٢ كُورِنْثُوس 13 - كِتاب العَهد الجَّديد مِن الكِتاب المُقَدَّس

الحَذر الأخير

¹ دي المَرَّه التّالتَه أجي ليكُم. كُلّو كِلمَه بِخَشم شاهِدين ولّا تلاتَه تَكون ثابِتَه.

² أنا قُبّال دا حَذَّرتَ ديل الكانو بيَعمِلو خَطيَّه لَمّا كُنتَ مَعاكُم. و تاني مَرَّه و أنا مُش مَعاكُم بَحَذِّركُم و بَحَذِّر كُل التّانيين كَمان. و لَمّا بَرجَع ليكُم، أنا ما بَرحَم ديل البيَعمِلو خَطيَّه.

³ عَشان إنتو تَطلُبو بيّنَه إنّو المَسيح بِتكَلَّم فِيني. و هو ما ضَعيف في عَمَلو مَعاكُم، لَكِن هو قَوّي فيكُم.

⁴ و بِالحَق هو إنصَلَب في ضُعف، لَكِن هو بِعِيش بِقوَّة الله. و نِحنا كَمان ضَعيفين فيهو، و لَكِن نِحنا بِنعيش مَعاهو بِقُدرَة الله عَشان نَخدِمكُم.

⁵ أعمِلو إمتِحان لِنُفوسكُم. إنتو عِندَكُم إيمان؟ جَرِّبو نُفوسكُم. ما بِتَعرِفو يَسُوع المَسيح فيكُم؟ إلّا إذا وَقَعتو في الإمتِحان.

⁶ أنا عِندي رَجاء إنتو بِتَعرِفو نِحنا ما وَقَعنا في الإمتِحان.

⁷ و نِحنا نَصَلّي لِلَّه عَشان إنتو ما تَعمِلو حاجَه بَطّالَه. و دا ما عَشان النّاس بِشوفو نِحنا مَرّينا بِالإمتِحان. لَكِن دا عَشانكُم تَعمِلو كوَيس، و لَو نِحنا بِقينا زي الوَقَعو في الإمتِحان.

⁸ عَشان نِحنا ما نَقدَر نَعمِل حاجَه ضِد الحَق، لَكِن فِشان الحَق.

⁹ عَشان نِحنا مَبسوطين كُلو وَكِت لأنِنا نَكون ضَعيفين و إنتو تَكونو قَوّيين. و نَصَلّي كَمان عَشان إنتو تَكونو كامِلين.

¹⁰ عَلَشان كِدا بَكتِب دا و أنا ما مَعاكُم، عَشان لَمّا بَجي، ما لازِم أكون شَديد بِحَسَب السُّلطَه الأدّاها لَي الرَّب. و هو أدّاني السُّلطَه دي عَشان أبنيكُم، مُش عَشان أخَرِّبكُم.

¹¹ و في الأخير، يا أخوان، كونو مَبسوطين. كونو كامِلين، كونو شُجعان، فَكِّرو فِكرَه واحدَه، عيشو في السَّلام. و إلَه المَحَبَّه و السَّلام يَكون مَعاكُم.

¹² سَلِّمو بَعضَكُم لِبَعض بِسَلام مُقَدَّس.

¹³ كُل القِدِّسين يَسَلِّمو عَليكُم.

¹⁴ نِعمَة رَبَّنا يَسُوع المَسيح و مَحَبَّة الله و شَرِكَة الرّوح القُدُس يَكون مَعَ كُلُّكُم.