٢ تَسَالُونِيكِي 2 - كِتاب العَهد الجَّديد مِن الكِتاب المُقَدَّس

إنسان الخَطيَّه

¹ و عَشان رَبَّنا يَسُوع المَسيح بِجي و نِحنا نَجتَمِع ليهو، نَسألكُم، يا أخوان،

² ما تَخَلّو فِكرَكُم بِتغَيَّر و لا تِتحَيَّرو مِن ديل البِقولو يوم الرَّب جا خَلاص. حَتّى إذا الخَبَر دا كان مِن روح ولّا مِن كَلام، ولّا مِن جَواب هُم بِقولو هو جا مِنَّنا.

³ ما تَخَلّو أي واحِد يَغِشّكُم بِأي طَرِيقَه. اليوم داك ما بِجي إلّا النّاس يَرجَعو عَن الإيمان في الأوَّل و إنسان الخَطيَّه، إبن الخَراب يَظهَر.

⁴ هو يَقاوِم و يَرفَع نَفسو فوق كُلّو حاجَه اليَسَموها إلَه ولّا يَعبُدوها، حَتّى هو يَقعُد في هيكَل الله و يَوَرّي نَفسو زي ما هو إلَه.

⁵ ما تِتزَكَّرو، و أنا لِسَّع كُنتَ مَعاكُم، كُنتَ بَقول ليكُم الحاجات دي؟

⁶ و إنتو بِتَعرِفو الحاجَه البِتَمنَعو هَسَّع حَتّى يَظهَر في وَكتو.

⁷ عَشان سِر الخَطيَّه بِشتَغِل هَسَّع، حَتّى اليَمنَع ظُهور إبن الخَراب، يَروح مِن الوَسط.

⁸ و بَعَد دا، يَظهَر إنسان الخَطيَّه. و الرَّب يَسُوع بِغلِبو بِنَفَس خَشمو، و بِخَرِّبو بِمَجدو لَمّا بِجي.

⁹ و إنسان الخَطيَّه بِجي بِعَمَل الشّيطان و بِكُلّو قُوَّه، و عَلامات و عَجايِب كَضب،

¹⁰ و بِكُلّو غِش الشَّر لِلبِهلِكو. عَلَشان هُم ما قِبلو مَحَبَّة الحَق عَشان يَخلَصو.

¹¹ و عَلَشان كِدا، الله يَرَسِّل ليهُم عَمَل الكِضِب، حَتّى يَصَدِّق، الكِضِب،

¹² و عَلَشان كُل الما صَدَّقو الحَق لَكِن فِرحو بِالخَطيَّه، يِتحَكَمو.

كونو ثابِتين

¹³ و لَكِن نِحنا لازِم نَشكُر الله دايماً فِشانكُم، يا أخوان المَحبوبين مِن الرَّب. و نَشكُر الله عَشان هو إختاركُم مِن البِدايَه عَشان تَخلَصو بِالقَداسَه المِن الرّوح و بِالإيمان بِالحَق.

¹⁴ و هو ناداكُم لِدا بِإنجيلنا، عَشان تَقبَلو مَجد رَبَّنا يَسُوع المَسيح.

¹⁵ عَلَشان كِدا، يا أخوان، كونو ثابِتين و أمسِكو التَّعاليم الإتعَلَّمتوها، إذا بِكَلامنا ولّا بِجَوابنا.

¹⁶ و رَبَّنا يَسُوع المَسيح نَفسو، و الله أبونا، الحَبّانا و أدّانا بِنِعمَتو شَجاعَه أبَديَّه و رَجاء كوَيس،

¹⁷ يَشَجِّع قُلوبكُم و يَثَبِّتكُم في كُلّو عَمَل و كَلام كوَيس.