أعمال الرُّسُل 19 - كِتاب العَهد الجَّديد مِن الكِتاب المُقَدَّس

بُولُس في أفَسُس

¹ و حَصَل لَمّا أَبُلُّوس كان في كُورِنْثُوس، بُولُس فات بِالمَحَلّات العاليَه و جا لِأفَسُس. و هِناك لِقى بَعض مِن التَّلاميذ.

² و قال ليهُم: ”قِبِلتو الرّوح القُدُس لَمّا آمَنتو؟“ و قالو ليهو: ”و لا سِمِعنا في الرّوح القُدُس.“

³ و بُولُس قال: ”إتعَمَّدتو بِشِنو؟“ هُم قالو: ”بِمَعموديَّة يُوحَنَّا.“

⁴ و بُولُس قال: ”يُوحَنَّا عَمَّد بِمَعموديَّة التّوبَه، و كَلَّم النّاس عَشان يآمِنو بِالبِجي بَعدو، يَعني بِيَسُوع.“

⁵ و لَمّا سِمِعو، إتعَمَّدو بِإسم الرَّب يَسُوع.

⁶ و لَمّا بُولُس خَتَّ إيدينو فوقُم، الرّوح القُدُس جا عَليهُم، و إتكَلَّمو بِلُغات و إتنَبّو.

⁷ و كُلُّهُم كانو إتناشَر راجِل تَقريباً.

⁸ و بُولُس دَخَل بيت الرَّب. و كان بِتكَلَّم بِدون خوف مُدَّة تلاتَه شُهور، يِتفاكَر و يَرَضّي عَن حاجات مَلَكوت الله.

⁹ و بَعض مِنَّهُم، روسينُم بِقو قَوّيين و أبو يآمِنو، و شَتَمو الطَّرِيق قِدّام النّاس. عَلَشان كِدا، بُولُس خَلّاهُم و أخَد التَّلاميذ مَعاهو. و كان بِتكَلَّم مَعاهُم كُلّو يوم في مَدرَسَة تِيرَانُّوس.

¹⁰ و إستَمَرَّ كِدا لِمُدَّة سَنَتين، لِغايَة كُل السّاكنين في آسيا مِن يَهود و ناس إغريقيين سِمِعو كِلمَة الرَّب.

¹¹ و الله عَمَل بِإيدين بُولُس عَجايِب مَخصوص،

¹² حَتّى كانو ياخُدو لِلعَيّانين مَناديل و مَريَلات مِن جِسمو. و هُم بِقو طَيبين مِن أمراضُم، و الأرواح الشَّرّيرَه مَرَقو مِنَّهُم.

¹³ و بَعض مِن اليَهود، السّافَرو مِن مَكان لِمَكان يَطرودو أرواح شَرّيرَه، جَرَّبو يَنادو بِإسِم الرَّب يَسُوع عَلى العِندَهُم أرواح شَرّيرَه. و كانو بِقولو: ”آمُركُم بِيَسُوع البِبَشِّر بيهو بُولُس، أطلَعو.“

¹⁴ و سَبعَه أولاد لِيَهودي، رَئيس قُسُس، إسمو سَكَاوَا، كانو بيَعمِلو داك.

¹⁵ و الرّوح الشَّرّير رَدَّ عَليهُم و قال: ”أنا بَعرِف يَسُوع و بَعرِف بُولُس، لَكِن إنتو، مِنو إنتو؟“

¹⁶ و بَعَد دا، الرّاجِل الكان عِندو الرّوح الشَّرّير، نَطَّ عَليهُم، و غَلَبُم، و ضَرَبُم لِغايَة ما جَرو مِن البيت دا عَريانين و مَجروحين.

¹⁷ و دا بِقى مَعروف لِكُل اليَهود و ناس إغريقيين السّاكنين في أفَسُس. و كُلُّهُم خافو، و مَجَّدو إسم الرَّب يَسُوع.

¹⁸ و كَتيرين مِن الآمَنو كانو بِجو، و يَعتَرِفو و يَخَبِّرو بِأعمالُم.

¹⁹ و كَتيرين مِن الإشتَغَلو بِالسِّحِر، جَمَعو الكُتُب و حَرَقوها قِدّام النّاس. و لَمّا حَسبو التَّمَن، لِقو الجُّملَه خَمسين ألف حِتَّت مِن الفِضَّه.

²⁰ و كِدا كِلمَة الرَّب كانَت تَزيد و تَشَدِّد جِدّاً.

²¹ و لَمّا الحاجات دي تَمَّت، بُولُس قَرَّر بِروحو أن يَمشي لِأُورُشَلِيم بَعَد ما مَرَّ بِمَكِدونيَّه و أَخَائِيَه. و قال: ”بَعَد ما أمشي هِناك، لازِم أشوف رُومِيَه كَمان.“

²² و رَسَّل لِمَكِدونيَّه إتنين مِن الكانو بِخدِموهو، تِيمُوثَاوُس و أَرَسْطُوس. و هو إستَنّى وَكِت زِيادَه في آسيا.

دَوشَه كَبيرَه في أفَسُس

²³ و حَصَل في الوَكِت داك، دَوشَه كَبيرَه عَن الطَّريق.

²⁴ عَشان كان في راجِل إسمو دِيمِتْرِيُوس، صايِغ البِسَوّي بُيوت صُغار مِن فِضَّه لِأَرْطَامِيس، و جاب شُغل كَتير لِلصّانعين.

²⁵ و هو لَمّاهُم مَعَ الشَّغّالين في عَمَل زي دا، و قال: ”يا رُجال، إنتو بِتَعرِفو نِحنا عِندَنا غِنى مِن الصِّنعَه دي.

²⁶ و إنتو تَشوفو و تَسمَعو في أفَسُس و كُلّو آسيا تَقريباً، بُولُس دا عَلَّم ناس كُتار حَتّى ضَلّو. و يَقول المَعمولَه بِالإيدين ما آلِهَه أبَداً.

²⁷ و في خَطَر لِصِنعَتنا تَكون عِندَها إسم بَطّال. و كَمان بيت أَرْطَامِيس الإلَه العَظيمَه في خَطَر يَحسِبوها و لا حاجَه. و هي بِتَقَع مِن مَجدا، و النّاس بِيَعبُدوها في آسيا و كُل الدُّنيا.“

²⁸ و لَمّا سِمِعو دا، بِقو مَليانين بِالزَّعل، و إبتَدو يَكورِكو و يَقولو: ”عَظيمَه هي أَرْطَامِيس بِتاعَت أفَسُس.“

²⁹ و المَدينَه إتمَلَت دَوشَه. و كُلُّهُم جَرو مَعَ بَعض لِمَحَل اللِعب، و قَبَضو غَايُوس و وَأَرِسْتَرْخُس مِن مَكِدونيَّه، صاحِبين بُولُس في السَّفَر.

³⁰ و لَمّا بُولُس كان عاوِز يَدخُل بين النّاس، الأخوان ما خَلّوهو يَدخُل.

³¹ و بَعض أصحابو مِن المَعروفين في آسيا، رَسَّلو ليهو يَطلُبو ليهو ما يَخاطِر بِنَفسو بِدُخول المَلعَب.

³² و كان البَعض يَكورِكو بِشي، و البَعض التّاني بِشي. عَلَشان الإجتِماع كان مَلَخبَط. أكتَر النّاس ما عِرفو لِشِنو إتلَمّو.

³³ و بَعض مِن النّاس أشَّر لِإِسْكَنْدَر عَشان يتكَلَّم، و اليَهود دَفَعوهو لِقِدّام. و إِسْكَنْدَر أشَّر بِإيدو هو داير يتكَلَّم عَشان نَفسو قِدّام النّاس.

³⁴ و لَمّا عِرفو هو يَهودي، كُلُّهُم كورَكو بِصوت واحِد ساعتين تَقريباً: ”عَظيمَه هي أَرْطَامِيس بِتاعَت أفَسُس!“

³⁵ و لكِن كاتِب المَدينَه سَكَّت النّاس و قال: ”يا رُجال أفَسُس، كُل الدُّنيا ما بِتَعرِف مَدينَة ناس أفَسُس، هي بِتَحرَس بيت أَرْطَامِيس العَظيمَه؟ و بِتَحرَس الصَّنَم النَزَل مِن السَّما.

³⁶ و ما في زول يَقدَر يَنكُر الحَقيقَه دي. عَلَشان كِدا، لازِم تَسكُتو، و ما تَعمِلو شي بِدون فِكر.

³⁷ عَشان إنتو جِبتو الراجلين ديل، و هُم ما سَرقو بُيوت الآلِهَه، و لا يَجَدِّفو عَلى آلِهَتنا.

³⁸ إذا دِيمِتْرِيُوس و الصّانعين المَعاهو عِندَهُم شَكوى عَلى واحِد، المَحكَمات مَفتوحَه، و في سَلاطين. خَلّوهُم يَشتَكو بَعضَهُم عَلى بَعض.

³⁹ و إذا تَطلُبو حاجَه تانيَه، لازِم يَعمِلوهو في مَجلِس قانوني.

⁴⁰ عَشان نِحنا في خَطَر بِشتَكونا بِفِتنَه فِشان الحَصَل اللّيلَه. و ما في سَبَب بيهو نَقدَر نَدّي حِساب عَن الدَوشَه دي.“

⁴¹ و لَمّا قال كِدا، هو خَلّى ناس الإجتِماع يَمشو.