٢ كُورِنْثُوس 9 - كِتاب العَهد الجَّديد مِن الكِتاب المُقَدَّس

¹ و بِخُصوص الخِدمَه لِلقِدِّسين، ما في إحتِياج أكتِب ليكُم.

² عَشان أنا بَعرِف غيرَتكُم، و أنا شَكَّرتَ نُفوسكُم لِناس مَكِدونيَّه و قُلتَ ليهُم: ”ناس أَخَائِيَه كانو جاهِزين مِن السَّنَه الفاتَت.“ و غيرَتكُم حَرَّكَت الأكتَر مِنَّهُم.

³ و رَسَّلتَ الأخوان عَلَشان فَخرَنا فيكُم ما بِكون بِدون فايدَه، و عَشان إنتو بِتكونو جاهِزين زي ما قُلتَ عَنكُم.

⁴ عَلَشان إذا ناس مِن مَكِدونيَّه جو مَعاي و لِقوكُم ما جاهِزين، نِحنا بِنكون خَجلانين عَلَشان التأكيد دا. و أنا ما بَقول إنتو كَمان بِتكونو خَجلانين.

⁵ عَلَشان كِدا، إفتَكَرتَ مِن المُهِم أطلُب مِن الأخوان عَشان يَمشو قِدّامنا، و يَعمِلو التَّرتيب مِن قُبّال. و كِدا هَديَّتكُم، القُلتو بِالحَق إنتو تَدّوها، بِتكون جاهزَه زي بَرَكَه، و مُش مِن الطَّمَع.

البِزرَع بِالبَرَكات

⁶ لَكِن بَقول دا، البِزرَع قَليل، بِلِم قَليل. و البِزرَع بِالبَرَكات، بِلِم بِالبَرَكات كَمان.

⁷ و خَلّي كُلّو واحِد يَدّي زي ما إختار في قَلبو، مُش بِحُزن ولّا عَشان هو لازِم يَدّي، عَشان الله بِحِب البِدّي بِفَرَح.

⁸ و الله بِقدَر يَزيد ليكُم كُلّو نِعمَه، لِغايَة ما يَكون ليكُم كِفايَه في كُلّو حاجَه و في كُلّو وَكِت، عَلَشان تَزيدو في كُلّو عَمَل طَيب.

⁹ زي ما مَكتوب: ”هو فَرتَك، و أدّا لِلمَساكين. و بِرّو يِستَنّى لِلأبَد.“

¹⁰ و البِقَدِّم تيراب لِلمُزارِع و عيش لِلأكِل، هو بِقَدِّم و بِكَتِّر تيرابكُم و بِزيد ثِمار بِرَّكُم.

¹¹ و بِتكونو غَنيين في كُلّو حاجَه عَلَشان تَقدَرو تَدّو هَدايا كَريمَه. و دا يَعمِل بِواسطَتنا الشُّكر لِلَّه.

¹² و عَمَل الخِدمَه دي ما يَملى إحتِياج القِدِّسين بَس، لَكِن يَزيد في شُكر كَتير لِلَّه.

¹³ و عَلَشان إنتو بِيَّنتو نُفوسكُم بِالخِدمَه دي، ناس كُتار بِشكُرو الله عَلَشان طاعَتكُم و شَهادَتكُم لِإنجيل المَسيح، و عَلَشان الهَدِيَّه الكَبيرَه القَسَّمتوها ليهُم و لِلكُل.

¹⁴ و هُم بِحِبّوكُم لَمّا يَصَلّو فِشانكُم، عَلَشان الله أدّاكُم النِّعمَه دي العَظيمَه جِدّاً.

¹⁵ و شُكراً لِلَّه عَلى هَديَّاتو الما نَقدَر نِتكَلَّم عَنّا.