أعمال الرُّسُل 14 - كِتاب العَهد الجَّديد مِن الكِتاب المُقَدَّس

في إِيْقُونِيَه

¹ و في إِيْقُونِيَه، بُولُس و بَرْنَابَا دَخَلو سَوا لِبيت الرَّب اليَهودي. و إتكَلَّمو بِالقُوَّه حَتّى عَدَد كَبير مِن اليَهود و ناس إغريقيين آمَنو.

² لَكِن الما آمَنو مِن اليَهود حَرَّكو نُفوس الأُمَم، و حَيَّرو أفكارُم عَشان يَكونو ضِد الأخوان.

³ و بُولُس و بَرْنَابَا قَعَدو وَكِت طَويل، يِتكَلَّمو بِدون خوف عَن الرَّب. و الرَّب كان بِشهَد لِكِلمَة نِعمَتو، و بِدّيهُم قُوَّه لِيَعمِلو عَلامات و عَجايِب.

⁴ و ناس المَدينَه إنقَسَمو. و بَعضُم كانو مَعَ اليَهود و بَعضُم مَعَ الرَّسولين.

⁵ و لَمّا الأُمَم و اليَهود مَعَ رؤساهُم كانو عاوزين يَشتِموهُم و يَرموهُم بِالحُجار،

⁶ هُم سِمِعو بيهو، و هَرَبو لِمُدُن لِسترَه و دَربَه في لِكأونيَّه، و لِلبِلاد القَريبَه.

⁷ و كانو هِناك بِبَشِّرو.

شِفا الرّاجِل الأعرَج

⁸ و في لِسترَه، راجِل كان بِقعُد، و هو مَكَسَّح في رِجلينو، أعرَج مِن بَطن أُمّو، و ما مَشى أبَداً.

⁹ و هو سِمِع بُولُس يتكَلَّم. و بُولُس عايَن ليهو، و شاف إنّو عِندو إيمان لِلشِّفا.

¹⁰ و قال بِصوت عالي: ”قوم عَلى كِرعينَك!“ و الرّاجِل نَطَّ و إبتَدا يَمشي.

¹¹ و لَمّا ناس كُتار شافو العَمَلو بُولُس، رَفَعو أصواتُم بِلُغَه لِكأونيَّه و قالو: ”الآلِهَه في شَكِل النّاس نَزَلو لينا.“

¹² و هُم سَمّو بَرْنَابَا زَفس و بُولُس هَرمَس، عَشانو كان البِقود في الكَلام.

¹³ و قَسّيس زَفس، الكان بيتو بَرَّه شوَيَه مِن المَدينَه، جاب تيران و تيجان لِلأبواب، و كان عاوِز يَقَدِّم ضَبيحَه مَعَ النّاس الكُتار.

¹⁴ لَكِن لَمّا الرَّسولين، بَرْنَابَا و بُولُس سِمِعو بِدا، شَرَّطو هِدُومُم و جَرو في وَش النّاس الكُتار و كورَكو،

¹⁵ ”يا رُجال، بِتسَوّو دا لِشِنو؟ نِحنا كَمان ناس، عِندَنا نَفس الطَّبيعَه زيَكُم. و نَبَشِّركُم عَشان تَرجَعو مِن الحاجات البِدون فايدَه دي لِلَّه الحَي، الخَلَق السَّما و الأرض و البَحَر و كُل الفيها.

¹⁶ و في الزَّمَن الفات، هو خَلّى كُل الأُمَم يَمشو في طُرُقُم.

¹⁷ و لَكِن هو ما ساب نَفسو بِدون شاهِد. و هو بيَعمِل الخير، و بِدّيكُم مَطَر مِن السَّما و دُرَه في وَكتو، و يَملى قُلوبكُم بِأكل و فَرَح.“

¹⁸ و بِالكِلمات دي، بِالتَّعب هُم وَقَّفو النّاس عَلَشان ما يَضبَحو ليهُم.

¹⁹ لَكِن يَهود مِن أَنْطَاكِيَه و إِيْقُونِيَه جو و حَرَّكوهُم حَتّى رَمو الحُجار عَلى بُولُس. و جَرّوهو بَرَّه المَدينَه، و هُم يَفتَكِرو هو مات.

²⁰ و لَكِن لَمّا التَّلاميذ وَقَفو حَواليهو، هو قام و دَخَل المَدينَه. و اليوم البَعدو، هو مَرَق مَعَ بَرْنَابَا لِدَربَه.

²¹ و بَعَد ما بِشَّرو في المَدينَه ديك، ناس كُتار بِقو تَلاميذ. و بَعدين رَجَعو لِلِسترَه و إِيْقُونِيَه و أَنْطَاكِيَه،

²² يَساعِدو نُفوس التَّلاميذ و يَشَجِّعوهُم أن يَكونو ثابِتين في الإيمان، و يَقولو: ”لازِم نَصبُر عَلى أتعاب كَتيرَه عَشان نَدخُل مَلَكوت الله.“

²³ و بُولُس و بَرْنَابَا إختارو ليهُم شُيوخ في كُلّو كَنيسَه، و بِالصَّلاه و الصّوم قَدَّموهُم لِلرَّب الآمَنو بيهو.

²⁴ و بَعَد ما مَرّو بِبِيسِيدِيَه، جو لِبَمفِليَه.

²⁵ و لَمّا بِشَّرو بِالكِلمَه في بَرجَه، نَزَلو لِأتّاليَه.

²⁶ و مِن هِناك سافَرو في البَحَر لِأَنْطَاكِيَه، المَحَل الفيهو الكَنيسَه كانَت قَدَّمَتُم في الأوَّل لِنِعمَة الله لِلعَمَل الهَسَّع كَمَلوهو.

²⁷ و لَمَّن وِصلو، جَمَعو الكَنيسَه، و خَبَّرو بِكُلّو حاجَه الله عَمَل مَعاهُم، و كيف فَتَح لِلأُمَم باب الإيمان.

²⁸ و هُم قَعَدو مَعَ التَّلاميذ مُدَّه طَويلَه.