٢ كُورِنْثُوس 11 - كِتاب العَهد الجَّديد مِن الكِتاب المُقَدَّس

عَن الرُّسُل الكَضّابين

¹ أنا عاوِزكُم تاخدو مِنّي بِالصَّبر، شوَيَه مِن حاجَه غَشيمَه. أيوَه، أُخدو مِنّي زي دا.

² عَشان أنا غَيور عَليكُم بِغيرَة الله. عَشان أنا وَعَدتَكُم لِراجِل واحِد عَشان أقَدِّم عَذراء نَضيفَه لِلمَسيح.

³ لَكِن أنا بَخاف زي ما الدَّبيب غَشّا حَوا بِغِشّو، كَمان إنتو تَضِلّو في أفكاركُم عَن الإخلاص و القَلِب النَّضيف الفي المَسيح.

⁴ عَشان إذا واحِد جا ليكُم و بِبَشِّر بِيَسُوع تاني، غير البَشَّرناكُم بيهو، إنتو تِتحَمَّلو دا كوَيس. ولّا إذا إنتو تَقبَلو روح تاني مِن الرّوح القِبِلتوهو، ولّا إنجيل مُختَلِف مِن القِبِلتوهو، إنتو تِتحَمَّلو دا كوَيس.

⁵ و أنا أحسِب نَفسي ما ناقِص في شي لِلرُّسُل الأكبَر ديل.

⁶ و لَو أنا ما شاطِر في الكَلام، أنا عِندي مَعرِفَه. و نِحنا وَرّيناكُم دا في كُلّو طَرِيقَه و في كُلّو حاجَه.

⁷ و يِمكِن كانَت خَطيَّه لَي عَشان نَزَّلتَ نَفسي عَلَشان أرفَعكُم لَمّا بَشَّرتَكُم بِإنجيل الله مَجّاناً؟

⁸ أنا سَرَقتَ مِن كَنايس تانيين و كُنتَ باخُد أُجرَه مِنَّهُم فِشان أخدِمكُم.

⁹ و لَمّا كُنتَ مَعاكُم و كان عِندي إحتِياج، ما بِقيت حِمِل لِأي واحِد، عَلَشان الأخوان الجّو مِن مَكِدونيَّه أدّو لِإحتياجي. حَفَظتو نَفسي عَشان ما بَكون حِمِل ليكُم في أي حاجَه، و بَستَمِر كِدا.

¹⁰ و زي حَق المَسيح فِيني، و لا واحِد في مَحَلّات أَخَائِيَه بِوَقِّف فَخري.

¹¹ لِشِنو؟ عَلَشان ما بَحِبّكُم؟ الله بِيَعرِف أنا بَحِبّكُم!

¹² و لَكِن الحاجَه البَعمِلا، بَعمِلا عَشان أوَقِّف ديل البِشكُرو نُفوسُم و بِقولو هُم بِشتَغِلو زي ما نِحنا نَشتَغِل.

¹³ عَشان رُجال زي ديل رُسُل كَضّابين، شَغّالين البِغِشّو، و يَغَيِّرو شَكلهُم لِشَكَل رُسُل المَسيح.

¹⁴ ما تِستَغرَبو! عَشان الشّيطان نَفسو بِغَيِّر نَفسو لِمَلاك نور.

¹⁵ و كِدا، ما حاجَه كَبيرَه إذا خَدّامينو كَمان يَغَيِّرو شَكلهُم زي خَدّامين لِلبِر. و آخِر بِكون حَسَب أعمالُم.

بُولُس يَفَخِّر بِأوجاعو

¹⁶ و تاني مَرَّه بَقول، ما تَخَلّي واحِد يَفتَكِر أنا غَشيم. و إلّا، أقبَلوني زي زول غَشيم عَشان أنا كَمان أشكُر نَفسي شوَيَه.

¹⁷ لَمّا أتكَلَّم و أشكُر نَفسي، ما بَتكَلَّم زي الرَّب لَكِن زي الغَشيم.

¹⁸ عَلَشان ناس كُتار بِشكُرو نُفوسُم زي ما ناس الدُّنيا بِسَوو، أنا كَمان بَشكُر نَفسي.

¹⁹ عَشانكُم تِتحَمَّلو البَليدين بِفَرَح، عَلَشان إنتو ناس فاهمين.

²⁰ عَشانكُم تاخُدوهو بِالصَّبر مِن الزّول اليَعمِلكُم عَبيد، و مِن الزّول الياكُلكُم و يَسرِق مِنَّكُم، و مِن الزّول اليِتكَبَّر عَليكُم، و مِن الزّول اليَضرُبكُم عَلى وشوشكُم.

²¹ و بَقول دا بِخَجَل، زي ما كُنّا ضَعيفين. لَكِن إذا أي واحِد عِندو شَجاعَه عَشان يَشكُر نَفسو، أنا كَمان عِندي شَجاعَه، عَشان أشكُر نَفسي. و تاني مَرَّه أنا بَتكَلَّم زي الغَشيم.

²² هُم ناس عِبرانيين؟ أنا كَمان. هُم أولاد إِسْرَائِيل؟ أنا كَمان. هُم أولاد إِبْرَاهِيم؟ أنا كَمان.

²³ هُم خَدّامين المَسيح؟ أنا أحسَن. بَتكَلَّم زي المَجنون. أنا تِعِبتَ زِيادَه كَتير، جَلَدوني أكتَر، كُنتَ في السِّجِن مَرّات أكتَر، و في خَطَر الموت مَرّات كَتيرَه.

²⁴ قِبِلتَ مِن اليَهود خَمسَه مَرّات أربَعين جَلِد إلّا واحِد.

²⁵ ضَرَبوني بِالعَصايات تلاتَه مَرّات، رَمو الحُجار عَلي مَرَّه، المُركَب إنكَسَرَت و أنا فيها تلاتَه مَرّات، كُنتَ ليل و نَهار فوق البَحَر.

²⁶ سافَرتَ مَرّات كَتيرَه. كُنتَ في خَطَر مِن البَحَر، في خَطَر مِن حَراميَّه، في خَطَر مِن ناس بَلَدي، في خَطَر مِن الأُمَم، في خَطَر في المَدينَه، في خَطَر في الخَلا، في خَطَر في البَحَر، في خَطَر مِن أخوان كَضّابين.

²⁷ في شُغل و تَعب، كُنتَ بِدون نوم مَرّات كَتيرَه، في جوع و عَطَش، صُمتَ مَرّات كَتيرَه، كُنتَ بَردان و عَريان.

²⁸ و فوق كُلّو دا، الحاجات المِن بَرَّه، كُلّو يوم أنا تِحِت حِمِل الإهتِمام بِكُل الكَنايس.

²⁹ مِنو بِكون ضَعيف و أنا ما ضَعيف؟ مِنو يَقَع في الخَطيَّه و أنا ما أحرَق في جُوَّه نَفسي؟

³⁰ إذا لازِم أشكُر نَفسي، أنا بَشكُر نَفسي عَن الحاجات البِتوَرّي كيف أنا ضَعيف.

³¹ الله أبو الرَّب يَسُوع، المُبارَك لِلأبَد، يَعرِف أنا ما بَكَضِّب.

³² في دِمَشق، المُدير بِتاع مَلِك الحارت كان يَحرَس مَدينَة دِمَشق عَشان يَقبُض عَلي.

³³ لَكِن نَزَّلوني مِن شُبّاك مِن الحيطَه في قُفَّه كَبيرَه، و خَلَصتَ مِنّو.