أعمال الرُّسُل 16 - كِتاب العَهد الجَّديد مِن الكِتاب المُقَدَّس

رؤيا بُولُس في تَرُوَاس

¹ و بُولُس جا لِدَربَه و لِسترَه. و كان هِناك تِلميذ إسمو تِيمُوثَاوُس، وَلَد مَرَه يَهُودِيَّه، مِآمِنَه، و لَكِن أبوهو كان إغريقي.

² و الأخوان الفي لِسترَه و إِيْقُونِيَه كانو يَقولو تِيمُوثَاوُس شاب طَيب.

³ و بُولُس كان داير ياخُدو مَعاهو في السَّفَر. و فِشان كِدا، طَهَّرو عَلَشان اليَهود الفي المَحَلّات ديك، عَشان كُلُّهُم كانو بِعرِفو أبوهو إغريقي.

⁴ و هُم كانو بِسافِرو مِن بَلَد لِبَلَد. و كانو بِسَلِّموهُم الأوامِر الجَهَّزوها الرُّسُل و الشُّيوخ الفي أُورُشَلِيم عَشان يَحفَظوها.

⁵ و الكَنايس كانو بِشَدِّدو في الإيمان، و بِزيدو في العَدَد كُلّو يوم.

⁶ و بَعَد ما مَرّو بِفِرِيجِيَّه و مَحَلّات غَلَاطِيَّه، الرّوح القُدُس ما خَلّاهُم يِتكَلَّمو بِالكِلمَه في آسيا.

⁷ و لَمّا جو لِميسيّا، جَرَّبو يَمشو لِبِثِنيَّه. و الرّوح ما خَلّاهُم.

⁸ عَلَشان كِدا، فاتو عَلى ميسيّا، و نَزَلو لِتَرُوَاس.

⁹ و في اللّيل، ظَهَرَت لِبُولُس رؤيا. كان في راجِل مِن مَكِدونيَّه واقِف، يَطلُب ليهو و يَقول:

¹⁰ ”تَعال لِمَكِدونيَّه و ساعِدنا.“ و طَوّالي لَمّا بُولُس شاف الرّؤيَه، طَلَبنا نَمشي لِمَكِدونيَّه عَشان إتأكَّدنا أن الرَّب نادانا لِنَبَشِّرُم.

¹¹ و سافَرنا في البَحَر مِن تَرُوَاس، و مَشينا في سِكَّه عَديلَه لِسَامُوثْرَاكِي، و اليوم البَعدو لِنِيَابُولِيس.

¹² و مِن هِناك لِفيلِبّي، و هي أوَّل مَدينَه في مُديريَّة مَكِدونيَّه و كولونيَّه رومانيَّه. و إستَنّينا في المَدينَه دي أيام قَليلَه.

¹³ و في يوم السَّبِت، مَرَقنا بَرَّه مِن باب المَدينَه لِلبَحَر، لِمَكان إفتَكَرنا فيهو مَحَل لِلصَّلاه. و قَعَدنا و كَلَّمنا النِّسوان الإتلَمّو هِناك.

¹⁴ و كانَت في مَرَه بِتَسمَعنا إسِما لِيدِيَّه البِتبيع قُماش بَنَفسَجي، مِن مَدينَه ثَيَاتِيرَا، و بِتخاف الله. و الرَّب فَتَح قَلبا عَشان تَخَلّي بالا لِلبِقولو بُولُس.

¹⁵ و لَمّا إتعَمَّدَت، هي و ناس بيتا، سألَتنا و قالَت: ”إذا حَكَمتو أنا مِآمِنَه بِالرَّب، أدخُلو بيتي و أقعُدو فيهو.“ و سألَتنا كَتير، و قَعَدنا مَعاها.

بُولُس و سِيلَا في السِّجِن في فيلِبّي

¹⁶ و حَصَل وَكِت ما نِحنا كُنّا ماشين لِمَكان الصَّلاه، قابَلتنا خَدّامَه بِتَعمِل حاجات بِالسِّحِر. و كانَت بِتجيب لِأسيادا قُروش كَتيرَه بِالسِّحِر بِتِاعا.

¹⁷ و هي مَشَت وَرا بُولُس و الكانو مَعاهو، و كُورَكَت و قالَت: ”الرُّجال ديل، هُم خَدّامين الله العالي، و يَبَشِّروكُم بِطَريق الخَلاص.“

¹⁸ و هي عَمَلَت كِدا أيام كَتيرَه، حَتّى بُولُس تِعِب كَتير مِن دا، و إتلَفَت و قال لِلرّوح: ”أنا آمُرَك بِإسم يَسُوع المَسيح، أمرُق مِنَّها.“ و مَرَق في الدَّقيقَه ديك.

¹⁹ و وَكِت أسيادا شافو ما قِدرو يَكسِبو قُروش مِنَّها بَعَد دا، قَبَضو عَلى بُولُس و سِيلَا، و جَرّوهُم لِلسّوق قِدّام الحُكّام.

²⁰ و جابوهُم لِلقُضاة و قالو: ”الرّاجلين ديل مِن ناس اليَهود. و هُم يَلَخبِتو بَلَدنا.

²¹ و يَعَلِّمو بِعادات ما بِالقانون عَشان نَقبَلا و نَعمِلا، عَشان نِحنا ناس رومانيين.“

²² و النّاس قامو عَليهُم. و القُضاة أمَرو عَشان يَقلَعو مِنَّهُم هِدُومُم، و يَضرُبوهُم بِالعَصايات.

²³ و لَمّا ضَرَبوهُم ضَرَبات كَتيرَه، رَموهُم في السِّجِن. و أمَرو السَّجّان يَحرِسُم بِالتَّمام.

²⁴ و هو، عَشان قِبِل أمر زي دا، خَتّاهُم في السِّجِن الفي جُوَّه، و رَبَط كِرعينُم بِخَشَب مَقدود.

²⁵ و في نُص اللّيل تَقريباً، بُولُس و سِيلَا كانو يَصَلّو و يَرَتِّلو لِلَّه، و المَحبوسين يَسمَعوهُم.

²⁶ و حَصَلَت عَلى غَفلَه زَلزَلَه شَديدَه، حَتّى أساسات السِّجِن هَزّو. و طَوّالي كُلّو أبواب السِّجِن إنفَتَحو، و جَنازِير كُلُّهُم إتفَكّو.

²⁷ و لَمّا السَّجّان قام مِن النّوم، و شاف أبواب السِّجِن مَفتوحَه، هو طَلَّع سيفو و كان عاوِز يَكتُل نَفسو، فِشان إفتَكَر كُل المَحبوسين هَرَبو.

²⁸ لَكِن بُولُس ناداهو بِصوت عالي و قال: ”ما تَعمِل لِنَفسَك حاجَه بَطّالَه. كُلُّنا في هِنا.“

²⁹ و طَلَب فانوس، و جَرى لِجُوَّه، و وَقَع قِدّام بُولُس و سِيلَا و هو يَرجِف مِن الخوف.

³⁰ و بَعَد دا، مَرَّقُم و قال: ”يا أسيادي، أسَوّي شِنو عَشان أكون مُخَلَّص؟“

³¹ و قالو: ”آمِن بِالرَّب يَسُوع، و بِتَخلَص، إنتَ و أهل بيتَك.“

³² و كَلَّموهو و كُل الفي بيتو بِكِلمَة الرَّب.

³³ و أخَدُم في السّاعَه ديك مِن اللّيل، و غَسَّل جُروحُم. و إتعَمَّد طَوّالي، هو و كُلّو أهل بيتو.

³⁴ و أخَدُم لِبيتو و جاب ليهُم أكل. و إنبَسَط مَعَ كُلّو أهل بيتو عَشان كانو آمَنو بِالله.

³⁵ و لَمَّن جا النَّهار، القُضاة رَسَّلو الضُّبّاط يَقولو لِلسَّجّان: ”فِك الرّاجلين ديل.“

³⁶ و السَّجّان خَبَّر بُولُس بِالكَلام دا: ”القُضاة رَسَّلو عَشان يَفِكّوكُم. هَسَّع أمرُقو و أمشو بِسَلام.“

³⁷ و بُولُس قال ليهُم: ”ضَرَبونا قِدّام النّاس بِدون مُحاكَمَه، و نِحنا راجلين رومانيين. و رَمونا في السِّجِن. و هَسَّع يَفِكّونا بِالسِّر؟ لا! لَكِن خَلّوهُم نُفوسُم يَجو و ياخُدونا بَرَّه.“

³⁸ و الضُّبّاط خَبَّرو القُضاة بِالكَلام دا. و هُم خافو لَمّا سِمِعو هُم ناس رومانيين.

³⁹ و جو ليهُم و قالو: ”نِحنا مِتأسِّفين.“ و جابوهُم بَرَّه مِن السِّجِن، و سألوهُم يَمرُقو مِن المَدينَه.

⁴⁰ و لَمّا مَرَقو مِن السِّجِن، مَشو لِبيت لِيدِيَّه. و شافو الأخوان و شَجَّعوهُم. و بَعَد دا مَرَقو.