٢ كُورِنْثُوس 6 - كِتاب العَهد الجَّديد مِن الكِتاب المُقَدَّس

¹ و نِحنا نَشتَغِل مَعاهو، و نَطلُب مِنَّكُم أن ما تَقبَلو نِعمَة الله بِدون فايدَه.

² عَشان هو بِقول: ”أنا سِمِعتَك في وَكِت مَقبول، و ساعَدتَك في يوم الخَلاص.“ شوف! هَسَّع وَكِت مَقبول، و شوف! هَسَّع يوم الخَلاص.

أتعاب بُولُس

³ و نِحنا ما نَخُت سَبَب خَطيَّه قِدّام أي واحِد، عَلَشان شُغُلنا بِكون بِدون لوم.

⁴ لَكِن في كُلّو شي نَبيين نُفوسنا زي خَدّامين الله: في صَبر كَتير، في أتعاب، في إحتِياجات، في ضيقات.

⁵ في ضَرَبات، و في سُجون، و في دَوشَه، و في تَعب شَديد، و في ليالي بِدون نوم، و في جوع.

⁶ بِقَلب نَضيف، و مَعرِفَه، و صَبر طَويل، و رَحمَه، بِالرّوح القُدُس، بِمَحَبَّه مُخلِصَه.

⁷ بِكَلام الحَق، بِقوَّة الله، بِأسلِحَة البِر عَن اليَمين و عَن الشِّمال.

⁸ بِمَجد و بِدون إحتِرام، بِخَبَر كوَيس و خَبَر بَطّال، يَقولو نِحنا كَضّابين، لَكِن نِتكَلَّم الحَق.

⁹ و نِحنا زي الما مَعروفين، لَكِن مَعروفين، زي ديل البِموتو، و أهو! نَعيش، و زي ديل اليَجازوهُم، و ما يَكتُلونا.

¹⁰ نِحنا زي حَزنانين، لَكِن دايماً مَبسوطين، زي المَساكين، لَكِن نَعمِل ناس كُتار غَنيين، نِحنا زي الما عِندَهُم شي، لَكِن كُلّو شي حَقَّنا.

¹¹ يا ناس كُورِنْثُوس، خَشُمنا مَفتوح ليكُم، و قَلِبنا بِقى وَصِف ليكُم.

¹² نِحنا ما قَفَلنا قُلوبنا ليكُم، لَكِن إنتو قَفَلتو قُلوبكُم لينا.

¹³ و زي أُجرَه لِداك، إنتو كَمان، أفتَحو قُلوبكُم وَصِف. بَكَلِّمكُم زي أولادي.

¹⁴ ما تَشتَرِكو مَعَ الما مؤمِنين تِحِت نير واحِد. عَشان الشَّرِكَه شِنو بين البِر و الخَطيَّه؟ و الشَّرِكَه شِنو بين النّور و الضَّلام؟

¹⁵ و الإتِّفاق شِنو بين المَسيح و بين بَليعال؟ و الجُّزو شِنو المؤمِن عِندو مَعَ الما مؤمِن؟

¹⁶ و الإتِّفاق شِنو بين هيكَل الله و الأصنام؟ عَشان نِحنا هيكَل الله الحَي، زي ما الله قال: ”أنا بَسكُن فيهُم و أمشي في وَسِطُم، و بَكون ليهُم إلَه، و هُم بِكونو لَي ناس.

¹⁷ عَلَشان كِدا أمرُقو مِن بِينُم، و فَرِّقو مِنَّهُم، يَقول الرَّب. و ما تَلمَسو حاجَه نَجِسَه. و أنا بَقبَلكُم.

¹⁸ و بَكون ليكُم أبو، و إنتو بِتكونو لَي أولاد و بَنات، يَقول الرَّب القادِر عَلى كُلّو شي.“