أعمال الرُّسُل 17 - كِتاب العَهد الجَّديد مِن الكِتاب المُقَدَّس

في تَسَالُونِيكِي

¹ و بَعَد ما مَرّو بِأَمْفِيبُولِيس و أَبُولُونِيَّه، جو لِتَسَالُونِيكِي. و كان فيها بيت الرَّب اليَهودي.

² و بُولُس دَخَل بيت الرَّب حَسَب عادَتو، و كان بِتكَلَّم مَعاهُم بِبيِّنات مِن الكُتُب تلاتَه سُبوت.

³ و يَوَرّيهُم، و يَثَبِّت إنّو المَسيح كان لازِم يِتوَجَّع، و يَقوم مِن بين المَيِّتين. و قال: ”يَسُوع دا، الأنا بَبَشِّركُم بيهو، هو المَسيح.“

⁴ و بَعَض مِنَّهُم قِبِلو الكِلمَه، و جَمَعو لِبُولُس و سِيلَا. و كَمان ناس كُتار عَمَلو زي دا مِن ناس إغريقيين البِخافو، و العَدَد ما كان صَغَيِر مِن النِّسوان كَمان.

⁵ و اليَهود حَسَدو، و اَخَدو رُجال بَطّالين مِن ناس السّوق، و لَمّو ناس كُتار، و عَمَلو دَوشَه في المَدينَه. و جَرو لِبيت ياسون، و طَلَبو يَطَلِّعوهُم لِلنّاس.

⁶ و لَمّا ما لِقوهُم، جَرّو ياسون و بَعَض الأخوان لِسَلاطين المَدينَه، و هُم يَكورِكو: ”ديل القَلَبو الدُّنيا، جو هِنا كَمان.

⁷ و ياسون قِبِلُم في بيتو. و ديل كُلُّهُم يَعمِلو الشّي اليَقاوِم قَوانين قَيصَر، عَشان يَقولو في مَلِك تاني، هو يَسُوع.“

⁸ و حَصَلَت دَوشَه في النّاس و سَلاطين المَدينَه لَمّا سِمِعو الكَلام دا.

⁹ و لَمّا اَخَدو ضَمانَه مِن ياسون و مِن التّانيين، خَلّوهُم يَمشو.

في بيريَّه

¹⁰ و طَوّالي، الأخوان رَسَّلو بُولُس و سِيلَا بِاللّيل لِبيريَّه. و هُم، لَمّا وِصلو، دَخَلو بيت الرَّب اليَهودي.

¹¹ و ديل كانو أفضَل مِن الفي تَسَالُونِيكِي، عَشان قِبلو الكِلمَه بِكُلّو نَشاط. و كانو كُلّو يوم بِفَتِّشو الكُتُب عَشان يَشوفو إذا الحاجات دي صَحَيحَه.

¹² و كَتيرين مِنَّهُم آمَنو، و كَمان عَدَد ما قَليل مِن ناس إغريقيين، مِن النِّسوان المُحتَرَمات و مِن الرُّجال.

¹³ و لَمّا اليَهود الفي تَسَالُونِيكِي عِرفو بُولُس بَشَّر بِكِلمَة الله في بيريَّه كَمان، هُم جو لِهِناك يَحَرِّكو النّاس و يَلَخبِتوهُم.

¹⁴ و بِسُرعَه، الأخوان رَسَّلو بُولُس عَشان يَمشي لِطَرَف البَحَر. لَكِن سِيلَا و تِيمُوثَاوُس قَعَدو في بيريَّه.

¹⁵ و الرُّجال المَشو مَعَ بُولُس، جابوهو لِأَثِينَا. و هُم مَشو بَعَد ما اَخَدو أمر مِنّو لِسِيلَا و تِيمُوثَاوُس عَشان يَجو ليهو أوَّل ما مُمكِن.

في أَثِينَا

¹⁶ و وَكِت ما بُولُس كان يِستَنّى ليهُم في أَثِينَا، زِعِل في روحو لَمّا شاف المَدينَه مَليانَه بِأصنام.

¹⁷ و كان بِخَبِّر اليَهود و النّاس البِخافو، في بيت الرَّب، و النّاس الهو قابِلُم في السّوق كُلّو يوم.

¹⁸ و بَعض مِن النّاس مِن المِتعَلِّمين قابَلوهو، الأَبِيكُورِيِّين و الرِّوَاقِيِّين. و بَعض مِنَّهُم قالو: ”الغَلَباوي دا عاوِز يَقول شِنو؟“ و تانيين قالو: ”يَظهَر إنّو يَنادي بِآلِهَه غَريبَه.“ و قالو كِدا عَلَشانو كان بِبَشِّر بِيَسُوع و القيامَه.

¹⁹ و أخَدوهو و جابوهو لِأريوس باغوس و قالو: ”مُمكِن نَعرِف التَّعليم الجَّديد دا شِنو، الأنتَ تِتكَلَّم بيهو؟

²⁰ إنتَ تَجيب لِإضنينّا أفكار غَريبَه، و عاوزين نَعرِف مَعناها شِنو.“

²¹ و كانو ناس أَثِينَا كُلُّهُم و الغَريبين السّاكنين بِينُم بِصرُفو كُلّو وَكتُم في حاجَه واحدَه بَس، و دي عَشان يِتكَلَّمو ولّا يَسمَعو شي جَديد.

²² و بُولُس وَقَف في وَسط الأريوس باغوس و قال: ”يا رُجال أَثِينَا، بَشوف في كُلّو حاجَه إنتو ناس شُداد في دينكُم.

²³ و وَكِت ما كُنتَ بَطوف و بَشوف مَحَلّات الضَّبيحَه بِتاعَتكُم، لِقيت كَمان مَضبَح مَكتوب فوقو: لِإلَه ما مَعروف. و داك البِتَعبُدوهو بِدون مَعرِفَه، أنا هَسَّع بَبَشِّركُم بيهو.

²⁴ الله الخَلَق الدُّنيا و كُل الفيها، هو رَب السَّما و الأرض. و هو ما يَسكُن في هياكِل مَعمولَه بِالإيدين.

²⁵ و إيدين الزّول ما بِتَخدِمو زي ما هو مُحتاج لِحاجَه، عَلَشان هو البِدّي لِكُل النّاس حَياة و نَفس و كُلّو شي.

²⁶ و هو عَمَل مِن إنسان واحِد كُلّو أُمَّه مِن النّاس، عَشان يَسكُنو فوق كُل الأرض. هو إختار الزَّمَن المَجَهَّز ليهُم، و أطراف مَحَلّاتُم عَشان يَسكُنو فيها.

²⁷ و الله عَمَل دا عَلَشانُم يَطلُبوهو، و يِمكِن يَمِدّو ليهو إيدينُم و يَلقوهو. و لَو هو ما بَعيد مِن كُلّو واحِد مِنَّنا.

²⁸ و نِحنا بيهو نَعيش، و نِتحَرَّك، و نَكون مَوجودين. زي ما بَعض مِن غَنّاينكُم قالو: نِحنا نَسلو.

²⁹ و عَلَشان نِحنا نَسل الله، ما نَفتَكِر طَبيعَة الله زي الدَّهَب ولّا الفِضَّه ولّا الحَجَر المَنقوش بِصورَة شُغل الزّول و شَطارتو.

³⁰ و الله، في الزَّمَن الفات، مَرَّه عَليهُم، عَشان ما في مَعرِفَه. لَكِن هَسَّع هو يأمُر كُل النّاس في كُلّو مَحَل أن يَتوبو.

³¹ عَشانو إختار يوم فيهو بِيَحكُم عَلى الدُّنيا بِالعَدل بِالإنسان الجَّهَّزو. و أدّا لِلكُل بيّنَه، لَمّا قَوَّمو مِن بين المَيِّتين.“

³² و لَمّا سِمِعو عَن القيامَه مِن بين المَيِّتين، بَعض مِنَّهُم ضِحِكو عَليهو. و تانيين قالو: ”بِنَسمَع مِنَّك عَن دا مَرَّه تانيَه.“

³³ و كِدا، بُولُس مَرَّق مِن بِينُم.

³⁴ و لَكِن بَعض مِن النّاس إستَنّو مَعاهو و آمَنو، مِنَّهُم دِيُونِيسِيُوس مِن الأَرْيُوبَاغُوس، و مَرَه إسِما دَامَرِس، و تانيين مَعاهُم.