أعمال الرُّسُل 15 - كِتاب العَهد الجَّديد مِن الكِتاب المُقَدَّس

المَجلِس في أُورُشَلِيم

¹ و بَعض مِن الرُّجال نَزَلو مِن اليَهُودِيَّه لِأَنْطَاكِيَه، و كانو بِعَلِّمو الأخوان و يَقولو: ”إن كان ما تَكونو مُطَهَّرين حَسَب عادَة مُوسَى، ما بِتَقدَرو تَخلَصو.“

² و حَصَل لِبُولُس و بَرْنَابَا مُشاكَلَه و كَلام كَتير مَعاهُم. عَلَشان كِدا، إختارو بُولُس و بَرْنَابَا و ناس تانيين مِنَّهُم يَمشو لِأُورُشَلِيم لِلرُّسُل و الشُّيوخ فِشان السّؤَال دا.

³ و بَعَد ما الكَنيسَه رَسَّلُم، هُم سافَرو لِفِينِيقِيَه و السَّامِرَه، و كانو بِخَبِّرُم بِرُجوع الأُمَم. و كُل الأخوان فِرحو فَرَح عَظيم.

⁴ و لَمَّن وِصلو لِأُورُشَلِيم، الكَنيسَه و الرُّسُل و الشُّيوخ قابَلَتُم. و خَبَّروهُم بِكُل العَمَلو الله مَعاهُم.

⁵ لَكِن بَعض مِن المؤمِنين مِن حِزب الفَرِّيسِيِّين قامو و قالو: ”الأُمَم لازِم يَكونو مُطَهَّرين. و نَدّيهُم أمر أن يَحفَظو قانون مُوسَى.“

⁶ و الرُّسُل و الشُّيوخ إتلَمّو عَشان يَشوفو الحاجَه دي.

⁷ و بَعَد ما إتكَلَّمو كَتير، قام بُطْرُس و قال ليهُم: ”يا أخوان، إنتو بِتَعرِفو مِن زَمان، الله إختارني مِن بينكُم، عَشان الأُمَم يَسمَعو مِن خَشمي كِلمَة الإنجيل و يآمِنو.

⁸ و الله البِعرِف القُلوب، شِهِد ليهُم لَمَّن أدّاهُم الرّوح القُدُس زي ما أدّانا كَمان.

⁹ و هو ما عَمَل فارِق بينَنا و بِينُم، عَشان نَضَّف قُلوبُم بِالإيمان.

¹⁰ عَلَشان كِدا، لِشِنو تَجَرِّبو الله، و تَخُتّو نير عَلى رَقَبات التَّلاميذ؟ و النّير دا مُش أبَهاتنا و لا نِحنا قِدِرنا نَشيلو.

¹¹ لَكِنّا بِنِعمَة الرَّب يَسُوع المَسيح نآمِن عَشان نَخَلَص، زي ما هُم يَخلَصو كَمان.“

¹² و كُل النّاس سَكَتو، و كانو يَسمَعو لِبَرْنَابَا و بُولُس و هُم يَقولو ليهُم كُل العَمَلو الله بِإيديهُم مِن العَلامات و العَجايِب.

¹³ و بَعَد ما خَلَّصو كَلامُم، يَعْقُوب إتكَلَّم و قال: ”يا أخوان، أسمَعو لَي.

¹⁴ سِمْعَان خَبَّرنا كيف الله زار الأُمَم في الأوَّل، عَشان تاخُد مِنَّهُم ناس لِنَفسو.

¹⁵ و كِلمات الأنبياء تَتَّفِق مَعَ دا، زي ما هو مَكتوب:

¹⁶ بَرجَع بَعَد دا، و أبني خيمَة دَاوُد الوَقَعَت. و بَبني كَمان خَراباتو، و بَعمِلا جَديدَه مَرَّه تانيَه.

¹⁷ عَلَشان باقي النّاس التّانيين و كُل الأُمَم الاَخَدو إسمي عَليهُم، يَطلُبو الرَّب العامِل الحاجات دي، يَقول الرَّب.

¹⁸ و دي مَعروفَه قِدّامو مِن زَمان.

¹⁹ عَلَشان كِدا، فِكري أنا، ما نَخُت حِمِل تَقيل عَلى البِرجَعو لِلَّه مِن الأُمَم.

²⁰ لَكِن نَكتِب ليهُم عَشان يَرفُضو الضَّبَحوها لِلأصنام، و الزِّنا، و ما ياكلو اللَّحَم المِن بَهايِم مَخنوق، ولّا الدَّم.

²¹ عَشان مِن الزَّمَن القَديم، بِبَشِّرو بِمُوسَى في كُلّو مَدينَه، و بِقروهو في بُيوت الرَّب كُلّو سَبِت.“

جَواب المَجلِس لِلأخوان مِن الأُمَم

²² في الوَكِت دا، الرُّسُل و الشُّيوخ مَعَ كُل الكَنيسَه شافو إنّو كوَيس يَختارو مِنَّهُم راجلين، و يَرَسِّلوهُم لِأَنْطَاكِيَه مَعَ بُولُس و بَرْنَابَا. و إختارو يَهُوذَا الإسمو بَرسابا، و سِيلَا، راجلين مَعروفين بين الأخوان.

²³ و كَتَبو الجَّواب، و رَسَّلَوهو مَعاهُم. و الجَّواب قال: ”مِن الأخوان، الرُّسُل و الشُّيوخ لِلأخوان مِن الأُمَم في أَنْطَاكِيَه و سُورِيَّه و كِيلِيكِيَّا. نَسَلِّم عَليكُم.

²⁴ سِمِعنا بَعض النّاس مَرَقو مِنَّنا و حَرَّكوكُم و حَيَّرو نُفوسكُم بِكلماتُم. و نِحنا ما أمَرناهُم يَسَوّو كِدا.

²⁵ و كُلُّنا إتَّفَقنا نَختار راجلين، و نَرَسِّلوهُم ليكُم مَعَ حَبِيبنا بَرْنَابَا و بُولُس.

²⁶ و هُم راجلين خاطَرو بِحَياتُم فِشان إسِم رَبَّنا يَسُوع المَسيح.

²⁷ و فِشان كِدا، رَسَّلنا ليكُم يَهُوذَا و سِيلَا. و هُم بِخَبِّروكُم بِالحاجات دي بِكَلام الخَشم.

²⁸ و كان كوَيس لِلرّوح القُدُس و لينا، أن ما نَخُت عَليكُم حِمِل فوق الحاجات الجّايَه دي:

²⁹ و هي أن تَرفُضو الضَّبَحو لِلأصنام، و الدَّم، و اللَّحَم المِن بَهايِم مَخنوق، و الزِّنا. و إذا مَنَعتو نُفوسكُم مِن ديل، بِتَعمِلو كوَيس. مَعَ السَّلامَه.“

³⁰ و لَمّا رَسَّلوهُم، ديل مَرَقو لِأَنْطَاكِيَه و لَمّو النّاس، و سَلَّمو ليهُم الجَّواب.

³¹ و لَمّا النّاس قَروهو، هُم فِرحو بِالتَّعزيَه دي.

³² و يَهُوذَا و سِيلَا، و هُم كَمان كانو أنبياء، بِشَّرو الأخوان بِكَلام كَتير، و شَدَّدوهُم.

³³ و بَعَد ما إستَنّو هِناك وَكِت، الأخوان خَلّوهُم يَمشو بِسَلام لِلنّاس الرَّسَّلوهُم.

³⁴ و لَكِن سِيلَا إختار يِستَنّى هِناك.

³⁵ لَكِن بُولُس و بَرْنَابَا قَعَدو في أَنْطَاكِيَه بِعَلِّمو و بِبَشِّرو بِكِلمَة الرَّب مَعَ تانيين كَتيرين كَمان.

³⁶ و بَعَد وَكِت، بُولُس قال لِبَرْنَابَا: ”خَلّونا نَرجَع و نَزور الأخوان في كُلّو مَدينَه البَشَّرنا فيها بِكِلمَة الرَّب، و نَشوف كيف هُم بيَعمِلو.“

³⁷ و بَرْنَابَا كان عاوِز ياخُد مَعاهُم كَمان يُوحَنَّا الإسمو مَرْقُس.

³⁸ لَكِن بُولُس إفتَكَر ما كوَيس ياخُد مَعاهُم الخَلّاهُم في بَمفِليَه و ما مَشى مَعاهُم لِلعَمَل.

³⁹ و حَصَلَت بِينُم شَكلَه كَبيرَه، حَتّى مَشى واحِد عَن التّاني. و بَرْنَابَا أخَد مَرْقُس و سافَر بِمُركَب لِقُبرُص.

⁴⁰ لَكِن بُولُس إختار سِيلَا، و مَرَق بَعَد ما الأخوان قَدَّموهو لِنِعمَة الله.

⁴¹ و مَرَّه بِسُورِيَّه و كِيلِيكِيَّا يَشَدِّد الكَنايس.