٣ يُوحَنَّا 1 - كِتاب العَهد الجَّديد مِن الكِتاب المُقَدَّس

¹ مِن الشّيخ لِغَايُوس الحَبيب، البَحِبّو في الحَق.

² يا حَبيبي، أصَلّي عَشانَك تَكون ناجِح في كُلّو شي، و تَكون بِعافيَه، زي ما نَفسَك ناجِحَه.

³ فِرِحتَ جِدّاً لَمّا بَعض مِن الأخوان جو و شِهِدو لِلحَق الفيك، و كيف إنتَ تَمشي بِالحَق.

⁴ ما عِندي فَرَح أعظَم مِن دا، يَعني أسمَع أن أولادي يَمشو في الحَق.

⁵ يا حَبيبي، إنتَ أمين بِالحاجَه التَّعمِلا لِلأخوان، و خُصوصاً لِلغَريبين.

⁶ و هُم شِهِدو بِمَحَبَّتَك قِدّام الكَنيسَه. و إنتَ تَعمِل كوَيس إذا تَرَسِلُم لِلسَّفَر زي ما يِستَحِق لِلَّه.

⁷ و عَشان خاطِر الإسِم هُم مَرَقو، و ما ياخُدو حاجَه مِن الأُمَم.

⁸ عَلَشان كِدا، لازِم نَقبَل ناس مِثِل ديل، عَلَشان نَكون عامِلين مَعاهُم لِلحَق.

⁹ كَتَبتَ لِلكَنيسَه. و لَكِن دِيُوتْرِيفُوس، البِحِب يَكون الأوَّل بِينُم، ما يَقبَلنا.

¹⁰ عَشان كِدا، إذا بَجي، بَزَكِّرو بِأعمالو البِعمِلو، و الكَلام الشَّرّير البقول عَنّا. لَكِن دا ما كِفايَه ليهو، هو ما بِقبَل الأخوان كَمان، و يَمنَع البِدورو يَقبَلوهُم، و هو يَطرُدُم مِن الكَنيسَه.

¹¹ يا حَبيبي، ما تَتبَع الشَّر، لَكِن الخير. البِعمِل الخير هو مِن الله، و البِعمِل الشَّر هو ما شاف الله.

¹² كُل النّاس بِشهَدو لِدِيمِتْرِيُوس، و الحَق نَفسو يَشهَد ليهو. و نِحنا كَمان نَشهَد ليهو، و إنتو بِتَعرِفو شَهادَتنا هي حَقيقيَه.

¹³ كانَت عِندي حاجات كَتيرَه عَشان أكتِبا ليك، لَكِن أنا ما بَدور أكتِب ليك بِحِبِر و قَلَم.

¹⁴ لَكِن عِندي رَجاء أن أشوفَك بَعَد شوَيَه، و بِنِتكَلَّم وَش لِوَش.

¹⁵ السَّلام ليك. المَحبوبين يَسَلِّمو عَليك. سَلِّم عَلى المَحبوبين بِأساميهُم.