أعمال الرُّسُل 10 - كِتاب العَهد الجَّديد مِن الكِتاب المُقَدَّس

كَرْنِيلِيُوس يَنادي بُطْرُس

¹ و كان في قَيْصَرِيَّه راجِل إسمو كَرْنِيلِيُوس، رَئيس الجّيش مِن القِسم الإسمو الإيطاليَّه.

² و هو كان راجِل صالِح، و هو و كُلّو بيتو كانو بِخافو الله، و هو كان بِدّي صَدَقَات كَتيرَه لِلنّاس، و بِصَلّي في كُلّو وَكِت.

³ و يوم مِن الأيام السّاعَه تلاتَه بَعَد الضُّهر تَقريباً، هو شاف، في رؤيا بَايِنَه، مَلاك الله يَدخُل ليهو و يَقول ليهو: ”يا كَرْنِيلِيُوس!“

⁴ و كَرْنِيلِيُوس عايَن ليهو، و خاف شَديد، و قال: ”داير شِنو، يا سَيِّد؟“ و المَلاك قال ليهو: ”صَلَواتَك و صَدَقَاتَك طَلَعَت تَذكار قِدّام الله.

⁵ و هَسَّع، رَسِّل رُجال لِيَافَا، و جيب راجِل إسمو سِمْعَان اليَسَمّوهو بُطْرُس.

⁶ و هو قاعِد مَعَ سِمْعَان الشَّغال في الجُّلود، و بيتو عِند البَحَر.“

⁷ و بَعَد ما المَلاك الإتكَلَّم مَعاهو مَرَق، كَرْنِيلِيُوس نادى إتنين مِن خَدّامينو و عَسكَري طَيب مِن الكانو يَخدِموهو دايماً.

⁸ و خَبَّرُم بِكُلّو حاجَه، و رَسَّلُم لِيَافَا.

رؤيا بُطْرُس

⁹ و في اليوم البَعدو، لَمّا هُم كانو في السِّكَّه، و قَرَّبو مِن المَدينَه، بُطْرُس طَلَع لِلسَّقِف عَشان يَصَلّي السّاعَه إتناشَر تَقريباً.

¹⁰ و هو بِقى جَعان و كان عاوِز ياكُل. و لَمّا كانو يَحَضِّرو ليهو الأكِل، هو شاف رؤيا.

¹¹ و شاف السَّما مَفتوحَه، و حاجَه زي مِلايَه كَبيرَه تَنزِل لِلأرض، مَربوطَه بِأربَعَه أركان.

¹² و كان فيها مِن كُل الحَيوانات العِندَهُم أربَعَه أقدام و دَبايب الأرض و طُيور السَّما.

¹³ و شوف صوت قال ليهو: ”قوم، يا بُطْرُس، اَضبَح و أُكُل.“

¹⁴ لَكِن بُطْرُس قال: ”أبَداً، يا رَب، أنا ما أكَلتَ شي نَجِس ولّا ما نَضيف بِالمَرَّه.“

¹⁵ و الصّوت جا ليهو تاني مَرَّه: ”الشّي النَّضَّفو الله، ما تَقول هو نَجِس.“

¹⁶ و حَصَل كِدا تلاتَه مَرّات، و بَعَد دا طَوّالي رَفَعوها لِلسَّما.

¹⁷ و وَكِت ما بُطْرُس كان بِفَكِّر في نَفسو عَن مَعنى الرؤيَه دي الشّافا، أهو! الرُّجال الكرنيليوس رَسَّلُم وِصلو. و هُم سَألو عَن بيت سِمْعَان، و وَقَفو قِدّام الباب.

¹⁸ و نادو و سَألو إذا كان سِمْعَان الإسمو بُطْرُس قاعِد هِناك.

¹⁹ و لَمَّن بُطْرُس كان بِفَكِّر في الرّؤيَه، الرّوح قال ليهو: ”شوف، تلاتَه رُجال يَفَتِّشو عَليك.

²⁰ عَلَشان كِدا قوم، و أنزِل، و أمشي مَعاهُم، و ما تَشِك، عَشان أنا رَسَّلتَهُم.“

²¹ و بُطْرُس نَزَل لِلرُّجال و قال: ”شوفو! أنا هو الإنتو تَطلُبوهو. جيتو لِشِنو؟“

²² و الرُّجال قالو: ”جينا مِن كَرْنِيلِيُوس، رَئيس الجّيش. هو راجِل صالِح و يَخاف الله. و كُل اليَهود بِشهَدو ليهو. و مَلاك مُقَدَّس جا ليهو، و حَزَّرو أن يَناديك عَشان تَجي لِبيتو، و هو يَسمَع كَلام مِنَّك.“

²³ و عَلَشان كِدا، بُطْرُس عَزَمُم يدخُلو البيت و يَكونو ضُيوفو. و في الصَّباح بُطْرُس قام و مَرَق مَعاهُم، و بَعض مِن الأخوان مِن يَافَا كَمان مَشو مَعاهو.

بُطْرُس في بيت كَرْنِيلِيُوس

²⁴ و في اليوم البَعدو، دَخَلو قَيْصَرِيَّه. و كان كَرْنِيلِيُوس بِنتَظِرُم، و نادى أقاريبو و أصحابو المَخصوصين.

²⁵ و لَمّا بُطْرُس دَخَل، كَرْنِيلِيُوس قابَلو، و رَكَع في رِجلينو، و عَبَدو.

²⁶ لَكِن بُطْرُس رَفَعو و قال: ”قوم، أنا كَمان إنسان.“

²⁷ و بَعَد دا دَخَل، و هو يتكَلَّم مَعاهو، و لِقى ناس كُتار مِتلَمين.

²⁸ و بُطْرُس قال ليهُم: ”إنتو بِتَعرِفو كيف ما في إذِن لِراجِل يَهودي يَشتَرِك مَعَ ناس مِن بَلَد تانيَه، ولّا يَقَرِّب مِنّو. لَكِن الله وَرّاني أن ما أقول عَن أي زول هو نَجِس ولّا ما نَضيف.

²⁹ عَلَشان كِدا، لَمّا رَسَّلتَ لَي، جيت، و ما عِندي مانِع. عَلَشان كِدا، بَسألَك لِشِنو رَسَّلتَ لَي؟“

³⁰ و كَرْنِيلِيُوس قال: ”مِن مُدَّة أربَعَة أيام زي السّاعَه دي، كُنتَ بَصَلّي السّاعَه تلاتَه بَعَد الضُّهر في بيتي. و شوف! راجِل في هِدوم لامِع وَقَف قِدامي.

³¹ و قال لَي: يا كَرْنِيلِيُوس، الله سِمِع صَلَواتَك و إتزَكَّر صَدَقَاتَك لِلمَساكين.

³² عَلَشان كِدا، رَسِّل لِيَافَا و نادي سِمْعَان الإسمو بُطْرُس، و هو قاعِد في بيت سِمْعَان الشَّغال في الجُّلود جَمب البَحَر.

³³ و طَوّالي رَسَّلتَ ليك، و إنتَ عَمَلتَ كوَيس عَشان جيت. و هَسَّع نِحنا كُلُّنا مِتلَمين هِنا قِدّام الله، عَشان نَسمَع مِنَّك كُل الأمَرَك بيهو الله.“

³⁴ و بُطْرُس فَتَح خَشمو و قال: ”بِالحَق بَشوف أن الله ما يَقبَل الوشوش.

³⁵ لَكِن في كُلّو أُمَّه، الزّول البِخاف مِنّو و بيَعمِل البِر، هو مَقبول عِندو.

³⁶ و دي الكِلمَه الله رَسَّلا لِناس إِسْرَائِيل، و بَشَّر بِالسَّلام بِيَسُوع المَسيح. و هو رَب الكُل.

³⁷ و إنتو بِتَعرِفو الحَصَل في كُل اليَهُودِيَّه. و دا إبتَدا في الجَّليل بَعَد ما يُوحَنَّا بَشَّر بِالمَعموديَّه،

³⁸ كيف الله مَسَح يَسُوع المِن النَّاصِرَه بِالرّوح القُدُس و القُوَّه. و هو كان بِمشي في كُلّو مَحَل و بيَعمِل الخير، و بِشفي كُلُّهُم الكانو تِحِت سُلطَة إبْلِيس. عَشان الله كان مَعاهو.

³⁹ و نِحنا شاهِدين بِكُل العَمَلو في بِلاد اليَهُودِيَّه و في أُورُشَلِيم. و لَكِن هُم كَتَلوهو و عَلَّقوهو عَلى الشَّجَرَه.

⁴⁰ لَكِن الله قَوَّمو مِن بين المَيِّتين في اليوم التّالِت، و وَرّاهو لِلنّاس.

⁴¹ و مُش كُل النّاس شافوهو، لَكِن الشاهِدين المُختارين مِن قُبّال، نِحنا الأكَلنا و شِرِبنا مَعاهو بَعَد قيامَتو مِن بين المَيِّتين.

⁴² و هو أمَرنا نَبَشِّر النّاس، و نَشهَد إنّو الله إختارو يَكون قاضي لِلحَيين و المَيِّتين.

⁴³ و كُل الأنبياء يَشهَدو ليهو أن كُلّو واحِد البِآمِن بيهو بِقبَل بِإسمو غُفران الخَطايا.“

⁴⁴ و وَكِت بُطْرُس كان لِسَّع يتكَلَّم بِالكِلمات دي، الرّوح القُدُس جا عَلى كُل السِّمِعو الكِلمَه.

⁴⁵ و كُل المؤمِنين المُطَهَّرين الجّو مَعَ بُطْرُس، إستَغرَبو عَشان الله أدّا لِلنّاس الما كانو يَهود هَديَّة الرّوح القُدُس كَمان.

⁴⁶ عَلَشان هُم كانو يَسمَعوهُم يِتكَلَّمو بِلُغات، و يَمَجِّدو الله.

⁴⁷ في الوَكِت دا، بُطْرُس قال ليهُم: ”في واحِد البِقدَر يَمنَع النّاس ديل مِن المَعموديَّه بِالمويَه؟ عَشان هُم قِبلو الرّوح القُدُس زيَنا.“

⁴⁸ و بَعَد دا، أمَر أن يِتعَمَّدو بِإسم يَسُوع المَسيح. بَعدين هُم سَألو بُطْرُس يِستَنّى مَعاهُم أيام قَليلَه.