أعمال الرُّسُل 18 - كِتاب العَهد الجَّديد مِن الكِتاب المُقَدَّس

في كُورِنْثُوس

¹ و بَعَد دا، بُولُس مَشى مِن أَثِينَا و جا لِكُورِنْثُوس.

² و لِقى يَهودي إسمو أَكِيلَا، بُنْطي الجِّنس. و هو كان جا في وَكِت قَريب مِن إِيطَالِيَه مَعَ بِرِيسْكِلا، مَرَتو. عَلَشان كُلُودِيُوس كان أمَر كُل اليَهود يَمشو مِن رُومِيَه. و بُولُس جا ليهُم.

³ و فِشان كان مِن نَفس الشُّغل زيَهُم، قَعَد مَعاهُم يَشتَغِل مَعاهُم. و هُم كانو بيَعمِلو خيام.

⁴ و هو كان بِتكَلَّم في بيت الرَّب كُلّو سَبِت، و يَرَضّي اليَهود و ناس إغريقيين.

⁵ و لَمّا سِيلَا و تِيمُوثَاوُس جو مِن مَكِدونيَّه، بُولُس أدّا نَفسو عَشان يَبَشِّر بَس، و يَشهَد لِليَهود يَسُوع هو المَسيح.

⁶ لَكِن لَمّا اليَهود كانو بِقاوِمو و بِشتِموهو، بُولُس هَز هِدومو و قال ليهُم: ”دَمّكُم عَلى روسينكُم! أنا بِدون ذَنب. و مِن هَسَّع بَمشي لِلأُمَم.“

⁷ و مَرَق مِن بيت الرَّب، و جا لِبيت راجِل بِخاف الله، إسمو تِيطُس يُسْتُس. و بيتو كان جَنب بيت الرَّب.

⁸ و كِرِيسْبُس، رَئيس بيت الرَّب، آمَن بالرَب مَعَ كُلّو ناس بيتو. و كَتيرين مِن الكُورِنْثُوس السِّمِعو، آمَنو و إتعَمَّدو.

⁹ و الرَّب قال لِبُولُس في الرّؤيَه في اللّيل: ”ما تَخاف، لَكِن إتكَلَّم و ما تَسكُت.

¹⁰ عَشان أنا مَعاك، و واحِد ما بِخُت إيدو عَليك عَشان يَضُرَّك. عَلَشان أنا عِندي ناس كُتار في المَدينَه دي.“

¹¹ و بُولُس قَعَد سَنَه و سِتَّه شُهور بِعَلِّم كِلمَة الله بِينُم.

¹² و لَمّا كان غَالِيُون مُدير أَخَائِيَه، اليَهود قامو بِنَفس واحدَه عَلى بُولُس، و جابوهو لِلمَحكَمَه.

¹³ و قالو: ”الرّاجِل دا يِترَجّى النّاس حَتّى يَعبُدو الله بِعَكس القانون.“

¹⁴ و لَمّا بُولُس كان داير يَفتَح خَشمو، غَالِيُون قال لِليَهود: ”لَو كان في الشّي دا ظُلم ولّا ذَنب بَطّال، كُنتَ بِالحَق إتحَمَّلكُم، يا يَهود.

¹⁵ و لَكِن إذا كان سؤَال عَن كِلمات و أسامي و عَن قانونكُم، شوفوها إنتو. أنا ما داير أكون قاضي في الحاجات دي.“

¹⁶ و كِدا طَرَدُم مِن المَحكَمَه.

¹⁷ و كُلُّهُم مَسَكو سُوسْتَانِيس، رَئيس بيت الرَّب، و ضَرَبوهو قِدّام المَحكَمَه. و غَالِيُون ما خَلّى بالو لِداك كُلّو كُلّو.

بِرِيسْكِلَّا، أَكِيلَا، و أَبُلُّوس

¹⁸ و بُولُس قَعَد هِناك أيام كَتيرَه. و بَعَد دا، قال ليهُم مَعَ السَّلامَه، و سافَر بِمُركَب لِسُورِيَّه، و أخَد مَعاهو بِرِيسْكِلَّا و أَكِيلَا. و بُولُس كان حَلَق رَاسو في كَنْخِرِيَا، عَلَشان كان عَليهو وَعَد.

¹⁹ و وِصلو لِأفَسُس، و بُولُس خَلّاهُم الإتنين هِناك، و دَخَل بيت الرَّب و عَلَّم اليَهود.

²⁰ و لَمّا طَلَبو مِنّو يَقعُد وَكِت زِيادَه، ما كان داير.

²¹ لَكِن لَمّا خَلّاهُم، هو قال: ”بَرجَع ليكُم إن شاء الله.“ و بَعَد دا، سافَر بِمُركَب مِن أفَسُس.

²² و لَمّا نَزَل في قَيْصَرِيَّه، طَلَع و سَلّم عَلى الكَنيسَه. و بَعَد دا نَزَل لِأَنْطَاكِيَه.

²³ و بَعَد ما إستَنّى مُدَّه في أَنْطَاكِيَه، مَرَق و مَرَّه بِالتَّرتيب بِمَحَلّات غَلَاطِيَّه و فَرِيجِيَّه يَشَدِّد كُل التَّلاميذ.

²⁴ و في الزَّمَن دا، يَهودي إسمو أَبُلُّوس مِن ناس الإسكَندَريَّه جا لِأفَسُس. و هو راجِل عِندو قُدرَه في الكَلام و في الكُتُب.

²⁵ و هو كان مِتعَلِّم في طَريق الرَّب. و عَلَشانو حار في الرّوح، كان بِتكَلَّم و بِعَلِّم بِالظَّبط الحاجات عَن يَسُوع. و هو ما يَعرِف إلّا مَعموديَّة يُوحَنَّا.

²⁶ و إبتَدا يتكَلَّم بِدون خوف في بيت الرَّب. و لَمّا بِرِيسْكِلَّا و أَكِيلَا سِمِعوهو، أخَدوهو ليهُم، و وَرّوهو طَريق الله تَمام.

²⁷ و لَمّا كان عاوِز يَمشي لِأَخَائِيَه، الأخوان شَجَّعوهو عَلى دا، و كَتَبو لِلتَّلاميذ هِناك عَشان يَقبَلوهو. و لَمّا وِصِل، ساعَد كَتير ديل البِالنِّعمَه كانو آمَنو.

²⁸ و بِقُوَّه كان بِغلِب اليَهود قِدّام النّاس، و يَبَيِّن بِالكُتُب يَسُوع هو المَسيح.