٢ تَسَالُونِيكِي 3 - كِتاب العَهد الجَّديد مِن الكِتاب المُقَدَّس

صَلّو فِشانّا

¹ في الآخِر، يا أخوان، صَلّو فِشانّا، عَلَشان كِلمَة الرَّب تَجري و تِتمَجَّد زي ما عَمَلَت مَعاكُم كَمان.

² و صَلّو عَشان الله بِخَلِّصنا مِن النّاس البَطّالين و روسينُم قَوّيين. عَلَشان مُش كُل النّاس عِندَهُم الإيمان.

³ لَكِن الرَّب أمين، و هو بِثَبِّتكُم و بِحفَظكُم مِن الشَّرّير.

⁴ و عِندَنا تأكيد في الرَّب إنَّكُم بِتَعمِلو زي ما نَدّيكُم أمر و إنتو تِستَمِرّو تَعمِلوهو كَمان.

⁵ و الرَّب يَقود قُلوبكُم لِمَحَبَّة الله و لِصَبر المَسيح.

بُولُس يَحَذِّر الكَسلانين

⁶ و نَدّيكُم أمر، يا أخوان، بِإسم رَبَّنا يَسُوع المَسيح، كونو بَعيدين مِن كُلّو أخو البِكون كَسلان و الما بِعِيش حَسَب التَّعليم القِبِلتوهو مِنَّنا.

⁷ عَشان إنتو نُفوسكُم بِتَعرِفو كيف لازِم تَعمِلو زي ما نِحنا نَعمِل. عَشان نِحنا ما كُنّا كَسلانين لَمّا كُنّا مَعاكُم،

⁸ و ما أكَلنا عيش واحِد زول مَجّاناً. لَكِن كُنّا نَشتَغِل بِتَعب شَديد ليل و نَهار، عَلَشان ما نَكون حِمِل لِأي واحِد مِنَّكُم.

⁹ و عَمَلنا كِدا، مُش عَشان ما عِندَنا سُلطَه، لَكِن عَشان نَعمِل نُفوسنا مَثَل ليكُم عَشان تَعمِلو زيَنا.

¹⁰ عَلَشان لَمّا كُنّا مَعاكُم، أمَرناكُم بِدا: ”إذا كان أي واحِد ما عاوِز يَشتَغِل، هو ما بياكُل.“

¹¹ عَشان نَسمَع في ناس بينكُم كَسلانين و ما بِشتَغِلو أبَداً، لَكِن بِكونو مَشغولين بِالما بِخُصُّم.

¹² و نَدّي أمر لِلنّاس زي ديل بِإسم الرَّب يَسُوع المَسيح. و نَطلُب مِنَّهُم يَشتَغِلو بِسَلام و ياكُلو العيش بِتاعُم.

¹³ و إنتو، يا أخوان، ما تَكونو تَعبانين مِن عَمَل الخير.

¹⁴ إذا كان أي واحِد ما بِطيع كَلامنا في الجَّواب دا، خَلّو بالكُم مِنّو. ما تَقعُدو مَعاهو، عَشان هو بِكون خَجلان.

¹⁵ لَكِن ما تَحسِبوهو زي عَدو، لَكِن حَذِّروهو زي أخو.

¹⁶ و رَب السَّلام نَفسو يَدّيكُم السَّلام كُلّو وَكِت و بِكُلّو طَرِيقَه. الرَّب يَكون مَعَ كُلُّكُم.

¹⁷ أنا، بُولُس، بَكتِب السَّلام دا بِإيدي. و دي العَلامَه في كُلّو جَواباتي. كِدا أنا بَكتِب.

¹⁸ نِعمَة رَبَّنا يَسُوع المَسيح مَعَ كُلُّكُم.