٢ كُورِنْثُوس 8 - كِتاب العَهد الجَّديد مِن الكِتاب المُقَدَّس

عَن الهَدِيَّه الكَريمَه

¹ و هَسَّع نَخَبِّركُم، يا أخوان، بِنِعمَة الله الهو أدّاها لِكَنايس مَكِدونيَّه.

² هُم كانو مُجَرَّبين بِتَعب شَديد، لَكِن بِقو مَبسوطين جِدّاً حَتّى أدّو هَدايا كَريمَه جِدّاً، و لَو هُم كانو مَساكين خالِص.

³ و بَشهَد إنَّهُم أدّو زي ما قِدرو، و لَكِن فوق ما قِدرو، و دا مِن نُفوسُم بَراهُم.

⁴ و طَلَبو مِنَّنا مَرّات كَتيرَه عَشان نَقبَل مِنَّهُم النِّعمَه و الشَّرِكَه في الخِدمَه دي لِلقِدِّسين.

⁵ و هُم ما عَمَلو زي ما إنتَظَرنا، لَكِن أدّو نُفوسُم لِلرَّب في الأوَّل، و لينا بِإرادَة الله.

⁶ عَشان كِدا طَلَبنا لِتِيطُس يَكَمِّل بينكُم النِّعمَه دي، زي ما هو إبتَدا يَعمِل مِن قُبّال.

⁷ لَكِن زي ما إنتو تَزيدو في كُلّو حاجَه، في الإيمان، في الكَلام، و المَعرِفَه، و كُلّو إهتِمام، و مَحَبَّتكُم لينا، عاوزينكُم تَزيدو في النِّعمَه دي كَمان.

⁸ أنا ما بِدّيكُم أمر، لَكِن لَمّا أوَرِّيكُم إهتِمام التّانيين، أمتَحِن مَحَبَّتكُم إذا حَقيقي ولّا لا.

⁹ عَشان إنتو بِتَعرِفو نِعمَة رَبَّنا يَسُوع المَسيح، إنّو هو غَني لَكِن بِقى مِسكين فِشانّا، عَلَشان نِحنا نَبقى غَنيين عَشان هو كان مِسكين.

¹⁰ و بَدّيكُم فِكري عَن دا، عَشان في فايدَه ليكُم. إنتو إبتَديتو مِن قُبّال مِن السَّنَه الفاتَت، مُش عَشان تَعمِلو دا بَس، لَكِن تَحِبّو تَعمِلو كِدا.

¹¹ هَسَّع كَمِّلو العَمَل كَمان. و كِدا، زي ما كانَت عِندَكُم الغيرَه عَشان تَعمِلوهو، كَمان تَكَمِّل عَلى قَدُر ما عِندَكُم.

¹² و إذا الغيرَه في، الله يَقبَل الهَدِيَّه زي الزّول عِندو، و مُش زي الما عِندو.

¹³ و دا ما عَشان التّانيين يَكون عِندَهُم راحَه و إنتو في التَّعب، لَكِن عَشان كُلّو حاجَه بِتكون سَوا.

¹⁴ عَشان في الوَكِت دا الكَترَه العِندَكُم بِتكون لِإحتياجُم. و الكَترَه العِندَهُم بِتكون لِإحتياجكُم. و كِدا كُلّو حاجَه بِتكون سَوا.

¹⁵ زي ما مَكتوب: ”الجَّمَع كَتير ما كان عِندو باقي، و الجَّمَع شوَيَه ما كان ناقِص ليهو.“

تِيطُس مُرسَل لِكُورِنْثُوس

¹⁶ و لَكِن شُكراً لِلَّه الخَتَّ نَفس الإهتِمام فِشانكُم في قَلب تِيطُس.

¹⁷ عَشان هو قِبِل الطَلَبنا مِنّو. و بِنَشاط كَتير، مَشى ليكُم بِإرادَة نَفسو.

¹⁸ و رَسَّلنا مَعاهو الأخو الحَمَدو كُل الكَنايس عَلى خِدمَتو في الإنجيل.

¹⁹ و مُش دا بَس، لَكِن هو كان مُختار بِالكَنايس عَشان يَسافِر مَعانا فِشان النِّعمَه دي، النَخدِما لِمَجد الرَّب نَفسو. و بِدا نَوَرّيهُم نِحنا عاوِزين نَساعِد.

²⁰ و نِحنا نحرِس عَلَشان واحِد ما يَقول حاجَه بَطّالَه عَن الهَدِيَّه الكَريمَه النَخدِما.

²¹ و نَفتَكِّر مِن قُبّال عَشان نَعمِل الحاجَه الكوَيسَه، مُش قِدّام الله بَس لَكِن قِدّام النّاس كَمان.

²² و رَسَّلنا مَعاهُم أخونا البِيَّن لينا إهتِمامو مَرّات كَتيرَه و في حاجات كَتيرَه. و لَكِن هَسَّع إهتِمامو زاد عَلَشان هو عِندو تأكيد كَتير فيكُم.

²³ و عَن تِيطُس، هو شَريك لَي و شَغّال مَعاي فِشانكُم. و عَن أخوانّا، هُم رُسُل الكَنايس و مَجد المَسيح.

²⁴ عَلَشان كِدا، وَرو الرُّجال ديل بيّنَة مَحَبَّتكُم و فَخرَنا فيكُم، قِدّام كُل الكَنايس.