإنسان دا شَر. و إذا روح ولّا مَلاك كَلَّمو، دا شِنو لينا؟“

¹⁰ و لَمّا الشَّكلَه شَدَّدَت، رَئيس الجُّيوش خاف إنَّهُم يَقطَعو بُولُس حِتَّه حِتَّه. و أمَر الجُّيوش يَنزِلو و يَقبُضوهو مِن وَسطُم و يَجيبوهو لِمَنطِقَة العَساكِر.

¹¹ و في اللّيل البَعدو، الرَّب وَقَف جَمبو و قال ليهو: ”شِد حيلَك، زي ما شِهِدتَ لَي في أُورُشَلِيم، كِدا، لازِم تَشهَد في رُومِيَه كَمان.“

تَرتيب سِرّي لِيَكتُل بُولُس

¹² و في الصَّباح، اليَهود عَمَلو تَرتيب بِالسِّر، و حَلَفو بِلَعنَه. و قالو: ”ما ناكُل ولّا نَشرِب حَتّى نَكتُل بُولُس.“

¹³ و العَمَلو الحَلَف دا كانو أكتَر مِن أربَعين راجِل.

¹⁴ و هُم مَشو لِلقُسُس الكُبار و الشُّيوخ و قالو: ”حَلَفنا بِلَعنَه ما ناكُل حاجَه حَتّى نَكتُل بُولُس.

¹⁵ عَلَشان كِدا، إنتو، مَعَ المَجِلس، رَسِّلو لِرَئيس الجُّيوش عَشان يَجيبوهو ليكُم، زي ما عاوزين تَمتَحِنو قَضيَّتو بِالتَّمام. و نِحنا نَكون جاهِزين نَكتُلوهو قُبّال ما يَقَرِّب مِن هِنا.“

¹⁶ و لَكِن وَلَد أُخُت بُولُس سِمِع بِالتَّرتيب السِّرّي دا، و دَخَل مَنطِقَة العَساكِر و خَبَّر بُولُس.

¹⁷ و بُولُس نادى واحِد مِن رؤساء العَساكِر و قال: ”أُخُد الشّاب دا لِرَئيس الجُّيوش، عَلَشان هو عِندو شي يَخَبِّرو بيهو.“

¹⁸ و اَخَدو و جابو لِرَئيس الجُّيوش و قال: ”المَحبوس بُولُس ناداني، و سألني يَجيب الشّاب دا ليك، عَلَشان عِندو شي يَقولو ليك.“

¹⁹ و رَئيس الجُّيوش اَخَدو بِإيدو، و مَشى مَعاهو بِجَنب بَراهو و سَألو: ”عِندَك شِنو تَقولو لَي؟“

²⁰ و قال: ”اليَهود إتَّفَقو يَطلُبو مِنَّك تَجيب بُولُس لِلمَجِلس بُكرَه، زي ما عاوزين يَسألو عَن قَضيَّتو بِالتَّمام.

²¹ ما تَسمَع ليهُم، عَشان في أكتَر مِن أربَعين راجِل بِندَسّو و بِستَنّوهو. و هُم حَلَفو عَشان ما ياكلو و لا يَشرَبو حَتّى يَكتُلوهو. و هَسَّع، هُم جاهِزين و بِستَنّو مِنَّك وَعَد.“

²² و رَئيس الجُّيوش خَلّى الشّاب يَمشي، و قال ليهو: ”ما تَقول لِأي واحِد الخَبَّرتَني بيهو.“

بُولُس يَمشي لِقَيْصَرِيَّه

²³ و نادى إتنين مِن رؤساء العَساكِر و قال: ”جَهِّزو ميتين عَسكَري عَشان يَمشو لِقَيْصَرِيَّه السّاعَه تِسعَه بِاللّيل. و جَهِّز كَمان سَبعين عَسكَري راكبين حَصين، و ميتين عَسكَري شايلين حُراب.

²⁴ و جَهِّزو حُصان لِبُولُس عَشان يَركَب. و كِدا يَجيبوهو بِالسَّلامَه لِفِيلِكْس المُدير.“

²⁵ و هو كَتَب جَواب زي الجّاي:

²⁶ ”مِن كُلُودِيُوس لِيسِيَاس لِلحَبيب فِيلِكْس المُدير، سَلام.

²⁷ اليَهود قَبَضو عَلى الرّاجِل دا، و قَرَّبو يَكتُلوهو. لَكِن جيت مَعَ الجُّيوش و خَلَّصتو، عَشان عِرِفتَ إنّو روماني.

²⁸ و لَمّا كُنتَ داير أعرِف الشِّكايَه البِشتَكوهو بيها، جِبتو لِمَجلِسُم.

²⁹ و لِقيتُم إشتَكوهو بِأسئلَه بِخُصوص قانونُم. لَكِن ما إشتَكوهو بِشي يِستَحِق الموت ولّا الجَّنازِير.

³⁰ و لَمّا خَبَّروني بِتَرتيب سِرّي ضِد الرّاجِل، رَسَّلتو ليك طَوّالي. و أمَرتَ المُشتَكين يَقولو ليك العِندَهُم عَليهو.“

³¹ و العَساكِر اَخَدو بُولُس زي ما أمَروهُم، و جابوهو بِاللّيل لِغايَة أَنْتِيبَاتْرِيس.

³² و اليوم التّاني، خَلّو العَسكَري الرّاكبين حَصين يَمشو مَعَ بُولُس، و هُم رَجَعو لِمَنطِقَة العَساكِر.

³³ و ديل دَخَلو قَيْصَرِيَّه، و أدّو الجَّواب لِلمُدير، و سَلَّمو بُولُس ليهو.

³⁴ و لَمّا المُدير قَرا الجَّواب، سأل عَنّو، هو مِن ياتا مُديرِيَّه. و لِقاهو مِن كِيلِيكِيَّا.

³⁵ و قال: ”بَسمَع مِنَّك لَمّا المُشتَكين عَليك بِجو كَمان.“ و أمَرُم يَحرَسو بُولُس في سَرايَة هِيرُودُس.