٢ تِيمُوثَاوُس 4 - كِتاب العَهد الجَّديد مِن الكِتاب المُقَدَّس

¹ و بَدّيك الأمر دا قِدّام الله و قِدّام المَسيح يَسُوع البِحكُم عَلى الحَيين و المَيِّتين بِظُهورو و مَلَكوتو.

² بَشِّر بِالكِلمَه، و كون جاهِز في وَكتو و مُش في وَكتو، صَلِّح، و وَبِّخ، و شَجِّع بِكُلّو صَبر و تَعليم.

³ عَشان الوَكِت بِجي لَمّا النّاس ما يِتحَمَّلَو التَعليم الصَّحيح. لَكِن حَسَب الشَّهوات بِتاعتُم بِلِمّو لِنُفوسُم مُعَلِّمين عَشان يَقولو الهُم عاوزين بِشِدَّه أن يَسمَعو.

⁴ و هُم يَدَوِّرو إضنينُم مِن الحَق، و يَرَجِّعو عَنّو لِحِكايات النّاس.

⁵ لَكِن إنتَ، كون عاقِل في كُلّو شي، و إتحَمَّل التَّعب بِالصَّبر، و أعمِل عَمَل المُبَشِّر، وكَمِّل خِدمَتَك.

⁶ عَشان هَسَّع بِقَدِّموني زي ضَبيحَه، و الوَكِت جا عَشان أمشي.

⁷ أنا حارَبتَ الحَرب الكَويس، و تَميت سَبَقي، و حَفَظتو الإيمان.

⁸ و مِن هَسَّع مَحفوظ لَي تاج البِر. و الرَّب، القاضي العادِل، بِدّيهو لَي في اليوم داك، و مُش لَي بَس، لَكِن لِكُلُّهُم البِحِبّو ظُهورو كَمان.

كِلمات مَخصوصَه

⁹ أعمِل الأحسَن عَشان تَجي لَي بِسُرعَه.

¹⁰ عَلَشان دِيمَاس خَلّاني، عَشان هو حَبَّ الدُّنيا الحاضِرَه، و مَشى لِتَسَالُونِيكِي. كِرِيسْكِيس مَشى لِغَلَاطِيَّه، و تِيطُس لِ دَلْمَاطِيَّه.

¹¹ لُوقَا بَس مَعاي. أُخُد مَرْقُس و جيبو مَعاك، عَشان هو عِندو فايدَه لَي في خِدمَتي.

¹² و أنا رَسَّلتَ تِيخِيكُس لِأفَسُس.

¹³ و لَمّا تَجي، جيب التّوب الأنا خَلّيتو في تَرُوَاس مَعَ كَارْبُس، و الكُتُب، و خُصوصاً المَكتوبَه في الجِّلِد زي الوَرَق.

¹⁴ عَشان إِسْكَنْدَر النَّحّاس سَوّا لَي حاجات بَطّالَه كَتيرَه. و الرَّب بِدفَع ليهو تاني لِكُلّو أعمالو.

¹⁵ و إنتَ كَمان تَحرَس مِنّو، عَشان هو عاكَس كلماتنا كَتير.

¹⁶ أوَّل مَرَّه في قَضيَّتي، و لا واحِد وَقَف مَعاي، لَكِن كُلُّهُم خَلّوني. الله ما يَحسِب دا عَليهُم!

¹⁷ و لَكِن الرَّب وَقَف مَعاي و شَدَّدني عَلَشان أبَشِّر بِالإنجيل، و كُل الأُمَم بِسمَعو. و هو خَلَّصني مِن خَشم الأسَد.

¹⁸ و الرَّب بِحفَظني مِن كُلّو عَمَل شَرّير، و بِخَلِّصني لِمَلَكوتو الفي السَّما. و ليهو المَجد لِلأبَد. آمين.

¹⁹ سَلِّم عَلى بِرِسكا و أَكِيلَا و عَلى أهل بيت أُونِيسِيفُورُس.

²⁰ أَرَاسْتُس إستَنّى في كُورِنْثُوس، لَكِن أنا خَلّيت تُرُوفِيمُس في مِيلِيتُس عَيّان.

²¹ أعمِل الأحسَن عَشان تَجي قُبّال الشِّتا. أَفْبُولُس يَسَلِّم عَليك و بُودِيس كَمان و لِينُوس و كَلُودِيَا و كُل الأخوان.

²² الرَّب يَسُوع المَسيح مَعَ روحَك. النِّعمَه مَعاكُم.