٢ تِيمُوثَاوُس 2 - كِتاب العَهد الجَّديد مِن الكِتاب المُقَدَّس

العَسكَري الأمين

¹ عَلَشان كِدا، يا وَلَدي، إتشَدَّد في النِّعمَه الفي يَسُوع المَسيح.

² و الحاجات السِّمِعتَ مِنّي قِدّام شاهِدين كُتار، سَلِّما لِرُجال أُمَنا البِقدَرو يَعَلِّمو التّانيين كَمان.

³ أشتَرِك في حِمِل التَّعب زي عَسكَري كوَيس لِلمَسيح يَسُوع.

⁴ ما في واحِد اليَحارِب البِكون مَربوط لِحاجات الحَياة دي. هو عاوِز يَبسِط الدّخَّلو لِلخِدمَه العَسكَريَّه.

⁵ و كِدا كَمان، أي واحِد اليَجري في سَبَق، ما ياخُد التّاج إذا ما يَجري حَسَب القانون.

⁶ المُزارِع البِتعَب لازِم يَكون الأوَّل لِياخُد جُزو في الثَّمار.

⁷ فَكِّر في البِقولو، و الرَّب يَدّيك فَهم في كُلّو حاجَه.

⁸ إتزَكَّر يَسُوع المَسيح القام مِن بين المَيِّتين، مِن أهل دَاوُد، حَسَب إنجيلي.

⁹ و فِشانّو أنا بَتحَمَّل التَّعب حَتّى الجَّنازِير زي مُذنِب. لَكِن كِلمَة الله ما مَربوطَه.

¹⁰ عَلَشان كِدا، أنا أصبُر عَلى كُلّو حاجَه فِشان المُختارين، عَشان هُم كَمان يِلقو الخَلاص الفي المَسيح يَسُوع مَعَ المَجد الأبَدي.

¹¹ الكِلمَه دي أمينَه: ”إذا مُتنا مَعاهو، بِنعيش مَعاهو كَمان.

¹² إذا نَصبُر، بِنَملِك مَعاهو كَمان. و إذا نَنكُرو، هو بِيَنكُرنا كَمان.

¹³ و إذا نِحنا مُش أُمَنا، هو يِستَمِر أمين، عَلَشان هو ما بِقدَر يَنكُر نَفسو.“

الشَّغال المَقبول

¹⁴ زَكِّرُم بِالحاجات دي، و حَزِّرُم قِدّام الرَّب أن ما تَشاكِلو عَن كِلمات الما فيها فايدَه. عَلَشان دا يَخَرِّب ديل البِسمَعو.

¹⁵ أعمِل الأحسَن عَشان تَقَدِّم نَفسَك مَقبول لِلَّه، شَغّال الما لازِم يَخجَل، و البِعَلِّم كِلمَة الحَق بِطَريق تَمام.

¹⁶ لَكِن كون بَعيد مِن الكَلامات الفاضيَه الوَسخانَه، عَشان النّاس البِتكَلَّمو كِدا بِزيدو أكتَر في الشَّر.

¹⁷ و تَعليمُم بِفَرتِك زي الحاجَه البِتاكُل قَوام. و بِينُم هِمِنَايُوس و وَفِيلِيتُوس.

¹⁸ و هُم ضَلّو عَن الحَق. هُم بِقولو القيامَه فاتَت مِن قُبّال. و هُم يَقلِبو إيمان بَعض مِن النّاس.

¹⁹ و لَكِن أساس الله الثّابِت يَقوم، و فوقو الخِتِم دا: ”الرَّب بِيَعرِف النّاس بِتاعو،“ و: ”كُلّو واحِد البِعتَرِف بِإسم الرَّب لازِم يَكون بَعيد مِن الخَطيَّه.“

²⁰ و في بيت كَبير، البُرام ما بِكونو مِن دَهَب و فِضَّه بَس، لَكِن خَشَب و طين كَمان. و بَعَض مِنَّهُم بِكونو لِلإحتِرام و بَعض مِنَّهُم بِكونو بِدون إحتِرام.

²¹ و إذا أي واحِد يَنَضِّف نَفسو مِن دي، هو بِكون بُرمَه لِلإحتِرام، مُقَدَّس، و فيهو فايدَه لِلسَّيد، و جاهِز لِكُلّو عَمَل طَيب.

²² أجري مِن الشَّهوات بِتاعَت الشَّباب، و أمشي وَرا البِر و الإيمان و المَحَبَّه و السَّلام مَعَ النّاس البِنادو بِالرَّب مِن قَلِب نَضيف.

²³ أرفُض الأسئلَه الغَشيمَه و البَليدَه، عَشان إنتَ بِتَعرِف هُم بِجيبو الشَّكلات.

²⁴ و خَدّام الرَّب ما لازِم يَشاكِل، لَكِن يَكون لَطيف مَعَ كُلّو زول، و بِقدَر يَعَلِّم بِالصَّبر.

²⁵ و البِعاكِسوهو، يَعَلِّمُم بِطَريق لَطيف عَشان يِمكِن الله بِدّيهُم التّوبَه لِمَعرِفَة الحَق.

²⁶ و هُم بِرجَعو لِنُفوسُم و يَهرُبو مِن فَخ إبْلِيس، القَبَض عَليهُم لِيَعمِلو إرَادَتو.