٢ تِيمُوثَاوُس 3 - كِتاب العَهد الجَّديد مِن الكِتاب المُقَدَّس

الخَطيَّه في الأيام الأخيرَه

¹ و أعرِف دا، في الأيام الأخيرَه، زَمَن صَعب بِجي.

² عَشان النّاس بِحِبّو نُفوسُم و بِحِبّو المال، بِحمَدو نُفوسُم، بِكونو مِتكَبِّرين، بِشتِمو، ما بِطيعُو والِدينُم، ما بِشكُرو، بِكونو وَسخانين،

³ و هُم بِدون مَحَبَّه، ما بِغفِرو، شَتَّامين، بِدون مَسِك النَّفس، قاسيين، بِكرَهو الكوَيس.

⁴ و هُم خايِنين، جَرّايين، مُحِبّين نُفوسُم، بِحِبّو السُّرور لَكِن ما بِحِبّو الله.

⁵ عِندَهُم صورَة خوف الله لَكِن هُم بِنكُرو قُوَّتو. كون بَعيد مِن ديل.

⁶ عَشان هُم مِن النّاس البِدِسّو في البُيوت و يَقبُضو عَلى نِسوان بَليدات، البِشيلو حِمِل خَطايا كَتيرَه، و شَهوات مُختَلِفَه بِقودوهُم.

⁷ هُم بِتعَلَّمو دايماً، و ما بِقدَرو يَجو لِمَعرِفَة الحَق أبَداً.

⁸ و زي ما يَنّيس و وَيَمْبِرِيس عاكَسو مُوسَى، ديل كَمان بِعاكِسو الحَق، و هُم رُجال عِندَهُم أفكار خَربانَه و بِخُصوص الإيمان، هُم مَرفوضين.

⁹ لَكِن هُم ما بِتقَدَّمو بَعَد دا، عَلَشان بَلادَتُم تَكون بَايِنَه لِكُل النّاس، زي ما بَلادَة ديلاك كانَت بَايِنَه كَمان.

بُولُس يأمُر تِيمُوثَاوُس

¹⁰ و لَكِن إنتَ تِبِعتَ تَعليمي، و مَشيَتي، و قَصدي، و إيماني و صَبري، و مَحَبَّتي، و إحتِمالي،

¹¹ و طُرودي، و أتعابي الحَصَلَت لَي في أنطاكيّا و وَإِيقُونِيَّةَ و لِسترَه، الطُّرود الأنا إتحَمَّلتا. لَكِن الرَّب خَلَّصني مِن كُلّو دا.

¹² و بِالحَق بِطرُدو كُل العاوزين يَعِيشو في خوف الله في المَسيح يَسُوع.

¹³ لَكِن النّاس البَطّالين و البِغِشّو بِزيدو في الشَّر، و هُم بِغِشّو و بِكونو مَغشوشين.

¹⁴ و لَكِن إنتَ، إستَمِر في الحاجات الإتعَلَّمتا و بِقيت مِتأكِّد مِنَّها، عَلَشان إنتَ بِتَعرِف مِن مِنو إتعَلَّمتَها.

¹⁵ و مِن وَكِت إنتَ طِفل، كُنتَ تَعرِف الكُتُب المُقَدَّسَه البِتَقدَر تَديك فَهم لِلخَلاص بِالإيمان الفي المَسيح يَسُوع.

¹⁶ عَشان الكِتاب كُلّو إتنَفَّس بِالله، و عِندو فايدَه لِلتَعليم، و عَشان يَوَبِّخ، و يَصَلِّح، و يَعَلِّم الحَياة الفي البِر،

¹⁷ عَشان راجِل الله يَكون كامِل، جاهِز لِكُلّو عَمَل كوَيس.