٢ كُورِنْثُوس 4 - كِتاب العَهد الجَّديد مِن الكِتاب المُقَدَّس

كَنز في بُرمَه مِن طين

¹ و عَلَشان الله أدّانا الخِدمَه دي بِرَحمَتو، ما نَقول ما في فايدَه.

² لَكِن نِحنا أبينا نَعمِل أي حاجَه بِالسِّر ولّا الفيهو عيب. ما نَغِش ولّا نَغَيِر كِلمَة الله. بِالعَكس نِبَيِّن الحَق، و نَحمِد نُفوسنا قِدّام ضَمير النّاس و قِدّام الله.

³ و إذا إنجيلنا مَغَطّى، هو مَغَطّى لِلبِهلِكو.

⁴ و إلَه الزَّمَن دا عَمَل أفكار الما مؤمِنين عَميانين، عَلَشان ما بِقدَرو يَشوفو نور إنجيل مَجد المَسيح الهو صورَة الله.

⁵ عَشان ما نَبَشِّر بِنُفوسنا، لَكِن بِيَسُوع المَسيح الرَّب. و نِحنا خَدّامين ليكُم عَشان خاطِر يَسُوع.

⁶ عَشان الله قال: ”خَلّي نور يَنَوِّر مِن الضُّلُمَّه.“ و هو نَوَّر في قُلوبنا نور مَعرِفَة مَجد الله في وَش يَسُوع المَسيح.

⁷ لَكِن عِندَنا الكَنز دا في بُرمَه مَعمولَه مِن طين، عَلَشان يَوَرّي القُوَّه العَظيمَه جِدّاً دي مِن الله، مُش مِنَّنا.

⁸ الدُّنيا ضايقَه قِدّامنا مِن كُلّو جَمب، لَكِن دا ما يَوَقِّفنا. ما بِنَعرِف نَعمِل شِنو، لَكِن نِحنا مُش بِدون رَجاء.

⁹ يَطرُدونا، لَكِن ما يَسيبونا بَرانا. يَوَقِّعونا، لَكِن ما نَموت.

¹⁰ و بِنشيل دايماً في الجِّسم، موت يَسُوع، عَلَشان نَوَرّي حَياة يَسُوع كَمان في جِسِمنا.

¹¹ عَشان نِحنا الحَيين، يَسَلِّمونا كُلّو وَكِت لِلموت عَشان خاطِر يَسُوع، عَشان يَشوفو حَياة يَسُوع كَمان في جِسِمنا البِموت.

¹² عَلَشان كِدا الموت بِشتَغِل فينا، لَكِن الحَياة فيكُم.

¹³ و عِندَنا روح الإيمان زاتو زي ما مَكتوب: ”آمَنتَ، عَلَشان كِدا إتكَلَّمتَ.“ و نِحنا كَمان بِنآمِن، و عَلَشان كِدا بِنِتكَلَّم.

¹⁴ و بِنَعرِف هو القَوَّم الرَّب يَسُوع مِن بين المَيِّتين، بِقَوِّمنا نِحنا كَمان مَعَ يَسُوع، و بِجيبنا قِدّامو مَعاكُم.

¹⁵ و دا كُلّو عَشان فايدَتكُم، حَتّى النِّعمَه بِتزيد أكتَر و أكتَر لِكَتيرين، و الشُّكر بِزيد لِمَجد الله.

¹⁶ عَلَشان كِدا ما نَقول ما في فايدَه. لَكِن إذا كان جِسِمنا يَبقى ضَعيف، نَفسَنا الفي جُوَّه بَتَبقى جَديدَه يوم بِيوم.

¹⁷ عَشان الضّيق الخَفيف بِتاع الوَكِت دا، يَعمِل لينا مَجد أبَديَّه بِزيد أكتَر و أكتَر في الوَزِن.

¹⁸ عَلَشان كِدا ما نَعاين لِلحاجات النَقدَر نَشوفا، لَكِن لِلما نَشوفا. عَلَشان الحاجات البِنشوفا، لِهَسَّع بَس. لَكِن الحاجات الما بِنشوفا، لِلأبَد.