٢ بُطْرُس 2 - كِتاب العَهد الجَّديد مِن الكِتاب المُقَدَّس

مُعَلِّمين كَضّابيين و خَرَابُم

¹ و كانو بين النّاس أنبياء كاضِبين كَمان، زي ما بِكونو بينكُم مُعَلِّمين كاضِبين كَمان. و هُم بِجيبو بِالسِّر أفكار خَرابيَه، حَتّى يَنكُرو الرَّب الإشتَراهُم. و يَجيبو عَلى نُفوسُم خَراب سَريع.

² و كَتيرين ماشين يَتبَعو طُرُقُم البِخَرِّبو. و بِالسَّبَب دا النّاس يَجَدِّفو عَلى طَريق الحَق.

³ و في طَمَعُم المُعَلِّمين ديل بِياخدو رِبِح مِنَّكُم بِكلماتُم الكاضَبَه. و الحُكم بِتاعُم ما يِتأخَّر، و خَرَابُم ما نايِم.

⁴ عَشان الله ما رَحَم عَلى المَلائكَه العَمَلو خَطيَّه، لَكِن رَماهُم في جَهَنَّم. و هو سَلَّمُم لِسُجون الضُّلُمَّه عَشان يَحفَظُم لِلدّينونَه.

⁵ و الله ما رَحَم عَلى الدُّنيا القَديمَه لَمّا هو جاب الطَّوَفان عَلى ناس الدُّنيا الما خافو الله. لَكِن الله حَفَظ نُوح، مُبَشِّر لِلبِر، و سَبعَه تانيين.

⁶ و الله حَكَم بِالخَراب عَلى المَدينَتين، سَدوم و عَمورَه. و حَرَقُم حَتّى بِقو رَماد، و عَمَلُم مَثَل لِلنّاس البِعيشو حَياة بِدون ما يَخافو الله.

⁷ و هو خَلَّص لوط البار، الإتحَيَّر مِن الحَياة الوَسخانَه بِتاعَت النّاس البِدون قانون.

⁸ عَشان الرّاجِل البار داك كان ساكِن بِينُم يوم بَعَد يوم. و كان تَعبان في نَفسو البار مِن الحَياة الشَّرّيرَه الهو شافا و سِمِع بيها.

⁹ و كِدا الرَّب بِيَعرِف كيف يَخَلِّص البِخافوهو مِن التَجرِبَه، و يَحفَظ الشَّرّيرين لِيوم الدّينونَه عَشان يَعاقِبُم.

¹⁰ و بِكون كِدا خُصوصاً لِديل اليَمشو في شَهوَه وَسخانَه بِتاعَت الجِّسِم، و يَحتَقِرو السُّلطَه. النّاس ديل بِدون خوف و مِتكَبِّرين، و ما بِخافو يَجَدِّفو عَلى العِندَهُم مَجد.

¹¹ حَتّى المَلائكَه و هُم عِندَهُم قُوَّه و قُدرَه أكتَر، ما يَحكُمو عَليهُم قِدّام الرَّب بِحُكم فيهو شَتيمَه.

¹² لَكِن النّاس ديل يَجَدِّفو عَلى حاجات ما يَفهَموها. هُم زي الحَيوانات الما عِندَهُم عَقل، اليَمشو بِالطَّبيعَه، مَولودين عَشان يَمسِكوهُم و يَكتُلوهُم، و زي الحَيوانات، كَمان بِيَخرَبوهُم في الخَراب بِتاعُم.

¹³ و بِدفَعو ليهُم تَعب زي أُجرَة التَّعب الهُم عَمَلوهو. هُم يَحسِبوهو سُرور أن يَعِيشو حَياة ناعِمَه بِالنَّهار. و هُم نُقَط وَسخانَه و عُيوب، و عِندَهُم فَرَح شَديد في غِشُّم لَمّا ياكُلو في العَزومَه مَعاكُم.

¹⁴ و هُم بِعاينو لِلزّانيين، و ما بِكونو تَعبانين مِن الخَطيَّه أبَداً، و يَغِشّو النّاس الما ثابِتين. و هُم بِقو شاطرين في الطَّمَع، أولاد اللَّعنَه!

¹⁵ النّاس ديل سابو الطَّرِيق العَديل و ضَلّو، عَشان يَمشو وَرا طَريق بَلعام وَلَد بَعُور الحَبَّ أُجرَة الخَطيَّه.

¹⁶ لَكِنّو كان مَوَبَّخ عَلى خَطِيَّتو لَمّا حُمار ما عِندو صوت إتكَلَّم بِصوت إنسان و مَنَع بَلادَة النَّبي.

¹⁷ النّاس ديل أبيار بِدون مويَه، غَمام تَسوقو الهَبوب. و الضُّلُمَّه الغَريقَه مَحفوظَه ليهُم.

¹⁸ عَشان هُم يِتكَلَّمو بِكِلمات مِتكَبِّرَه و فاضيَه. و يَغِشّو بِشَهوات الجِّسِم و الخَراب، النّاس القَرَّبو يَنجو مِن ديل البِعيشو في الغَلطَه.

¹⁹ هُم يَدّوهُم وَعد الحُرّيَّه، و هُم نُفوسُم عَبيد الخَراب. عَشان الزّول يَكون عَبد لِلحاجَه الغَلَبَتو.

²⁰ عَشان إذا هُم نَجو مِن خَرابات الدُّنيا بِمَعرِفَة الرَّب و المُخَلِّص يَسُوع المَسيح، و بَعَد دا رَجَعو و إتغَلَبو، حالُم في الآخِر بِكون أكعَب مِن الأوَّل.

²¹ عَشان كان أحسَن ليهُم إذا ما عِرِفو طَريق البِر، مِن ما بَعَد ما عِرِفوهو يَرَجِّعو عَن الأمر المُقَدَّس الكان مَسَلَّم ليهُم.

²² و حَصَل ليهُم زي المَثَل الحَقيقي: ”الكَلِب يَرجَع لِقَضفو و الكَدروك المَغسول يَرجَع و يَدَردِق في الطّين.“