أعمال الرُّسُل 22 - كِتاب العَهد الجَّديد مِن الكِتاب المُقَدَّس

¹ ”يا أخوان و أبَهات، أسمَعو و أنا بَدّي حِساب حَياتي هَسَّع قِدّامكُم.“

² و لَمّا سِمِعوهو يَكَلِّمُم بِّاللُغَه العِبرانيَّه، سَكَتو زِيادَه. و بُولُس قال:

³ ”أنا راجِل يَهودي، إتوَلَدتَ في طَرْسُوس بِتاعَت كِيلِيكِيَّا. لَكِن أنا كِبِرتَ في المَدينَه دي، و كُنتَ تِلميذ تِحِت غَمَالَائِيل. هو عَلَّمني قانون أبَهاتنا بِالتَّمام، و كانَت عِندي غيرَه لِلَّه زي كُلُّكُم اليوم.

⁴ و طَرَدتَ الطَّريق دا حَتّى الموت، و قَبَضتَ عَلى رُجال و نِسوان، و رَميتُم في السِّجِن.

⁵ و رَئيس القُسُس و كُلّو مَجلِس الشُّيوخ يَقدَرو يَشهَدو لَي بِداك. و أخَدتَ مِنَّهُم جَوابات لِلأخوان في دِمَشق. و مَشيت لِدِمَشق عَشان أجيب النّاس ديل بِجَنازِير لِأُورُشَلِيم عَشان يَعاقِبوهُم.

⁶ و وَكِت ما كُنتَ ماشي و قَرَّبتَ لِدِمَشق، حَصَل في الضُّهُر تَقريباً، إنّو نور عَظيم نَوَّر حَواليهم طَوّالي.

⁷ و وَقَعتَ عَلى الأرض، و سِمِعتَ صوت يَقول لَي: يا شَاوُل، يا شَاوُل، لِشِنو بِتَطرُدني؟

⁸ و رَدّيت عَليهو: إنتَ مِنو، يا سَيِّدي؟ و قال لَي: أنا يَسُوع النّاصِري، الأنتَ بِتَطرُدو.

⁹ و النّاس الكانو مَعاي شافو النّور، و لَكِن ما سِمِعو الصّوت الكَلَّمني.

¹⁰ و قُلتَ: بَعمِل شِنو، يا رَب؟ و الرَّب قال لَي: قوم و أمشي لِدِمَشق، و هِناك بِقولو ليك عَن كُل المَجَهَّز ليك تَعمِل.

¹¹ و عَلَشان ما قِدِرتَ أشوف مِن النّور المِنَوِّر داك، النّاس مَعاي قادوني بِإيدي، و جيت لِدِمَشق.

¹² و حَنانيّا، راجِل طَيب حَسَب القانون، و مُحتِرَم مِن اليَهود السّاكنين هِناك،

¹³ جا لَي و وَقَف قِدامي، و قال لَي: ’يا أخي شَاوُل، عايِن لِفوق.‘ و في السّاعَه ديك قِدِرتَ أعاين ليهو.

¹⁴ و هو قال: ’إلَه أبَهاتنا إختارَك عَشان تَعرِف إرادتو و تَشوف البار و تَسمَعو يتكَلَّم بِصوتو.

¹⁵ عَشانَ إنت بِتكون شاهِد ليهو لِكُل النّاس بِالشُّفتو و السِّمِعتو.

¹⁶ و هَسَّع لِشِنو تِستَنّى؟ قوم و إتعَمَّد، و أغسِل خَطاياك، و نادي بِإسم الرَّب.‘

¹⁷ و حَصَل لَي لَمّا رَجَعتَ لِأُورُشَلِيم و كُنتَ بَصَلّي في الهيكَل، شُفتَ رؤيا.

¹⁸ و شُفتَ الرَّب يَقول لَي: ’أسرِع و أمرُق قَوام مِن أُورُشَلِيم، عَشانُم ما بِقبَلو شَهادَتَك لَي.‘

¹⁹ و قُلتَ: ’يا رَب، هُم بِيَعرِفو أنا كُنتَ بَخُت في السِّجِن البِآمِنو بيك، و بَضرُبُم في كُلّو بيت الرَّب.

²⁰ و وَكِت هُم كَبّو دَم اسْتِفَانُوس، شَهيدَك، أنا كَمان كُنتَ واقِف رَضيان، و حارِس لِهِدوم النّاس الكَتَلوهو.‘

²¹ و الرَّب قال لَي: ’أمشي، عَشان أنا بَرَسِّلَك بَعيد لِلأُمَم.“

²² و النّاس سِمِعوهو حَتّى الكِلمَه دي. و بَعَد دا، رَفَعو أصواتُم و قالو: ”أُخُد راجِل زي دا مِن الأرض! هو ما يِستَحِق يَعيش.“

²³ و لَمّا هُم كانو يَكورِكو و يَقلَعو هِدُومُم، و يَرمو التُّراب في الهَوا،

²⁴ رَئيس الجُّيوش أمَرُم ياخُدو بُولُس جُوَّه مَنطِقَة العَساكِر. و قال إنّو يَمتَحِن بِضَرَبات، عَشان يَعرِف لِشِنو النّاس كانو يَكورِكو عَليهو كِدا.

²⁵ و لَمّا رَبَطوهو عَشان يَجلِدوهو، بُولُس قال لِرَئيس المِيَّه الواقِف هِناك: ”دا بِالقانون ليكُم تَجلِدو إنسان روماني الما حَكَمو عَليهو؟“

²⁶ و لَمّا رَئيس العَساكِر سِمِع، هو مَشى لِرَئيس الجُّيوش و خَبَّرو و قال: ”إنتَ بِتسَوّي شِنو؟ الرّاجِل دا روماني.“

²⁷ و رَئيس الجُّيوش مَشى لِبُولُس و قال ليهو: ”قول لَي، إنتَ روماني؟“ و قال: ”أيوَه.“

²⁸ و رَدَّ رَئيس الجُّيوش: ”أنا بِتَمَن كَبير أشتَريت الحُقوق الرّوماني دي.“ و بُولُس قال ليهو: ”لَكِن أنا إتوَلَدتَ فيها.“

²⁹ و طَوّالي الكانو عاوزين يَمتَحِنو، رَجَّعو عَنّو. و رَئيس الجُّيوش خاف لَمّا عِرِف إنّو روماني و كان رَبَطو.

³⁰ و في اليوم التّاني، فَكّاهو عَلَشان كان عاوِز يَعرِف الحَق عَن البِشتَكو بيهو اليَهود. و أمَر القُسُس الكُبار و كُلّو مَجلِسُم أن يِتلَمّو. و جاب بُولُس و خَتّاهو قِدّامُم.