٢ كُورِنْثُوس 3 - كِتاب العَهد الجَّديد مِن الكِتاب المُقَدَّس

¹ نِحنا نَبتَدي نَحمِد نُفوسنا تاني مَرَّه؟ ولّا زي بَعض النّاس نَحتاج لِجَوابات الحَمد ليكُم ولّا مِنَّكُم؟

² إنتو نُفوسكُم جَواباتنا مَكتوبَه في قُلوبنا. و كُل النّاس بِيَعرِفوها و بِقروها.

³ إنتو بِتوَرّو إنَّكُم جَواب مِن المَسيح مُرسَل مِنَّنا، ما مَكتوبَه بِحِبِر، لَكِن بِروح الله الحَي. و مُش مَكتوبَه في ألواح مِن حَجَر، لَكِن في ألواح، و هُم قُلوب النّاس.

⁴ و عِندَنا تأكيد زي دا بِالمَسيح قِدّام الله.

⁵ نِحنا مُش كِفايَه مِن نُفوسنا عَشان نَفتَكِر أي شي مِن نُفوسنا. لَكِن عِندَنا قُدرَه مِن الله.

⁶ و هو أدّانا قُوَّه عَشان نَكون خَدّامين إتِّفاق جَديد. و دا مُش بِالقانون المَكتوب، لَكِن بِالرّوح. عَشان القانون المَكتوب بِجيب الموت، لَكِن الرّوح بِدّي حَياة.

مَجد الإتِّفاق الجَّديد

⁷ الخِدمَه البِتجيب الموت كانَت مَكتوبَه بِحُروف في حَجَر، و جات بِمَجد حَتّى ناس إِسْرَائِيل ما قِدرو يَعاينو في وَش مُوسَى عَشان المَجد دا. و المَجد دا كان بِفوت.

⁸ كيف بِالأكتَر خِدمَة الرّوح ما بِزيد في المَجد؟

⁹ إذا كان الخِدمَه البِتَحكُم عَلى النّاس جات بِمَجد، الخِدمَه البِتجيب البِر بِتكون ليها مَجد زِيادَه بِكَتير.

¹⁰ عَشان الخِدمَه الجّات بِمَجد، ما عِندَها مَجد هَسَّع لَمّا نَفتَكِّر في المَجد البِكون فوق الكُل.

¹¹ و إذا كان البِفوت دا جا بِمَجد، البِستَمِر عِندو مَجد أكبَر بِكَتير.

¹² و إذا عِندَنا رَجاء زي دا، عِندَنا شَجاعَه كَتيرَه.

¹³ و نِحنا مُش زي مُوسَى الكان بِغَطّي وَشّو عَلَشان ناس إِسْرَائِيل ما يَعاينو لِآخِر المَجد البِفوت.

¹⁴ لَكِن أفكارُم بِقو مَقفولين، عَلَشان زات الغَطا بِغَطّي وُشوشُم لِغايَة اليوم دا، لَمّا بِيَقرو الإتِّفاق القَديم. و ما شالوهو مِنَّهُم عَشان في المَسيح يَشيلوهو.

¹⁵ لَكِن لِغايَة اليوم دا، لَمّا بِيَقرو مِن كِتاب مُوسَى، الغَطا بِغَطّي قُلوبُم.

¹⁶ لَكِن لَمّا أي واحِد يَرجَع لِلرَّب، يَشيلو مِنّو الغَطا.

¹⁷ و الرَّب هو الرّوح، و المَحَل الفيهو روح الرَّب، هِناك في الحُرّيَّه.

¹⁸ و نِحنا كُلُّنا بِوَش بِدون غَطا، بِنشوف مَجد الرَّب، زي في المِرايا. و نِتغَيَر لِصورَتو مِن مَجد لِمَجد. و المَجد دا هو عَمَل مِن الرَّب الرّوح.