٢ بُطْرُس 3 - كِتاب العَهد الجَّديد مِن الكِتاب المُقَدَّس

يوم الرَّب

¹ يا أخواني المَحبوبين، هَسَّع دا هو الجَّواب التّاني بَكتِبو ليكُم. و فيهُم الإتنين بَزَكِّركُم عَشان أحَرِّك عُقولكُم المُخلِصَه.

² أنا عاوِزكُم تِتزَكَّرو كِلمات الأنبياء القِدِّسين الإتكَلَّمو بيها مِن قُبّال، و أمر الرَّب و المُخَلِّص الجّا ليكُم بِرُسُلكُم.

³ و في الأوَّل أعرِفو إنّو في الأيام الأخيرَه بِجو ناس البِضحَكو عَلى الحَق، و بِعيشو حَسَب شَهوات نُفوسُم.

⁴ هُم بِقولو: ”هو وَعَد ليكُم إنّو بِجي. هو وين؟ مِن وَكِت أبَهاتنا نامو، كُلّو شي يِستَمِر زي ما هو كان مِن بِدايَة الخَليقَه.“

⁵ و بِإختيارُم، هُم يَنسو إنّو بِكِلمَة الله السَّما كانَت في مِن زَمَن قَديم، و الأرض كانَت مَصنوعَه مِن المويَه و بِالمويَه.

⁶ و المويَه غَطَّت الدُّنيا بِتاعَت الزَّمَن دا و خَرَّبَتا.

⁷ و لَكِن السَّماوات و الأرض المَوجودَه هَسَّع، بِالكِلمَه ديك زاتا، مَخزونَه لِلنّار. و بِتكون مَحفوظَه لِيوم الحُكم و خَراب النّاس الما بِخافو الله.

⁸ لَكِن ما تَنسو الحاجَه الواحدَه دي، يا مَحبوبين، يوم واحِد مَعَ الرَّب زي ألف سَنَه، و ألف سَنَه زي يوم واحِد.

⁹ و الرَّب ما مِتأخِّر بِوَعدو زي ما بَعض مِن النّاس يَفتَكِرو. لَكِن هو عِندو صَبر عَليكُم، و ما عاوِز واحِد يَموت، لَكِن عاوِز الكُل يَجو لِلتّوبَه.

¹⁰ و لَكِن يوم الرَّب بِجي زي الحَرامي. و في اليوم داك، السَّماوات بِفوتو بِصوت عالي، و النُّجوم بيَهلِكو مِن الحَر، و الأرض و الأشغال الفيها بِنحَرِقو.

¹¹ و ما دام كُل الحاجات دي بِتَهلِكو كِدا، ياتو نوع مِن النّاس لازِم تَكونو في مَشي مُقَدَّس و في خوف الله؟

¹² و إنتو مُنتَظِرين و مِستَعجِلين يوم الله البِجي. عَلَشان اليوم داك بِجيب خَراب السَّماوات بِالنّار، و الحَر الشَّديد بِخرَب النُّجوم.

¹³ لَكِن حَسَب وَعدو نَنتَظِر سَماوات جَديدَه و أرض جَديدَه، البِسكُن فيها البِر.

¹⁴ عَلَشان كِدا، يا مَحبوبين، و إنتو مِستَنّين الحاجات دي، إشتَغِلو شَديد عَشان تَكونو نُضاف و بِدون عيب و عَشان يَكون عِندَكُم سَلام مَعاهو.

¹⁵ و أحسِبو إنّو صَبر رَبَّنا فُرصَه لِلخَلاص. زي ما أخونا الحَبيب بُولُس كَمان كَتَب ليكُم بِحَسَب الحِكمَه الأدّاهو الله.

¹⁶ زي ما هو بِكتِب في كُلّو جَواباتو، و يتكَلَّم عَن الحاجات دي. و بَعض مِن الحاجات دي بِكونو صَعبَه لِلفَهم. و النّاس الما عِندَهُم مَعرِفَه و ما ثابِتين، يَتَرجِموها بِالكِضِب. و هُم يَعمِلو زي دا بِالكُتُب التّانيَه. و كِدا يَجيبو الخَراب عَلى نُفوسُم.

¹⁷ و عَلَشان كِدا، إنتو، يا مَحبوبين، عارِفين دا مِن قُبّال، أحرِسو عَشان غَلَط النّاس الما يَحفَظو القانون ما يَقودكُم و إنتو تَقَعو مِن مَحَلّكُم الثّابِت.

¹⁸ و لَكِن أكبَرو في النِّعمَه و في مَعرِفَة رَبَّنا و مُخَلِّصنا يَسُوع المَسيح. ليهو المَجد هَسَّع و لِلأبَد! آمين.