٢ بُطْرُس 1 - كِتاب العَهد الجَّديد مِن الكِتاب المُقَدَّس

¹ مِن سِمْعَان بُطْرُس خَدّام يَسُوع المَسيح و رَسولو، ليهُم القِبلو إيمان غالي زي إيمانَنا بِبِر إلَهنا و مُخَلِّصنا يَسُوع المَسيح.

² النِّعمَه و السَّلام يَزيدو ليكُم بِمَعرِفَة الله و يَسُوع رَبَّنا.

ثَبِّتو إختياركُم

³ عَشان قُدرَة الله نَفسو أدّانا كُلّو حاجَه النَّحتاج ليها لِلحَياة و لِخوف الله. و لَمّا نَعرِفو، نِتعَلَّم إنّو نادانا لِمَجد نَفسو و خيرو.

⁴ و كِدا هو أدّانا الوُعود الغاليَه و العَظيمَه جِدّاً، عَلَشان بِالوُعود تَبقو شُرَكا الطَّبيعَه بِتاعَت الله. و تَنجو مِن الخَراب الفي الدُّنيا بِسَبَب الشَّهوَه.

⁵ و بِالسَّبَب دا زاتو، أعمِلو الأحسَن عَشان تَزيدو لِإيمانكُم خير، و تَزيدو لِلخير مَعرِفَه.

⁶ و تَزيدو لِلمَعرِفَه مَسِك النَّفس، و لِمَسك النَّفس الصَّبر، و لِلصَّبر خوف الله،

⁷ و لِخوف الله حُب الأخوان، و لِحُب الأخوان المَحَبَّه.

⁸ عَشان إذا عِندَكُم الحاجات دي فيكُم بِالكَترَه، يَعمِلوكُم مُش كَسلانين ولّا بِدون ثِمار في مَعرِفَة رَبَّنا يَسُوع المَسيح.

⁹ و أي زول الما عِندو الحاجات دي، هو عَميان و نَظَرو ضَعيف. و هو نِسى إنّو مَغَسَّل مِن خَطاياهو الفاتَت.

¹⁰ و عَلَشان كِدا، يا أخوان، جَرِّبو زِيادَه أن تَثَبِّتو إختياركُم و إنتِخابكُم المِن الله. عَشان إذا بِتَعمِلو الحاجات دي، إنتو ما تَقَعو أبَداً.

¹¹ و كِدا بِكون مُجَهَّز ليكُم دُخول بِغِنى لِمَلَكوت رَبَّنا و مُخَلِّصنا يَسُوع المَسيح الأبَدي.

نُبُوَّة الكِتاب المُقَدَّس

¹² عَلَشان كِدا أنا بَكون جاهِز دايماً عَشان أذَكِّركُم بِالحاجات دي، مَعَ أنَّكُم بِتَعرِفوها و إنتو ثابِتين في الحَق العِندَكُم.

¹³ و ما دام أنا في خيمَة الجِّسِم دا، أحسِب دا صَحيح أحَرِّكُّم عَشان تِتزَكَّروها.

¹⁴ و بَعرِف بَعَد شوَيَه أنا بَقلَع خيمَة جِسمي زي ما رَبَّنا يَسُوع المَسيح وَرّاهو لَي.

¹⁵ و أنا بَشوف كوَيس كيف أذَكِّركُم عَشان بِتَقدَرو تِتزَكَّرو دايماً الحاجات دي بَعَد موتي.

¹⁶ عَشان نِحنا ما تَبَعنا حِكايات شاطرَه لَمّا عَلَّمناكُم عَن قُدرَة رَبَّنا يَسُوع المَسيح و كيف هو بِجي. لَكِن نِحنا بِعُيونَنا شُفنا مَجدو.

¹⁷ عَشان هو أخَد مِن الله الأبو الإحتِرام و المَجد لَمّا الصّوت جا ليهو مِن المَجد العَظيم، القال: ”دا هو إبني الحَبيب، و أنا مَبسوط بيهو.“

¹⁸ و نِحنا سِمِعنا الصّوت دا جاي مِن السَّما لَمّا كُنّا مَعاهو في الجَّبَل المُقَدَّس.

¹⁹ و عِندَنا كِلمَة النُّبوَّه المِتأكِّدَه أكتَر. و إنتو تَعمِلو كوَيس إذا تَخَلّو بالكُم ليها. كلمَتُم زي فانوس بِنَوِّر في مَحَل الضُّلُمَّه لِغايَة ما النَّهار بِظهَر و نَجمَة الصَّباح تَطلَع في قُلوبكُم.

²⁰ و قَبل كُلّو شي، أعرِفو ما في أي نُبوَّه في الكِتاب جات بِتَرجَمَة النَّبي بِنَفسو.

²¹ عَلَشان ما في نُبوَّه أبَداً جات مِن إرادَة زول، لَكِن رُجال إتكَلَّمو مِن الله، زي الرّوح القُدُس كان بِقودُم.