أعمال الرُّسُل 2 - كِتاب العَهد الجَّديد مِن الكِتاب المُقَدَّس

يوم الخَمسين

¹ و لَمّا جا يوم الخَمسين، كُلُّهُم كانو سَوا في مَكان واحِد.

² و طَوّالي، جا صوت مِن السَّما زي هَبوب شَديدَه، و مَلا كُل البيت الهُم كانو قاعِدين فيهو.

³ و ظَهَرَت ليهُم لِسانات مُنقَسِمَه، زي مِن نار، و قَعَدت عَلى كُلّو واحِد مِنَّهُم.

⁴ و كُلُّهُم كانو مَليانين مِن الرّوح القُدُس، و بَدو يِتكَلَّمو بِلُغات مُختَلِفَه زي ما أدّاهُم الرّوح القُوَّه عَشان يِتكَلَّمو.

⁵ و كانو قاعِدين في أُورُشَلِيم رُجال بِخافو الله مِن اليَهود مِن كُلّو بَلَد الدُّنيا.

⁶ و لَمّا سِمِعو الصّوت دا، ناس كُتار إتلَمّو و إتحَيَّرو، عَشان كُلّو واحِد مِنَّهُم كان بِسمَعُم يِتكَلَّمو بِلُغَتو.

⁷ و إستَغرَبو و إتعَجَّبو و قالو: ”الرُّجال ديل البِتكَلَّمو، ما كُلُّهُم ناس الجَّليل؟

⁸ و كيف كُلّو واحِد مِنَّنا بِسمَعُم يِتكَلَّمو بِّاللُغَه بِتاعتو نَفسو.

⁹ نِحنا ناس فَرتيَّه و ناس ماديَّه و ناس عِلاميَّه و ناس السّاكنين في العِراق و في اليَهُودِيَّه و في كَبَّدوكيَّه و في بُنتُس و في آسيا.

¹⁰ و في فَرِيجِيَّه و في بَمْفِيلِيَّه و في مَصِر و أقسام لِيبِيَّا القَريبَه لِقيرَوان و ضُيوف مِن رُومِيَه، يَهود و مِصَدِّقين دين اليَهود.

¹¹ ناس كَريت و ناس العَرَب، بِنَسمَعُم يِتكَلَّمو بِلُغاتنا عَن الأعمال الكَبيرَه بِتاعَت الله.“

¹² و كُلُّهُم كانو بِستَغرَبو و بِتحَيَّرو و يَقولو بَعضَهُم مَعَ بَعض: ”مَعني الكلام دا شِنو؟“

¹³ و تانيين كانو بِضحَكو عَليهُم و بِقولو: ”الرُّجال ديل سَكرانين.“

بُطْرُس يَبَشِّر النّاس

¹⁴ في الوَكِت دا، بُطْرُس وَقَف مَعَ الحِداشَر، و رَفَع صوتو و قال ليهُم: ”يا رُجال اليَهود، و القَاعِدين في أُورُشَلِيم كُلُّكُم، أسمَعو كَلامي، و خَلّيني أوَرّي ليكُم مَعنى الكَلام دا.

¹⁵ عَشان النّاس ديل ما سَكرانين زي ما إنتو تَفتَكِرو. هَسَّع السّاعَه تِسعَه في الصَّباح بَس!

¹⁶ لَكِن دا هو القالو النَّبي يوئيل:

¹⁷ الله بِقول، في الأيام الأخيرَه، أنا بَكُب روحي عَلى كُل النّاس. و أولادكُم و بَناتكُم بِتنَبّو، و شَبابكُم بِشوفو رؤيا، و شُيوخكُم بِيَحلَمو.

¹⁸ و في الأيام ديلاك أنا بَكُب روحي عَلى خَدّاميني، رُجال و نِسوان، و هُم بِتنَبّو.

¹⁹ و أنا بَوَرّي عَجايِب في السَّما فوق و عَلامات عَلى الأرض تِحِت، دَم و نار و دُخان.

²⁰ الشَّمِش بِتِتغَيَّر لِلضُّلُمَّه، و القَمَر بِبقى زي دَم قُبّال ما بِجي يوم الرَّب، اليوم الكَبير و المَعروف.

²¹ و كُلّو واحِد الِبِنادي بِإسم الرَّب بِكون مُخَلَّص.

²² يا رُجال إِسْرَائِيل، أسمَعو الكِلمات دي: يَسُوع النّاصِري، هو راجِل، مَقبول عِند الله. و بيهو الله عَمَل قُوّات و عَجايِب و عَلامات بينكُم زي ما إنتو بِتَعرِفو.

²³ يَسُوع دا كان مُسَلَّم ليكُم بِتَرتيب الله الثّابِت و مَعرِفتو مِن قُبّال. و إنتو صَلَبتوهو و كَتَلتوهو بِإيدين النّاس البَطّالين.

²⁴ لَكِن الله قَوَّمو مِن بين المَيِّتين و فَكَّ ليهو أوجاع الموت، عَلَشان ما كان مُمكِن لِلموت أن يَمسِكو.

²⁵ عَشان دَاوُد قال بِخُصوصو: كُنتَ بَشوف الرَّب قِدامي دايماً، و عَلَشان هو عَلى يَميني، أنا ما بَتحَرَّك.

²⁶ عَلَشان كِدا، قَلبي فَرحان و لِساني مَبسوط. و جِسمي كَمان بِعِيش عَلى الرَّجاء.

²⁷ عَلَشان إنتَ ما بِتخَلّي نَفسي في الهاويَه، ولّا تَخَلّي قُدّوسَك يَرجَع لِلتُّراب.

²⁸ إنتَ وَرّيتني سِكَك الحَياة، و بِتَملاني فَرَح مَعاك.

²⁹ يا أخوان، خَلّيني أقول ليكُم بِسُلطَه عَن أبونا الكَبير دَاوُد. هو مات، و دَفَنوهو. و قَبرو في هِنا لِغايَة اليوم دا.

³⁰ لَكِن هو كان نَبي، و عِرِف الله قال ليهو بِحَلَف إنّو بِخُت عَلى كُرسيهو واحِد مِن أولادو.

³¹ دَاوُد شاف الماشي يَسَوّيهو الله، و عَلَشان كِدا، هو إتكَلَّم عَن قيامَة المَسيح إنّو ما خَلّاهو في الهاويَه، و جِسمو ما رَجَع لِلتُّراب.

³² و الله قَوَّم يَسُوع دا، و نِحنا كُلُّنا شاهِدين بِالحَقيقَه دي.

³³ عَلَشان كِدا، هو كان مَرفوع بِيَمين الله، و أخَد مِن الأبو الرّوح القُدُس الوَعَد بيهو، و كَبَّ دا، الهَسَّع بِتشوفو و بِتسمَعوهو.

³⁴ عَشان دَاوُد ما طَلَع فوق لِلسَّما، و لَكِن هو نَفسو قال: الرَّب قال لِرَبّي، أقعُد عَن يَميني،

³⁵ حَتّى أعمِل عُدوانَك بَمبَر لِرِجلينَك.

³⁶ عَلَشان كِدا، خَلّي كُلّو أهل بيت إِسْرَائِيل يَعرِف بِالحَق أن الله عَمَل يَسُوع دا، الإنتو صَلَبتوهو، رَب و مَسيح.“

³⁷ و لَمَّن النّاس سِمِعو دا، إتحَيَّرو في قُلوبُم كَتير خَلاص، و قالو لِبُطْرُس و لِلرُّسُل التّانيين: ”بِنَعمِل شِنو، يا أخوان؟“

³⁸ و بُطْرُس قال ليهُم: ”توبو و إتعَمَّدو كُلّو واحِد مِنَّكُم بِإسم يَسُوع المَسيح لِغُفران خَطاياكُم، و بِتاخُدو هَديَّة الرّوح القُدُس.

³⁹ عَشان ليكُم الوَعَد، و لِأولادكُم و لِكُل النّاس البَعيدين، لِكُلُّهُم البِناديهُم الرَّب إلَهنا.“

⁴⁰ و بِكِلمات تانيَه كَتيرَه، بُطْرُس كان بِهَظِّرُم و بِبَشِّرُم و قال: ”أخلَصو مِن ناس الزَّمَن دا البَطّالين.“

⁴¹ و القِبلو كَلامو إتعَمَّدو، و إتلَمّو عَليهُم في اليوم داك تَلاتَة آلاف نَفَر تَقريباً.

⁴² و كانو بِستَمِرّو في تَعليم الرُّسُل و الشَّرِكَه و كَسر العيش و الصَّلاه.

⁴³ و الخوف وَقَع عَلى كُلّو نَفس، و الرُّسُل عَمَلو عَجايِب و عَلامات كَتيرَه.

⁴⁴ و كُل المؤمِنين كانو سَوا، و كانو عِندَهُم كُل الحاجات بِتاعَتُم في مَحَل واحِد.

⁴⁵ و كانو بِبيعو حاجاتُم و بُضاعَتُم و بِقسِموهُم بين كُلُّهُم، لِأي واحِد زي ما هو كان مُحتاج.

⁴⁶ و كُلّو يوم كانو بِستَمِرّو يِتلَمّو في الهيكَل و بِكَسِّرو العيش في البُيوت، و بياكلو مَعَ بَعض بِفَرَح و قُلوب مُخلِصين.

⁴⁷ و كانو يَحمَدو الله و يَلقو نِعمَه قِدّام كُل النّاس. و الرَّب جَمَع لِلكَنيسَه كُلّو يوم الكانو بِخلَصو.