أعمال الرُّسُل 11 - كِتاب العَهد الجَّديد مِن الكِتاب المُقَدَّس

بُطْرُس يَفَسِّر عَن خَلاص كَرْنِيلِيُوس

¹ و الرُّسُل و الأخوان الكانو في اليَهُودِيَّه سِمِعو أن الأُمَم كَمان قِبلو كِلمَة الله.

² و لَمّا بُطْرُس طَلَع لِأُورُشَلِيم، النّاس المُطَهَّرين شاكَلوهو.

³ و قالو: ”إنتَ دَخَلتَ لِرُجال ما مُطَهَّرين و أكَلتَ مَعاهُم.“

⁴ عَشان كِدا، بُطْرُس إبتَدا يَكَلِّمُم بِكُل الحَصَل بِتَرتيب و قال:

⁵ ”كُنتَ بَصَلّي في مَدينَة يَافَا، و شُفتَ في رؤيا حاجَه تَنزِل مِن السَّما زي مِلايَه كَبيرَه مَربوطَه بِأركانا الأربَعَه، و جات لَي.

⁶ و عايَنتَ فيها شَديد، و شُفتَ حَيوانات الأرض العِندَهُم أربَعَه أقدام، و الوحوش، و الدَّبايب، و طُيور السَّما.

⁷ و بَعَد دا، سِمِعتَ صوت يَقول لَي: قوم، يا بُطْرُس، اَضبَح و أُكُل.

⁸ و قُلتَ: أبَداً، يا رَب، عَلَشان ما دَخَل في خَشمي شي نَجِس ولّا ما نَضيف بِالمَرَّه.

⁹ و الصّوت إتكَلَّم تاني مَرَّه مِن السَّما: الشّي النَّضَّفو الله ما تَقول هو نَجِس.

¹⁰ و حَصَل كِدا تلاتَه مَرّات. و بَعَد دا كُلّو، رَفَعوها لِلسَّما.

¹¹ و شوف! في نَفس الوَكِت، تلاتَه رُجال وَقَفو قِدّام البيت الأنا كُنتَ فيهو، و هُم مُرَسَّلين لَي مِن قَيْصَرِيَّه.

¹² و الرّوح قال لَي، أمشي مَعاهُم بِدون ما تَشِك. و السِّتَّه أخوان ديل مَشو مَعاي، و دَخَلنا بيت الرّاجِل.

¹³ و هو خَبَّرنا كيف شاف المَلاك واقِف في بيتو و يَقول ليهو: رَسِّل لِيَافَا و نادي سِمْعَان الإسمو بُطْرُس.

¹⁴ و هو بِكَلِّمَك كَلام بِتَخلَص بيهو، إنتَ و كُلّو بيتَك.

¹⁵ و لَمّا إبتَديت أتكَلَّم، الرّوح القُدُس نَزَل عَليهُم زي ما نَزَل عَلينا في البِدايَه.

¹⁶ و إتزَكَّرتَ كَلام الرَّب لَمّا قال: يُوحَنَّا عَمَّد بِالمويَه، لَكِن إنتو بِتعَمَّدو بِالرّوح القُدُس.

¹⁷ إذا كان الله أدّاهُم زات الهَدِيَّه الأدّانا لَمّا آمَنّا بالرَب يَسُوع المَسيح، أنا مِنو حَتّى أقدَر أوَقِّف الله؟“

¹⁸ و لَمّا سِمِعو دا، سَكَتو و مَجَّدو الله و قالو: ”عَلَشان كِدا الله أدّا لِلأُمَم كَمان التّوبَه لِلحَياة.“

الكَنيسَه في أَنْطَاكِيَه

¹⁹ و الإتشَتَّتو بِواسطَة التَّعب الحَصَل بِسَبَب اسْتِفَانُوس، سافَرو لِفِينِيقِيَه و قُبرُص و أَنْطَاكِيَه. و هُم ما بِكَلِّمو أي واحِد بِالكِلمَه إلّا اليَهود بَس.

²⁰ و لَكِن بَعض مِنَّهُم مِن قُبرُص و القَيْرَوَان، لَمّا دَخَلو أَنْطَاكِيَه، كانو بِكَلِّمو ناس إغريقيين كَمان، و بِبَشِّروهُم بالرَب يَسُوع.

²¹ و إيد الرَّب كانَت مَعاهُم. و عَدَد كَبير مِن النّاس آمَنو و رَجَعو لِلرَّب.

²² و لَمّا الخَبَر دا جا في أضان الكَنيسَه الفي أُورُشَلِيم، هُم رَسَّلو بَرْنَابَا لِأَنْطَاكِيَه.

²³ و لَمّا وِصِل و شاف نِعمَة الله، هو كان فَرحان، و بَشَّر كُلُّهُم عَشان يَكونو ثابتين في الرَّب بِكُلّو قُلوبُم.

²⁴ عَشان هو كان راجِل صالِح، مَليان بِالرّوح القُدُس و بِالإيمان. و عَدَد كَبير مِن النّاس إتلَمّو لِلرَّب.

²⁵ عَلَشان كِدا، بَرْنَابَا مَشى لِطَرْسُوس عَشان يَطلُب شَاوُل.

²⁶ و لَمّا لِقاهو، جابو لِأَنْطَاكِيَه. و بَرْنَابَا و شَاوُل أجتَمَعو مَعَ الكَنيسَه سَنَه واحدَه، و عَلَّمو ناس كُتار. و سَمّو التَّلاميذ مَسيحيين أوَّل مَرَّه في أَنْطَاكِيَه.

²⁷ و في الأيام ديلاك، أنبياء نَزَلو مِن أُورُشَلِيم لِأَنْطَاكِيَه.

²⁸ و قام واحِد مِنَّهُم إسمو أغابوس، و إتنَبّأ بِالرّوح عَن جوع شَديد البِكون في كُل الدُّنيا. و داك حَصَل في أيام كُلُودِيُوس.

²⁹ و التَّلاميذ، كُلّو واحِد مِنَّهُم حَسَب قُدرَتو، جَهَّزو عَشان يَرَسِّلو حاجَه مُساعَدَه لِلأخوان السّاكنين في اليَهُودِيَّه.

³⁰ و عَمَلو كِدا، و رَسَّلَوهو لِلشُّيوخ بِإيدين بَرْنَابَا و شَاوُل.