أعمال الرُّسُل 12 - كِتاب العَهد الجَّديد مِن الكِتاب المُقَدَّس

المَلاك يَمَرِّق بُطْرُس مِن السِّجِن

¹ و في الوَكِت دا، هِيرُودُس المَلِك قَبَض عَلى بَعض النّاس مِن الكَنيسَه عَشان يَطرُدُم.

² و كَتَل يَعْقُوب أخو يُوحَنَّا بِالسّيف.

³ و لَمّا شاف دا بَسَط اليَهود، هو رَجَع و قَبَض عَلى بُطْرُس كَمان. و دا حَصَل في أيام عيد الفَطير.

⁴ و بَعَد ما قَبَض عَليهو، خَتّاهو في السِّجِن، و سَلَّمو لِأربَعَه أقسام مِن العَساكِر عَشان يَحرِسوهو. و هِيرُودُس كان عاوِز يَجيبو لِلنّاس بَعَد عيد الفِصَح.

⁵ و بُطْرُس كان مَحروس في السِّجِن. لَكِن ناس الكَنيسَه كانو بِصَلّو بِقُلوب حارَّه لِلَّه فِشانو.

⁶ و لَمّا هِيرُودُس قَرَّب يَجيبو لِلمَحكَمَه، بُطْرُس في اللّيلَه ديك كان نايِم بين إتنين عَساكِر، مَربوط بِجَنزيرين. و الحُرّاس كانو قِدّام الباب بِحرَسو السِّجِن.

⁷ و شوف! مَلاك الرَّب وَقَف جَنبو، و نور نَوَّر في المَحَل. و هو ضَرَب جَنب بُطْرُس، و قَوَّمو مِن النّوم و قال: ”قوم بِالسُّرعَه!“ و الجَّنزيرين وَقَعو مِن إيدينو.

⁸ و المَلاك قال ليهو: ”ألبَس هِدومَك و جِزَمَك.“ و بُطْرُس عَمَل كِدا. و المَلاك قال ليهو: ”ألبَس كَبوتَك و أتبَعني.“

⁹ و بُطْرُس تِبعو و مَرَق. و ما عِرِف السَّوَّاهو المَلاك كان الحَق لَكِن إفتَكَر هو شاف رؤيا.

¹⁰ و فاتو بِالغَفير الأوَّل و التّاني، و جو لِباب الحَديد البِسوق لِلمَدينَه. و إنفَتَح ليهُم بَراهو، و هُم مَرَقو. و لَمّا فاتو شارِع واحِد، طَوّالي المَلاك مَشى مِنّو.

¹¹ و بُطْرُس رَجَع لِنَفسو و قال: ”هَسَّع عِرِفتَ بِتأكيد، الرَّب رَسَّل ملاكو و خَلَّصني مِن إيد هِيرُودُس و مِن كُلّو شي اليَهود كانو يِستَنّو عَشان يَعمِلو.“

¹² و لَمّا فِهِم دا، جا لِبيت مَرْيَم، أُم يُوحَنَّا الإسمو مَرْقُس، الفيهو كَتيرين كانو مِتلَمين و هُم يَصَلّو.

¹³ و لَمّا بُطْرُس دَقَّ الباب البَرّاني، خَدّامَه إسِما رَودا جات عَشان تَسمَع.

¹⁴ و لَمّا عِرفَت صوت بُطْرُس، ما فَتَحَت الباب مِن الفَرَح، لَكِن جَرَت لِجُوَّه، و خَبَّرَتُم بُطْرُس واقِف قِدّام الباب.

¹⁵ و لَكِن قالو ليها: ”إنتي مَجنونَه!“ لَكِن هي كانَت تَأكِّد دا كان الحَق. عَلَشان كِدا قالو: ”دا ملاكو.“

¹⁶ لَكِن بُطْرُس قاعِد يَدُق. و لَمّا فَتَحو، شافوهو و إستَغرَبو.

¹⁷ و عَمَل عَلامَه بِإيدو عَشان يَسكُتو. و كَلَّمُم كيف الرَّب مَرَّقو مِن السِّجِن. و قال: ”خَبِّرو يَعْقُوب و الأخوان بِالحاجات دي.“ و بَعدين مَرَق و مَشى لِمَحَل تاني.

¹⁸ و لَمّا بِقى النَّهار، كان في دَوشَه كَبيرَه جِدّاً بين العَساكِر و هُم قالو: ”شِنو حَصَل لِبُطْرُس؟“

¹⁹ و بَعَد ما هِيرُودُس فَتَّش عَليهو و ما لِقاهو، هو إمتَحَن الحُرّاس و أمَر أن يَكتُلوهُم. و بَعَد دا، هِيرُودُس نَزَل مِن اليَهُودِيَّه لِقَيْصَرِيَّه و قَعَد هِناك.

²⁰ هِيرُودُس زِعِل مِن ناس صُور و صَيدا. و هُم جو ليهو بِفِكرَه واحدَه بَعَد ما عَمَلو الصَّداقَه مَعَ بِلاستُس، رَئيس سَرايَة المَلِك. و طَلَبو مِنّو السَّلام عَلَشان بَلَدُم كانَت تاخُد الأكِل مِن بَلَد المَلِك.

²¹ و في اليوم المُجَهَّز، هِيرُودُس لِبِس هِدوم المَلِك، و قَعَد عَلى كُرسي المَلِك و كَلَّمُم.

²² و النّاس كورَكو: ”الصّوت دا صوت إلَه، ما صوت زول!“

²³ و طَوّالي مَلاك الرَّب ضربو، عَلَشانو ما أدّا المَجد لِلَّه. و الدّود أكَلو، و هو مات.

²⁴ و كِلمَة الله كانَت تَكبَر و تَزيد.

²⁵ بَرْنَابَا و شَاوُل رَجَعو مِن أُورُشَلِيم لَمّا تَمَّمو الخِدمَه. و اَخَدو مَعاهُم يُوحَنَّا الإسمو مَرْقُس.