أعمال الرُّسُل 20 - كِتاب العَهد الجَّديد مِن الكِتاب المُقَدَّس

بُولُس يَقَوِّم أفتيخوس مِن الموت

¹ و بَعَد ما الدَوشَه تَمَّت، بُولُس نادى التَّلاميذ و شَجَّعُم و قال ليهُم: ”مَعَ السَّلامَه،“ و مَرَق عَشان يَمشي لِمَكِدونيَّه.

² و لَمّا سافَر في المَحَلّات ديك و بَشَّرُم كَتير عَشان يَدّيهو شَجاعَه، هو جا لِبَلَد ناس إغريقيين.

³ و قَعَد هِناك تلاتَه شُهور. و لَمّا قَرَّب يَسافِر في البَحَر لِسُورِيَّه، اليَهود عَمَلو تَرتيب ضِدّو بِالسِّر. عَلَشان كِدا، هو إختار يَرجَع بِسِكَّة مَكِدونيَّه.

⁴ و مَشو مَعاهو لِآسيا. سُوبَاتَرُس إبن بِرُّس مِن بيريَّه، و وَأَرِسْتَرْخُس، و وَسَكُونْدُس مِن ناس تَسَالُونِيكِي، و غَايُوس مِن دَربَه، و تِيمُوثَاوُس. و وَتِيخِيكُس، و وَتُرُوفِيمُس مِن ناس آسيا.

⁵ و ديل مَشو قِدّامنا و إستَنّونا في تَرُوَاس.

⁶ و لَكِن نِحنا سافَرنا بِمُركَب مِن فيلِبّي بَعَد أيام عيد الفَطير. و جينا ليهُم في خَمسَة أيام في تَرُوَاس، و قَعَدنا هِناك أُسبوع.

⁷ و في أوَّل الأسبوع، إتلَمّينا سَوا عَشان نَكَسِّر العيش. و بُولُس إتكَلَّم مَعاهُم، و هو داير يَمشي في اليوم التّاني. و إستَمَر في الكَلام لِنُص اللّيل.

⁸ و كانَت في فَوانيس كَتيرَه في الأوضَه الفي فوق، الكُنّا مِتلَمين فيها.

⁹ و كان شاب إسمو أفتيخوس قاعِد في الشُّبّاك. و هو بِقى نَعسان و نام نوم تَقيل. و لَمّا بُولُس إستَمَرَّ في الكَلام، النّوم غَلَب عَليهو، و هو وَقَع مِن الدّور التّالِت لِتِحِت، و شالوهو مَيِّت.

¹⁰ و بُولُس نَزَل، و رَمى نَفسو فوق الشّاب، و خَتَّ ضِراعاتو حَوَليهو و قال: ”ما تَتعَبو، هو حَي!“

¹¹ و طَلَع و كَسَّر العيش و أكَل، و إتكَلَّم كَتير لِغايَة الصَّباح. و بَعَد دا مَرَق.

¹² و جابو الشّاب حَي، و إتعَزّو كَتير خَلاص.

البِشارَه الأخيرَه لِشُيوخ أفَسُس

¹³ لَكِن نِحنا مَشينا قِدّامو لِلمُركَب، و سافَرنا بِمُركَب لِأسّوس. و كُنّا عاوزين ناخُد بُولُس مِن هِناك، عَشان بُولُس كان عَمَل التَّرتيب دا، عَلَشانو عاوِز يَمشي عَلى كِراعو.

¹⁴ و لَمّا هو قابَلنا في أسّوس، أخَدناهو لِمِيتِيلِينِي.

¹⁵ و لَمّا سافَرنا بِمُركَب مِن هِناك، وِصِلنا في اليوم التّاني قَريب مِن خِيوس. و في اليوم البَعدو، وِصِلنا لِساموس، و في اليوم التّاني جينا لِمِيلِيتُس.

¹⁶ و بُولُس كان إختار يَفوت أفَسُس، عَشان ما لازِم يَضَيِّع وَكِت في آسيا. هو كان مِستَعجِل لِيَكون في أُورُشَلِيم في يوم الخَمسين إذا كان مُمكِن.

¹⁷ و مِن مِيلِيتُس بُولُس رَسَّل، و نادى شُيوخ الكَنيسَه.

¹⁸ و لَمّا جو ليهو، قال ليهُم: ”إنتو بِتَعرِفو كيف كُنتَ بَعيش مَعاكُم كُل الوَكِت مِن أوَّل يوم دَخَلتَ في آسيا.

¹⁹ خَدَمتَ الرَّب بِتَواضُع كَتير، و دِموع كَتيرَه، و بِتَجَارِب حَصَلَت لَي مِن تَرتيب اليَهود الفي السِّر.

²⁰ و بِتَعرِفو أنا ما أبيت أبَشِّركُم بِأي حاجَه الفيها فايدَه ليكُم، لَكِن عَلَّمتَكُم قِدّام النّاس و في كُلّو بيت.

²¹ أنا شاهِد لِليَهود و لِناس إغريقيين بِالتّوبَه لِلَّه، و الإيمان بِرَبَّنا يَسُوع المَسيح.

²² و هَسَّع شوفو، بَمشي لِأُورُشَلِيم مَربوط بِالرّوح، و ما بَعرِف البِيَحصَل لَي هِناك،

²³ إلّا الرّوح القُدُس يَشهَد لَي في كُلّو مَدينَه، و يَقول جَنازِير و أتعاب يِستَنّوني.

²⁴ لَكِنّي ما أحسِب حَياتي غالي لِنَفسي أبَداً، إذا كان بَس أكَمِّل شُغلي و الخِدمَه القِبِلتا مِن الرَّب يَسُوع عَشان أشهَد بِإنجيل نِعمَة الله.

²⁵ و هَسَّع شوفو، أنا بَعرِف إنتو ما بِتشوفو وَشّي تاني مَرَّه، إنتو، يا كُل الأنا مَشيت بِينُم بَبَشِّر بِالمَلَكوت.

²⁶ عَلَشان كِدا، أشهَد ليكُم أنا نَضيف مِن دَم كُلُّكُم.

²⁷ عَشانّي ما إتوَقَّفتَ أخَبِّركُم بِكُلّو إرادَة الله.

²⁸ أحرِسو نُفوسكُم و كُل المُراح، العَمَلكُم الرّوح القُدُس فيهو وكَلاء، عَشان تَكونو رُعاه كَنيسَة الله الإشتَراها بِدَمّو.

²⁹ و أنا بَعرِف بَعَد ما مَشيت، دياب مِتوَحِّشين بِدخُلو، و ما بِرحَمو عَلى المُراح.

³⁰ و مِنَّكُم نُفوسكُم، بِقومو رُجال يِتكَلَّمو بِحاجات مَعَوَّجَه، عَشان يَجُرّو التَّلاميذ وَراهُم.

³¹ عَلَشان كِدا، أحرِسو و إتزَكَّرو أنا مُدَّة تلاتَه سِنين ما وَقَّفتَ ليل و نَهار أهَظِّر كُلّو واحِد مِنَّكُم بِالدِّموع.

³² و هَسَّع بَدّيكُم لِلَّه، و لِكِلمَة نِعمَتو، البِتَقدَر تَبنيكُم و تَدّي ليكُم الميراث مَعَ كُل القِدِّسين.

³³ أنا ما طَمَعتَ مِن زول فِضَّه ولّا دَهَب ولّا هِدوم.

³⁴ إنتو نُفوسكُم بِتَعرِفو الإيدين ديل كانَت تَخدِم إحتِياجاتي، و إحتِياجات الكانو مَعاي.

³⁵ و وَرّيتكُم في كُلّو حاجَه كيف لازِم نَتعَب لِنَساعِد الضَّعيفين، و نِزَكَّر كِلمات الرَّب يَسُوع القال: ’هو البِدّي بِكون مُبارَك أكتَر مِن البِقبَل.“

³⁶ و لَمّا قال دا، رَكَع عَلى رُكبَتيهو مَعَ كُلُّهُم و صَلّى.

³⁷ و كُلُّهُم بَكو بِكى شَديد، و وَقَعو عَلى رَقَبَة بُولُس، و سَلَّمو عَليهو.

³⁸ و بِقو حَزنانين زِيادَه عَلى الكِلمَه القالا ليهُم: ”إنتو ما بِتشوفو وَشّي مَرَّه تانيَه.“ و بَعَد دا، مَشو مَعاهو لِلمُركَب.