٢ كُورِنْثُوس 10 - كِتاب العَهد الجَّديد مِن الكِتاب المُقَدَّس

بُولُس يتكَلَّم عَن خِدمَتو

¹ و بَطلُب ليكُم بِوَداعَة المَسيح و صَبرو، أنا نَفسي، بُولُس، البَخُت نَفسي تِحِت لَمّا أكون مَعاكُم لَكِن عِندي شَجاعَه لَمّا أكون بَعيد.

² و لَكِن أطلُب ليكُم، لَمّا أجي، ما لازِم تَكون عِندي شَجاعَه عَلى بَعض مِن النّاس البِفتَكِرو نِحنا نَعيش زي الجِّسم.

³ عَشان إذا نَعيش في الجِّسم، ما نَحارِب حَسَب الجِّسم.

⁴ عَشان أسلِحَة حَربنا مُش مِن الجِّسم لَكِن قَوّيَّه بِالله عَشان يَكَسِّر البِنايات الشَّديدَه.

⁵ نَخَرِّب صُوَر الأفكار و كُلّو حاجَه عاليَه البِتكون مَرفوع ضِد الله. و نَقبُض عَلى كُلّو فِكر عَشان نَسَويهو يَطيع المَسيح.

⁶ نِحنا جاهِزين عَشان نَنتَقِم عَلى كُلّو فِتنَه لَمّا تَكَمِّل طاعَتكُم.

⁷ إنتو تَعاينو لِلحاجَه القِدّامكُم. إذا واحِد يَتَّكِل عَلى نَفسو هو لِلمَسيح، خَليهو يَفتَكِر كَمان في نَفسو، نِحنا كَمان لِلمَسيح زي ما هو لِلمَسيح.

⁸ عَشان إذا أشكُر نَفسي زِيادَه شوَيَه بِالسُّلطَه الأدّانا الله عَشان أبنيكُم و ما عَلَشان أخَرِّبكُم، أنا ما خَجلان.

⁹ عَلَشان أنا ما عاوِزكُم تَكونو خايفين مِن جَواباتي.

¹⁰ عَشان بَعض مِن النّاس بِقولو: ”جَواباتو تَقيلَه و قَوّيَّه، لَكِن لَمّا هو مَعانا في الجِّسم، هو ضَعيف و كَلامو بِدون فايدَه.“

¹¹ خَلّو النّاس زي ديل يَحسِبو إنّو زي ما نِحنا نَكون في الكَلام و في الجَوابات لَمّا نِحنا ما في، بِنكون كِدا كَمان بِالعَمَل لَمّا نَكون في مَعاكُم.

¹² و نَخاف نَشَبِّه نُفوسنا بِبَعض مِن النّاس البِحمَدو نُفوسُم و نَخاف نَحسِب نُفوسنا مَعاهُم. و لَكِن هُم يَقيسو نُفوسُم بِنُفوسُم، و يَشَبِّهو نُفوسُم بِنُفوسُم، و ما يَفهَمو.

¹³ لَكِن ما نَشكُر نُفوسنا بِدون قِياس، لَكِن حَسَب الخِدمَه القَسَما لينا الله. و الخِدمَه دي تَجِيبنا ليكُم كَمان.

¹⁴ نِحنا ما نَمشي بَعيد حَتّى ما نوصَل ليكُم. لَكِن جينا و وِصِلنا ليكُم بِإنجيل المَسيح.

¹⁵ عَلَشانّا ما نَشكُر نُفوسنا بِدون قِياس بِأشغال ناس تانيين. لَكِن عِندَنا رَجاء إنّو زي ما إيمانكُم يِستَمِر يَزيد، كَمان شُغُلنا بينكُم بِزيد حَسَب قِياس خِدمَتنا.

¹⁶ عَلَشان نَبَشِّر بِالإنجيل في مَحَلّات بَعيدَه مِنَّكُم. و ما عاوزين نَحمِد عَمَل واحِد تاني العَمَلو مِن قُبّال في مَحَلّو.

¹⁷ لَكِن: ”الزّول العاوِز يَحمِد، خَليهو يَحمِد الرَّب.“

¹⁸ عَشان الزول الحَمَد نَفسو ما بِكون مَقبول، لَكِن لَمّا الرَّب يَحمِد الزّول، هو بِكون مَقبول.