٢ كُورِنْثُوس 1 - كِتاب العَهد الجَّديد مِن الكِتاب المُقَدَّس

¹ مِن بُولُس رَسول المَسيح يَسُوع بِإرادَة الله، و مِن تِيمُوثَاوُس الأخو، لِكَنيسَة الله الفي كُورِنْثُوس، مَعَ كُل النّاس المُقَدَّسين في كُلّو أَخَائِيَه.

² نِعمَه و سَلام ليكُم مِن الله أبونا و الرَّب يَسُوع المَسيح.

إلَه كُلّو تَعزيَه

³ مُبارَك الله أبو رَبَّنا يَسُوع المَسيح، أبو كُلّو رَحمَه و إلَه كُلّو تَعزيَه.

⁴ هو بِدّينا تَعزيَه في كُلّو تَعب، عَلَشان نِحنا نَقدَر نَدّي تَعزيَه ليهُم في كُلّو تَعب، بِالتَّعزيَه القِبِلنا مِن الله.

⁵ عَشان زي ما أوجاع المَسيح يَزيدو فينا، كِدا كَمان تَعزيَتنا تَزيد بِالمَسيح.

⁶ و إذا كُنّا في التَّعب، دا عَلَشان تَعزيَتكُم و خَلاصكُم. و إذا نِتعَزّى، دا عَشان تَعزيَتكُم. و يَدّيكُم قُوَّه عَشان تَكونو عِندَكُم صَبر في زات الأوجاع، زي ما نِحنا نِتوَجَّع كَمان.

⁷ و رَجاءنا فيكُم ثابِت، عَلَشان بِنَعرِف زي ما تَشتَرِكو في أوجاعنا، كِدا كَمان تَشتَرِكو في التَّعزيَه.

⁸ و نِحنا عاوِزين نَزَكِّركُم، يا أخوان، عَن التَّعب الكان عِندَنا في آسيا. و الأحمال الهُم خَتّو عَلينا كانَت كَبيرَه و تَقيلَه حَتّى إفتَكَرنا ماشين نَموت.

⁹ بِالحَق، شِلنا في نُفوسنا حُكم الموت. و دا حَصَل لينا عَلَشان ما نَتَّكِل عَلى نُفوسنا، لَكِن عَلى الله البِقَوِّم المَيِّتين.

¹⁰ و هو خَلَّصنا مِن موت زي دا و بِخَلِّصنا. و خَتّينا فيهو رَجاءنا إنّو بِخَلِّصنا مَرَّه تانيَه.

¹¹ و إنتو كَمان بِتساعِدونا بِالصَّلاه بِتاعَتكُم عَلَشانّا. و عَشان كِدا، ناس كَتيرين بِدّو الشُّكر عَلَشان الهَدِيَّه الأدّاها لينا بِسَبَب صَلَوات كَتيرين.

تَغيير في تَرتيب بُولُس

¹² عَشان دا فَخرَنا: ضَميرنا يَشهَد لينا، نِحنا مَشينا في الدُّنيا في القَداسَه و الإخلاص المِن الله و خُصوصاً مِن جِهَتكُم. و ما عَمَلنا كِدا بِحِكمَة الإنسان، لَكِن بِنِعمَة الله.

¹³ عَشان ما نَكتِب ليكُم إلّا البِتَقدَرو تَقرو و تَفهَمو. و عِندي رَجاء إنتو بِتَفهَمو بِالتَّمام.

¹⁴ و إنتو فِهِمتونا كَمان بَعض مِن الفَهم، و فِهِمتو أن نِحنا فَخرَكُم زي ما إنتو فَخرَنا في يوم رَبَّنا يَسُوع.

¹⁵ و بِالتّأكيد دا، كُنتَ عاوِز أجي ليكُم مِن قُبّال، عَشان بِكون ليكُم نِعمَه مَرَّتين.

¹⁶ و كُنتَ عاوِز أمُر بيكُم في طَرِيقي لِمَكِدونيَّه، و بَرجَع ليكُم مِن مَكِدونيَّه كَمان. و بَعدين إنتو بِترَسِّلوني لِليَهُودِيَّه.

¹⁷ أنا عَمَلتَ دا بِدون فِكر لَمّا غَيَّرتَ التَّرتيب بِتاعي؟ ولّا أنا بَعمِل تَرتيباتي زي ناس الدُّنيا بيَعمِلو، و بَقول ”أيوَه، أيوَه“ و ”لا لا“ في نَفس الوَكِت؟

¹⁸ لَكِن زي ما الله أمين، كَلامنا ليكُم كَمان مُش ”أيوَه“ و ”لا.“

¹⁹ عَشان أنا و سِلْوَانُس و تِيمُوثَاوُس بَشَّرنا بينكُم بِإبن الله، يَسُوع المَسيح، و ما كان فيهو ”أيوَه“ و ”لا.“ لَكِن دايماً فيهو ”أيوَه.“

²⁰ عَشان فيهو ”الأيوَه“ لِكُلّو وُعود الله. و عَلَشان كِدا بِنقول فيهو ”آمين“ لِمَجد الله.

²¹ لَكِن الله هو البِيَعمِلنا ثابِتين مَعاكُم في المَسيح. و هو مَسَحنا،

²² و خَتَّ الخِتِم عَلينا، و خَتَّ الرّوح بِتاعو في قُلوبنا زي عَربون.

²³ لَكِن بَنادي الله زي شاهِد لَي، السَّبَب الأنا ما رَجَعتَ لِكُورِنْثُوس، هو عَلَشان رَحَمتَكُم.

²⁴ نِحنا ما عِندَنا سُلطَه عَلى إيمانكُم. لَكِن بِنَشتَغِل مَعاكُم عَشان تَكونو مَبسوطين، عَلَشان إنتو ثابِتين في إيمانكُم.