أعمال الرُّسُل 13 - كِتاب العَهد الجَّديد مِن الكِتاب المُقَدَّس

بَرْنَابَا و شَاوُل يَسافِرو و يَبَشِّرو

¹ و في الكَنيسَه الفي أَنْطَاكِيَه أنبياء و مُعَلِّمين، و هُم بَرْنَابَا، و سِمْعَان الإسمو نِيجَر، و لوكيوس القَيْرَوَانِي، و مَناين الكان أخو لِهِيرُودُس رَئيس المُديرِيَّه، و شَاوُل.

² و وَكِت ما هُم بِخدِمو الرَب و بِصومو، الرّوح القُدُس قال: ”جَهِّزو لَي بَرْنَابَا و شَاوُل لِلعَمَل الناديتُم ليهو.“

³ و بَعَد ما صامو و صَلّو، خَتّو إيدينُم فوقُم و رَسَّلُم.

في قُبرُص

⁴ و الأتنين ديل، مُرَسَّلين بِالرّوح القُدُس، نَزَلو لِسَلوكيَه. و مِن هِناك، سافَرو في البَحَر لِقُبرُص.

⁵ و لَمّا وِصلو لِسَلاميس، هُم خَبَّرو بِكِلمَة الله في بُيوت الرَّب بِتاعَت اليَهود. و يُوحَنَّا كان مَعاهُم مُساعِد ليهُم.

⁶ و لَمّا سافَرو في الجَّزيرَه كُلَّها لِغايَة بافوس، لِقو راجِل يَهودي ساحِر و نَبي كَضّاب، إسمو باريَشوع.

⁷ هو كان مَعَ المُدير سَرْجِيُوس بُولُس، و هو راجِل شاطِر. و المُدير نادى بَرْنَابَا و شَاوُل و طَلَب أن يَسمَع كِلمَة الله.

⁸ لَكِن عَليم السّاحِر، و دا مَعنى إسمو، قاوَمُم و جَرَّب يَمنَع المُدير عَشان ما يآمِن.

⁹ لَكِن شَاوُل، الإسمو بُولُس كَمان، و هو مَليان بِالرّوح القُدُس، عايَن لِعَليم و قال:

¹⁰ ”يا مَليان كُلّو غِش و كُلّو كِضِب! يا وَلَد إبْلِيس، يا عَدو كُلّو بِر! ما تَوَقِّف أبَداً تَغَيِّر طُرُق الله العَديلَه؟

¹¹ هَسَّع شوف! إيد الرَّب عَليك، و إنتَ تَكون عَميان و ما تَشوف الشَّمِش لِوَكِت.“ و طَوّالي وَقَع عَليهو غَمام و ضُلُمَّه، و كان ماشي هِنا و هِناك، و يَطلُب واحِد عَشان يَقودو بِإيدو.

¹² و لَمّا المُدير شاف الحَصَل، هو آمَن، و كان مُستَغرَب مِن تَعليم الرَّب.

في أَنْطَاكِيَه في بِيسِيدِيَه

¹³ و بُولُس و المَعاهو سافَرو بِمُركَب مِن بافوس، و جو لِبَرجَه في بَمفِليَه. لَكِن يُوحَنَّا خَلّاهُم و رَجَع لِأُورُشَلِيم.

¹⁴ لَكِن هُم مَشو مِن بَرجَه و جو لِأَنْطَاكِيَه في بِيسِيدِيَه. و دَخَلو بيت الرَّب يوم السَّبِت و قَعَدو.

¹⁵ و بَعَد قِرايَة القانون و الأنبياء، رؤساء بيت الرَّب رَسَّلو ليهُم يَقولو: ”يا أخوان، إذا كان عِندَكُم كِلمَة الشَّجاعَه لِلنّاس، قُولوهو.“

¹⁶ و بُولُس قام و عَمَل عَلامَه بِإيدو و قال: ”يا رُجال إِسْرَائِيل و البِخافو الله مِن الأُمَم، أسمَعو!

¹⁷ إلَه شَعب إِسْرَائِيل دا إختار أبَهاتنا، و عَمَل الشَّعب أُمَّه عَظيمَه لَمَّن كانو غَريبين في بَلَد مَصر. و طَلَّعُم مِنَّها بِقُوَّه عَظيمَه.

¹⁸ و كان عِندو صَبر عَلى المَشي بِتاعُم مُدَّة أربَعين سَنَه في الخَلا.

¹⁹ و خَرَب سَبعَه أُمَم في بَلَد كَنعان، و أدّا ليهُم أرضُم عَشان تَكون ميراث.

²⁰ و كُلّو دا حَصَل في مُدَّة أُربُعمِيَّه و خَمسين سَنَه. و بَعَد داك، الله أدّاهُم قُضاة لِغايَة وَكِت صَمُوئِيل النَّبي.

²¹ و بَعَد دا، هُم طَلَبو مَلِك، و الله أدّاهُم شَاوُل لِمُدَّة أربَعين سَنَه، و هو وَلَد قيس، راجِل مِن قَبيلَة بنْيَامِين.

²² و لَمّا الله شال مِنَّهُم شَاوُل، رَفَع دَاوُد مَلِك ليهُم، و شِهِد ليهو و قال: لِقيت دَاوُد وَلَد يَسَّى، راجِل حَسَب قَلبي، و هو بيَعمِل كُلّو إرادَتي.

²³ و مِن أولاد الرّاجِل دا، الله جاب لِإِسْرَائِيل! حَسَب الوَعَد، يَسُوع المُخَلِّص.

²⁴ و قُبّال ما يَسُوع جا، يُوحَنَّا بَشَّر بِمَعموديَّة التّوبَه لِكُلّو ناس إِسْرَائِيل.

²⁵ و لَمّا يُوحَنَّا قَرَّب يَتِم خِدمَتو، هو قال: إنتو تَفتَكِرو أنا مِنو؟ أنا ما هو. لَكِن شوف! واحِد بِجي بَعَدي، الأنا ما بَستَحِق أفِك جِزَمو.

²⁶ يا أخوان، أولاد إِبْرَاهِيم و البِخافو الله بينكُم، الله رَسَّل لينا نِحنا كِلمات الخَلاص دا.

²⁷ و السّاكنين في أُورُشَلِيم و رؤساهُم ما عِرفو يَسُوع. لَكِن لَمّا حَكَمو عَليهو، تَمَّمو كِلمات الأنبياء البيَقروها كُلّو سَبِت.

²⁸ و لَمّا ما لِقو عَليهو سَبَب لِلموت، طَلَبو مِن بِيلاطُس أن يَكتُلو.

²⁹ و لَمّا تَمَّمو كُل الكان مَكتوب عَنّو، نَزَّلوهو مِن الصَّليب و خَتّوهو في قَبر.

³⁰ و لَكِن الله قَوَّمو مِن بين المَيِّتين.

³¹ و هو ظَهَر أيام كَتيرَه لِلمَشو مَعاهو مِن الجَّليل لِأُورُشَلِيم. و هَسَّع هُم شاهِدينو لِلنّاس.

³² و نِحنا نَبَشِّركُم بِالوَعد الوَعَدو الله لِأبَهاتنا.

³³ هو تَمَّم دا لينا، نِحنا أولادُم، لَمّا قَوَّم يَسُوع مِن بين المَيِّتين. زي ما هو مَكتوب كَمان في المَزمور التّاني: إنتَ إبني. أنا اليوم وَلَدتَك.

³⁴ و بِخُصوص الحَق أن الله قَوَّمو مِن بين المَيِّتين، و هو ما بِرجَع لِلتُّراب، هو قال: أنا بَدّيكُم البَرَكات الأمينَه المُقَدَّسَه بِتاعَت دَاوُد.

³⁵ و كِدا يَقول كَمان في مَزمور آخِر: إنتَ ما بِتخَلّي قُدّوسَك يَرجَع لِلتُّراب.

³⁶ و عشان دَاوُد، بَعَد ما خَدَم الله في جِيلو بِتَرتيب الله، نام و إتلَمّى لِأبَهاتو، و جِسمو رَجَع لِلتُّراب.

³⁷ لَكِن القَوَّمو الله مِن بين المَيِّتين ما رَجَع لِلتُّراب.

³⁸ خَليهو يَكون مَعروف ليكُم، يا أخوان، نِحنا نَبَشِّر بِيَسُوع غُفران الخَطايا.

³⁹ و بيهو كُلّو واحِد البِآمِن، يِتبَرَّر مِن كُلّو شي قانون مُوسَى ما قِدِر يَعمِلو بار.

⁴⁰ أحرِسو، عَشان القالو في الأنبياء ما بِجي ليكُم:

⁴¹ شوفو، إنتو البِشتِمو، و إستَغرَبو، و موتو. عَشان أنا أعمِل عَمَل في أيامكُم، و العَمَل دا إنتو ما بِتصَدِقوهو إن واحِد خَبَّركُم بيهو.“

⁴² و وَكِت بُولُس و بَرْنَابَا كانو يَمرُقو، النّاس سألوهُم أن يَكَلِّموهُم بِالكَلام دا السَّبِت الجّاي.

⁴³ و بَعَد ما الناس مَشو مِن بيت الرَّب، كَتيرين مِن اليَهود و النّاس البِخافو، القِبلو الدّين اليَهودي، تِبعو بُولُس و بَرْنَابَا. و هُم كَلَّموهُم و بَشَّروهُم عَشان يِستَمِرّو في نِعمَة الله.

⁴⁴ و السَّبِت البَعدو، كُل المَدينَه تَقريباً إتلَمّو عَشان يَسمَعو كِلمَة الله.

⁴⁵ و لَمّا اليَهود شافو ناس كُتار، إتمَلو حَسَد، إبتَدو يَقاوِمو القالو بُولُس، و يَجَدِّفو.

⁴⁶ و بُولُس و بَرْنَابَا رَدّو عَليهُم بِشَجاعَه و قالو: ”كان لازِم نَكَلِّمكُم بِكِلمَة الله في الأوَّل. و لَكِن عَلَشان إنتو أبيتوها، و حَكَمتو عَلى نُفوسكُم أنَّكُم ما مُستَحِقّين لِلحَياة الأبَديَّه، شوفو! نَدَوِّر لِلأُمَم.

⁴⁷ عَشان الرَّب أمَرنا كِدا و قال: عَمَلتَك نور لِلأُمَم، عَشان تَجيب خَلاص لِآخِر الدُّنيا.“

⁴⁸ و لَمّا الأُمَم سِمِعو دا، فِرحو و مَجَّدو كِلمَة الرَّب. و كُل الهو إختارُم لِلحَياة الأبَديَّه، آمَنو.

⁴⁹ و كِلمَة الرَّب مَشَت في كُل البِلاد.

⁵⁰ و لَكِن اليَهود حَرَّكو النِّسوان البِخافو و المُحتَرَمات و رؤساء المَدينَه. و هُم حَرَّكو ضيق عَلى بُولُس و بَرْنَابَا و طَرَدوهُم مِن بَلَدُم.

⁵¹ و لَكِن هُم هَزّو التُّراب مِن كِرعينُم، و جو لِإِيْقُونِيَه.

⁵² و التَّلاميذ كانو مَليانين بِالفَرَح و الرّوح القُدُس.