٢ يُوحَنَّا 1 - كِتاب العَهد الجَّديد مِن الكِتاب المُقَدَّس

¹ مِن الشّيخ لِلسَّيِّدَه المُختارَه و لِأولادا الأنا بَحِبُّم في الحَق، و ما أنا بَس، لَكِن كُل البِعرِفو الحَق كَمان.

² عَشان خاطِر الحَق البِسكُن فينا و بِكون مَعانا لِلأبَد.

³ نِعمَه و رَحمَه و سَلام مِن الله الأبو و مِن يَسُوع المَسيح، إبن الأبو، بِتكون مَعانا في الحَق و المَحَبَّه.

⁴ فِرِحتَ جِدّاً عَشان لِقيت بَعَض مِن أولادِك ماشين في الحَق مِثِل ما الأبو أمَرنا.

⁵ و هَسَّع، يا سَيِّدَه، أنا ما كاتِب ليكي أمر جَديد، لَكِن الكان عِندَنا مِن البِدايَه. بَسأل أن نَحِب بَعَضَنا بَعض.

⁶ و دي هي المَحَبَّه، أن نَمشي بِحَسَب أوامِرو. زي ما سِمِعتو مِن البِدايَه، دا هو الأمر، أن تَمشو في المَحَبَّه.

⁷ عَشان ناس كُتار البِغِشّو مَرَقو لِلدُّنيا. و هُم ما بِعتَرِفو بِيَسُوع المَسيح إنّو جا في الجِّسِم. دا هو البِغِش و هو ضِد المَسيح.

⁸ شوفو نُفوسكُم عَشان ما تَوَدِّرو الإشتَغَلنا ليهو، لَكِن تَقبَلو أُجرَه تَمام.

⁹ و الما بِستَمِر في تَعليم المَسيح و يَجري قِدّامو، ما عِندو الله. و البِستَمِر في تَعليم المَسيح، هو عِندو الأبو و الإبن، هُم الإتنين.

¹⁰ إذا واحِد يَجيكُم و ما يَجيب التَّعليم دا، ما تَقبَلوهو في البيت و ما تَقولو ليهو ”سَلام.“

¹¹ عَشان البِسَلِّم عَليهو يَشتَرِك في أعمالو الشَّرّيرَه.

¹² عِندي حاجات كَتيرَه عَشان أكتِب ليكُم، لَكِن أنا ما داير أعمِلو بِوَرَق و حِبِر. بَدَل مِن دا أنتَظِر أن أجيكُم و أتكَلَّم وَش لِوَش، عَشان فَرَحنا بِكون كامِل.

¹³ أولاد أُختِك المُختارَه يَسَلِّمو عَليكي.