٢ كُورِنْثُوس 2 - كِتاب العَهد الجَّديد مِن الكِتاب المُقَدَّس

¹ أنا قَرَّرتَ في نَفسي ما بَجي ليكُم مَرَّه تانيَه بِحُزن.

² عَشان إذا عَمَلتَكُم حَزنانين، مِنو هو اليَعمِلني مَبسوط إلّا الزّول الأنا عَمَلتو حَزنان؟

³ و كَتَبتَ ليكُم نَفس الحاجَه، عَلَشان أنا ما كُنتَ عاوِز أجي ليكُم و بَكون حَزنان مِن النّاس اللازِم أكون مَبسوط مِنَّهُم. عَشان أنا مِتأكِّد إذا أنا مَبسوط، كِدا كُلُّكُم كَمان بِتكونو مَبسوطين.

⁴ كَتَبتَ ليكُم بِحُزن شَديد و وَجَع في قَلبي و بِدِموع كَتيرَه، ما عَشان أعمِلكُم حَزنانين، لَكِن عَشان أخَلّيكُم تَعرِفو مَحَبَّتي الشَّديدَه العِندي ليكُم.

⁵ لَكِن إذا أي واحِد عَمَل واحِد تاني حَزنان، هو ما عَمَل دا لَي بَس، لَكِن في بَعَض الشّي لِكُلُّكُم. و أنا ما داير أكون صَعب عَليكُم.

⁶ و كِفايَه لِلزّول دا، عَلَشان كَتيرين مِنَّكُم أدّوهو جِزا.

⁷ لَكِن هَسَّع لازِم تَغفِرو ليهو و تَشَجِّعوهو عَلَشان الحُزن الشَّديد ما يَبلَعو.

⁸ أنا بَطلُب مِنَّكُم تَخَلّوهو يَعرِف إنتو بِتحِبّوهو بِالحَق.

⁹ بِالسَّبَب دا كَتَبتَ ليكُم، عَشان أمتَحِنكُم و أشوف إذا إنتو تَطيعو في كُلّو حاجَه.

¹⁰ إذا إنتو بِتَغفِرو شي لِأي واحِد، أنا كَمان بَغفِر ليهو. و الغَفَرتَ ليهو، إذا كان أنا غَفَرتَ ليهو أي شي، عَلَشانكُم غَفَرتَ ليهو قِدّام المَسيح.

¹¹ و عَمَلتَ دا عَلَشان الشّيطان ما بِغلِب عَلينا. عَشان نِحنا بِنَعرِف تَرتيباتو.

خَدّامين الإتِّفاق الجَّديد

¹² و لَمّا مَشيت لِتَرُوَاس عَشان أبَشِّر بِإنجيل المَسيح، أنا لِقيت إنّو الرَّب كان فَتَح باب لَي.

¹³ و لَكِن ما كانَت عِندي راحَه في روحي عَشان أنا ما لِقيت تِيطُس أخوّي. و قُلتَ ليهُم مَعَ السَّلامَه، و مَشيت لِمَكِدونيَّه.

¹⁴ لَكِن شُكراً لِلَّه عَشان هو دايماً بِقودنا في الغَلَبَه في المَسيح، و بِوَرّي بينَنا ريحَة مَعرِفتو في كُلّو مَحَل.

¹⁵ عَشان نِحنا لِلَّه زي الرّيحَه الحِلوَه بِتاعَت المَسيح بين البِخلَصو و البِهلِكو.

¹⁶ و نِحنا لِلواحِد البِهلِك زي شَم الموت و الخَراب، و لِلتاني البِخلَص زي ريحَة الحَياة الأبَديَّه. و مِنو بِقدَر لِلحاجات دي؟

¹⁷ و نِحنا ما زي الكَتيرين البِتاجِرو بِكِلمَة الله. و لَكِن نِتكَلَّم قِدّام الله بِإخلاص في المَسيح، زي ناس مُرَسَّلين مِن الله.