٢ كُورِنْثُوس 5 - كِتاب العَهد الجَّديد مِن الكِتاب المُقَدَّس

مَسكَنّا في السَّما

¹ عَشان بِنَعرِف إذا بيت خيمَتنا المِن الأرض يَخسَر، عِندَنا بُنا مِن الله، بيت أبَدي في السَّما، ما مَعمول بِإيد.

² و هَسَّع نِحنا حَزنانين، و نَحِب نَلبَس فوقنا بيتنا المِن السَّما.

³ و إذا لِبِسناهو، ما يَلقونا عَريانين.

⁴ و وَكِت ما نِحنا في الخيمَه دي، نِتنَفَّس زي ما نَشيل حِمِل تَقيل. عَلَشان ما عاوزين نَقلَع أجسامنا، لَكِن نَلبَس فوقا، عَلَشان أجسامنا البِموتو يِتغَيَّرو لِأجسام ما بِموتو أبَداً.

⁵ و العَمَلنا لِلحاجَه دي زاتا، هو الله، الأدّانا كَمان عَربون الرّوح.

⁶ عَلَشان كِدا نِحنا دايماً مَليانين بِشَجاعَه، و بِنَعرِف ما دام نِحنا في بيتنا في الجِّسم هِنا، نِحنا بَعيدين مِن بيت الرَّب الفي السَّما.

⁷ عَشان بِنعيش بِالإيمان، مُش بِالنَشوفو بِالعُيون.

⁸ عَلَشان كِدا عِندَنا شَجاعَه كُلّو وَكِت، و نَفتَكِر أحسَن نَسيب بيتنا في الجِّسم و نَمشي نَكون مَعَ الرَّب في بيتو.

⁹ عَلَشان كِدا فوق كُلّو شي، نِحنا عاوزين نَبسِطو إذا نِستَنّا في بيتنا هِنا ولّا نَمشي نَكون مَع الرَب.

¹⁰ عَشان كُلُّنا لازِم نَظهَر قِدّام كُرسي المَسيح، عَشان كُلّو واحِد يَقبَل زي ما هو عَمَل بِالجِّسم، إذا كان كوَيس ولّا بَطّال.

خِدمَة المُصالَحَه

¹¹ و ما دام بِنَعرِف خوف الرَّب، نَجَرِّب أن نَربَح النّاس. و نِحنا بَايِنين لِلَّه، و عِندي رَجاء بِقينا بَايِنين في ضَميركُم كَمان.

¹² عَشان ما نَحمِد نُفوسنا قِدّامكُم، لَكِن نَدّيكُم فُرصَه عَشان تَشكُرو نُفوسنا، عَشان يَكون عِندَكُم جَواب لِلنّاس البِشكُرو حالَة الإنسان و مُش قَلبو.

¹³ و إذا نِحنا مَجنونين، دا لِلَّه. و إذا فاهمين، دا ليكُم.

¹⁴ عَشان مَحَبَّة المَسيح عِندَها قُوَّه فوقنا حَتّى بِنَحسِب دا، إنّو واحِد مات عَن كُل النّاس. و عَلَشان كِدا كُلُّهُم ماتو.

¹⁵ و هو مات عَن كُل النّاس، عَشان الحَيين ما بِعيشو بَعَد دا لِنُفوسُم، لَكِن ليهو المات عَنُّم و قام.

¹⁶ عَشان كِدا، مِن هَسَّع ما بِنَعرِف واحِد بِحَسَب الجِّسم. و إذا عِرِفنا المَسيح حَسَب الجِّسم، هَسَّع ما بِنَعرِفو كِدا.

¹⁷ عَلَشان كِدا، إذا واحِد في المَسيح، هو خَليقَه جَديدَه. و الحاجات القَديمَه فاتَت. و شوف! الكُل بِقى جَديد.

¹⁸ و كُلّو دا مِن الله الصّالَحنا لِنَفسو بِالمَسيح، و أدّانا خِدمَة المُصالَحَه.

¹⁹ يَعني الله كان يَصالِح الدُّنيا لِنَفسو في المَسيح. و ما يَحسِب ليهُم خَطاياهم. و خَتَّ فينا كِلمَة المُصالَحَه.

²⁰ عَلَشان كِدا نِحنا سُفَراء المَسيح زي ما الله يَطلُب بينا، نِحنا نَطلُب مِنَّكُم فِشان المَسيح، أعمِلو سَلام مَعَ الله.

²¹ المَسيح ما عَمَل الخَطيَّه، لَكِن الله خَتَّ خَطايانا عَليهو. و عَلَشان كِدا نِحنا نَبقى بارين قِدّام الله في المَسيح.