أعمال الرُّسُل 21 - كِتاب العَهد الجَّديد مِن الكِتاب المُقَدَّس

السَّفَر لِأُورُشَلِيم

¹ و لَمّا خَليناهُم و سافَرنا بِمُركَب، مَشينا في سِكَّه طَوّالي لِكوس، و في اليوم التّاني لِرودُس، و مِن هِناك لِباتَرا.

² و عَلَشان لِقينا مُركَب تَقطَع البَحَر لِفِينِيقِيَه، رِكِبناها و سافَرنا.

³ و لَمّا قِدِرنا نَشوف قُبرُص، خَلّيناها عَلى شِمالنا، و سافَرنا لِسُورِيَّه. و وِصِلنا لِصُور، عَشان هِناك المُركَب كانَت تَنَزِّل بُضاعَتا.

⁴ و عَلَشان لِقينا التَّلاميذ، قَعَدنا مَعاهُم أُسبوع. و هُم كانو بِقولو لِبُولُس بِالرّوح عَشان ما يَطلَع لِأُورُشَلِيم.

⁵ و لَكِن لَمّا الوَكِت فات، مَرَقنا و مَشينا. و كُلُّهُم مَشو مَعانا مَعَ النِّسوان و الأولاد لِبَرَّه المَدينَه. و رَكَعنا عَلى رُكبَتينا عَلى الرَّملَه و صَلينا.

⁶ و بَعَد ما قُلنا مَعَ السَّلامَه بَعَضَنا لِبَعض، رِكِبنا المُركَب، و لَكِن هُم رَجَعو لِبُيوتُم.

⁷ و لَمّا خَلَّصنا السَّفَر مِن صُور، وِصِلنا لِبُتُولِمَايِس و سَلَّمنا عَلى الأخوان. و قَعَدنا مَعاهُم يوم واحِد.

⁸ و في اليوم التّاني، مَرَقنا و جينا لِقَيْصَرِيَّه. و دَخَلنا بيت فِيلُبُّس المُبَشِّر، الهو واحِد مِن السَّبعَه، و قَعَدنا مَعاهو.

⁹ و كان عِندو أربَعَه بَنات عَذارى الإتنَبّو.

¹⁰ و بَعَد ما قَعَدنا أيام زِيادَه، نَبي إسمو أغابوس نَزَل مِن اليَهُودِيَّه.

¹¹ و جا لينا و أخَد حِزام بُولُس، و رَبَط بيهو إيدينو و رِجلينو و قال: الرّوح القُدُس يَقول: ”كِدا، اليَهود في أُورُشَلِيم ماشين يَربُطو الرّاجِل، سيد الحِزام دا، و بِسَلِّموهو لِإيدين الأُمَم.“

¹² و وَكِت سِمِعنا داك، نِحنا و أهَل المَحَل طَلَبنا مِنّو ما يَطلَع لِأُورُشَلِيم.

¹³ لَكِن بُولُس رَدَّ و قال: ”مالكُم بِتَبكو و تَكسِرو قَلبي؟ أنا جاهِز مُش أكون مَربوط بَس، لَكِن أموت كَمان في أُورُشَلِيم فِشان خاطِر إسِم الرَّب يَسُوع.“

¹⁴ و لَمّا أبى يَسمَعنا، سَكَتنا و قُلنا: ”خَلّي إرادَة الرَّب تَكون.“

¹⁵ و بَعَد الأيام ديلاك، جَهَّزنا و طَلَعنا لِأُورُشَلِيم.

¹⁶ و بَعض مِن التَّلاميذ مِن قَيْصَرِيَّه مَشو مَعانا، و جابونا لِبيت مَناسون عَشان نَقعُد مَعاهو. و هو راجِل مِن قُبرُص و كان تِلميذ مِن بَدري.

بُولُس يوصَل في أُورُشَلِيم

¹⁷ و لَمّا وِصِلنا لِأُورُشَلِيم، الأخوان قِبِلنا بِفَرَح.

¹⁸ و اليوم التّاني، بُولُس دَخَل مَعانا لِيَعْقُوب. و كُل الشُّيوخ كانو في.

¹⁹ و بَعَد ما سَلّم عَليهُم، بُولُس كَلَّمُم مِن اول، لِآخِر، بِكُلّو حاجَه الله عَمَلا بين الأُمَم بِخِدمَتو.

²⁰ و لَمّا سِمِعو، مَجَّدو الله. و قالو ليهو: ”إنتَ تَشوف، يا أخي، كَم ألف مِن اليَهود آمَنو، و كُلُّهُم عِندَهُم غيرَه لِلقانون.

²¹ و ناس خَبَّروهُم كيف إنتَ بِتعَلِّم كُل اليَهود السّاكنين بين الأُمَم عَشان يَسيبو مُوسَى، و بِتقول ليهُم أن ما يَطَهِّرو أولادُم، و ما يَمشو حَسَب العادات.

²² و كِدا بِنَعمِل شِنو؟ ما في شَك النّاس بِتلَمّو، عَلَشان هُم بِسمَعو إنتَ جيت.

²³ عَلَشان كِدا، سَوّي الحاجَه البِنقول ليك. عِندَنا أربَعَه رُجال عَليهُم وَعَد.

²⁴ أُخُد ديل، و نَضِّف نَفسَك مَعاهُم، و أدفَع القُروش ليهُم عَشان هُم يَحلِقو روسينُم. و كِدا، كُلُّهُم بِيَعرِفو الخَبَّروهُم بيك مُش الحَق، لَكِن إنتَ نَفسَك بِتَحفَظ القانون.

²⁵ و بِخُصوص الآمَنو بين الأُمَم، كَتَبنا ليهُم و حَكَمنا هُم لازِم يَرفُضو الضَّبَحوها لِلأصنام، و الدَّم، و اللَّحَم مِن بَهايِم مَخنوق، و الزِّنا.“

²⁶ و في اليوم التّاني، بُولُس أخَد الرُّجال، و إتنَضَّف مَعاهُم. و دَخَل الهيكَل عَشان يَبَيِّن تَمام أيام النَّضافَه لِغايَة ما يَقَدِّمو تَقدِمَه عَن كُلّو واحِد مِنَّهُم.

قَبض بُولُس

²⁷ و لَمّا السَّبَعَة أيام قَرَّبو يَفوتو، اليَهود المِن آسيا شافو بُولُس في الهيكَل. و حَرَّكو كُل النّاس و قَبَضوهو.

²⁸ و كورَكو: ”يا رُجال إِسْرَائِيل، ساعِدونا! دا هو الرّاجِل البِعَلِّم كُل النّاس في كُلّو مَكان ضِد الشَّعب و القانون و المَحَل دا. و هو كَمان جاب ناس إغريقيين لِلهيكَل، و نَجَّس المَحَل المُقَدَّس دا.“

²⁹ عَلَشانُم كانو شافو وَتُرُوفِيمُس مِن أفَسُس مَعاهو في المَدينَه، و إفتَكَرو بُولُس جابو لِلهيكَل.

³⁰ و كُل المَدينَه إتحَرَّكَت، و النّاس جَرو سَوّا. و قَبَضو بُولُس، و جَرّوهو بَرَّه مِن الهيكَل. و طَوّالي قَفَلو الأبواب.

³¹ و وَكِت هُم كانو يَطلُبو يَكتُلوهو، الخَبَر وِصِل لِرَئيس جُيوش رُومِيَه إنّو المَدينَه كُلَّها إتحَرَّكَت.

³² و هو حالاً أخَد عَساكِر و ضُبّاط، و جَرى ليهُم. و لَمّا هُم شافو الرَّئيس و العَساكِر، وَقَّفو يَضرُبو بُولُس.

³³ في الوَكِت دا، رَئيس الجُّيوش قَرَّب ليهو، و قَبَض عَليهو، و أمَرُم يَربُطوهو بِجَنزيرين. و سأل عَنّو مِنو هو، و عَمَل شِنو.

³⁴ و بَعض مِن النّاس كانو يَكورِكو بِشي، و البَعض بِشي تاني. و لَمّا ما قِدِر يَعرِف الحَق عَن دا بِسَبَب الدَوشَه، هو أمَرُم ياخُدو بُولُس جُوَّه مَنطِقَة العَساكِر.

³⁵ و لَمّا بُولُس وِصِل لِلسَّلالِم، العَساكِر كان لازِم يَشيلوهو بِسَبَب شِدَّة النّاس الكُتار،

³⁶ علشان كَترَت النّاس الكانو يَمشو وَراهو و يَكورِكو: ”أكتُلو!“

بُولُس يَشهَد قِدّام شَعبو

³⁷ و وَكِت العَساكِر قَرَّبو ياخُدو بُولُس لِمَنطِقَة العَساكِر، هو قال لِلرَّئيس: ”مِن فَضلَك، مُمكِن أقول ليك حاجَه؟“ و قال ليهو: ”إنتَ بِتَعرِف لُغَة ناس إغريقيين؟

³⁸ ما إنتَ المَصري القام بِفِتنَه قُبّال الأيام دي؟ و مَرَق لِلخَلا مَعَ أربَعَة آلاف راجِل مِن الكاتِلين؟“

³⁹ و بُولُس قال: ”أنا راجِل يَهودي مِن طَرْسُوس، مِن ناس مَدينَه مَعروفَه في كِيلِيكِيَّا. مِن فَضلَك، خَلّيني أكَلِّم النّاس.“

⁴⁰ و لَمَّن أدّاهو إذِن، بُولُس وَقَف عَلى السَّلالِم، و أشَّر بِإيدو لِلنّاس. و لَمّا كُلُّهُم سَكَتو، هو كَلَّمُم بِّاللُغَه العِبرانيَّه و قال: