أعمال الرُّسُل 1 - كِتاب العَهد الجَّديد مِن الكِتاب المُقَدَّس

طُلوع يَسُوع لِلسَّما

¹ في الكِتاب الأوَّل، يا ثَاوُفِيلُس، كَتَبتَ عَن كُل الإبتَدا يَسُوع يَسَوّيهو و يَعَلِّم بيهو،

² لِغايَة اليوم الأخَدوهو لِلسَّما. و قُبّال ما أخَدوهو لِلسَّما، هو أمَر بِالرّوح القُدُس الرُّسُل الهو إختارُم.

³ و بَعَد تَعبو، هو وَرّا نَفسو ليهُم و أدّا ليهُم بينات كَتيرَه الوَرّاهُم هو حَي. و هو كان بِبَيِّن نَفسو ليهُم مُدَّة أربَعين يوم، و بِكَلِّمُم عَن حاجات مَلَكوت الله.

⁴ و وَكِت ما هو كان يَجتَمِعو مَعاهُم، أدّا ليهُم الأمر دا: ”ما تَمرُقو مِن أُورُشَلِيم، لَكِن تِستَنّو وَعَد الأبو السِّمِعتوها مِنّي.

⁵ عَشان يُوحَنَّا عَمَّد بِالمويَه، و لَكِن إنتو بِتِتعَمَّدو بِالرّوح بَعَد أيام قَليلَه.“

⁶ عَلَشان كِدا، لَمَّن إتلَمّو سَوا، سألوهو و قالو: ”يا رَب، في الوَكِت دا، إنتَ بِترَجِّع المَملَكَه لِإِسْرَائِيل؟“

⁷ هو قال ليهُم: ”ما مُهِم ليكُم عَشان تَعرِفو الزَّمَن و الوَكِت الأبو ثَبَّتو بِسُلطَة نَفسو.

⁸ لَكِن إنتو بِتَقبَلو قُوَّه لَمّا الرّوح القُدُس بِجي عَليكُم. و بِتكونو شاهِدين لَي في أُورُشَلِيم و في كُل اليَهُودِيَّه و السَّامِرَه لِغايَة آخِر الدُّنيا.“

⁹ و بَعَد ما قال كِدا، إترَفَع لِفوق و وَكِت هُم قاعِدين يَشوفو، سَحابَه أخَدَتو مِن عُيونُم.

¹⁰ و وَكِت ما هُم كانو بِعاينو لِلسَّما و هو ماشي فوق، شوف! راجلين وَقَفو قَريب مِنَّهُم لابسين أبيَض.

¹¹ و قالو: ”يا رُجال الجَّليل، مالكُم واقفين بِتعايِنو لِلسَّما؟ يَسُوع دا نَفسو الإترَفَع مِنَّكُم لِلسَّما، هو بِرجَع زي ما شُفتوهو ماشي لِلسَّما.“

إختِيار مَتِيّاس بِدال يَهُوذَا

¹² بَعَد دا، هُم رَجَعو لِأُورُشَلِيم مِن الجَّبَل الإسمو جَبَل الزّيتون، قَريب مِن أُورُشَلِيم، زي المَسافَه الزّول بِمشي يوم السَّبِت.

¹³ و لَمّا دَخَلو المَدينَه، طَلَعو لِلأوضَه الفي فوق، الكانو بِقعُدو فيها. و هُم بُطْرُس و يُوحَنَّا و يَعْقُوب و أنْدَرَاوُس و فِيلُبُّس و تُومَا و بَرْثُلْمَاوُس و مَتَّى و يَعْقُوب وَلَد حَلْفَى و سِمْعَان الغَيُور و يَهُوذَا وَلَد يَعْقُوب.

¹⁴ و ديل كُلُّهُم كانو بِستَمِرّو في الصَّلاه بِفِكر واحِد مَعَ النِّسوان و مَرْيَم أُم يَسُوع و مَعَ أخوانو.

¹⁵ و في الأيام ديلاك قام بُطْرُس في وَسِط الأخوان. و العَدَد بِتاعُم كُلُّهُم كان مِيَّه و عِشرين زول تَقريباً.

¹⁶ و هو قال ليهُم: ”يا أخوان، كان لازِم يَتِم المَكتوب مِن زَمان بِالرّوح القُدُس بِخَشم دَاوُد عَن يَهُوذَا القاد النّاس ديل المَسَكو يَسُوع.

¹⁷ عَشان هو كان واحِد مِنَّنا، و كان عِندو شَرِكَه في الخِدمَه دي.“

¹⁸ الرّاجِل دا إشتَرى حِتَّت أرض مِن أُجرَة خَطِيَّتو، و هِناك وَقَع عَلى رَاسو و جِسمو إتشَقَّق مِن الوَسِط و بَطَنو كُلّو إدَّفَق.

¹⁹ و داك بِقى مَعروف عِند كُل النّاس القاعِدين في أُورُشَلِيم. عَلَشان كِدا المَحَل داك نادوهو بِلُغَتُم: ”حَقَل دَما“، يَعني زِراعَة الدَّم.

²⁰ عَشان مَكتوب في كِتاب المَزامير: خَلّي بيتو يَكون خَربان، و ما تَخَلّي واحِد يَسكُن فيهو. و: خَلّي تاني ياخُد مَحَلّو.

²¹ ”عَلَشان كِدا، مُهِم لينا نَختار واحِد مِن الرُّجال الكانو مَعانا كُل الوَكِت لَمّا الرَّب يَسُوع دَخَل و مَرَق في وَسِطنا،

²² مِن مَعموديَّة يُوحَنَّا لِليوم الفيهو أخَدوهو مِنَّنا. عَلَشان واحِد مِنَّهُم لازِم بِكون شاهِد مَعانا بِقِيامتو.“

²³ و قَدَّمو ليهُم إتنين: يوسُف الإسمو بَارْسَابَا يُسْتُس، و مَتِيّاس.

²⁴ و صَلّو و قالو: ”يا رَب البِعرِف قُلوب النّاس كُلّو، وَرّينا ياتو مِن الإتنين ديل الأنتَ إختِرتو

²⁵ عَلَشان ياخُد المَكان في الخِدمَه دي و شُغل الرِّسّالَه، اليَهُوذَا خَلّاها و مَشى لِلمَحَل بِتاعو.“

²⁶ و في الوَكِت دا، رَمو القُرعَه بِينُم و وَقَعَت القُرعَه عَلى مَتِيّاس. عَلَشان كِدا، حَسَبوهو مَعَ الحِداشَر رَسول.