١ تِيمُوثَاوُس 6 - كِتاب العَهد الجَّديد مِن الكِتاب المُقَدَّس

¹ خَلّو كُل الخَدّامين التِحِت النّير يَحسِبو أسيادُم مُستَحِقّين كُلّو إحتِرام، عَلَشان هُم ما يَشتِمو إسم الله و التَعليم.

² و العِندَهُم أسياد البِآمِنو، ما لازِم يَدّوهُم أقَل إحتِرام عَلَشان هُم أخوان. لَكِن خَلّوهُم بِخدِموهُم خِدمَه أحسَن عَشان العِندَهُم فايدَه مِن خِدمَتُم مؤمِنين و مَحبوبين. عَلِّم الحاجات دي و أدّيهُم نَصيحَه كِدا.

مَحَبَّة القُروش

³ إذا أي واحِد يَعَلِّم تَعليم تاني و ما يَتَّفِق لِلكَلام الصَّحيح، كَلام رَبَّنا يَسُوع المَسيح، و لِلتَعليم الهو حَسَب خوف الله،

⁴ هو مِتكَبِّر و ما بِفهَم حاجَه. و عِندو فِكرَه عَيّانَه عَن أصِلا و يَحارِب بِالكِلمات البِجيبو الحَسَد، و الشَّكلَه، و الشَّتيمَه، و الفِكِر البَطّال.

⁵ و يَجيب الشَّكلات المُستَمِرَّه بين رُجال عَقلُم خَربان، الاَخَدو مِنَّهُم الحَق. و هُم يَفتَكِرو خوف الله طَريق عَشان يَبقى غَني.

⁶ لَكِن خوف الله، إذا الزّول فَرحان، دا غِنى عَظيم.

⁷ عَشان نِحنا ما جِبنا أي شي لِلدُّنيا، و ما نَقدَر نَشيل مِنَّها أي شي.

⁸ لَكِن إذا عِندَنا الأكِل و الهِدوم، خَلّونا نَكون مَبسوطين بيهُم.

⁹ لَكِن النّاس العاوزين يَكونو غَنيين يَقَعو في التَجرِبَه و الفَخ، و في شَهوات كَتيرَه، بَليدَه و مُضِرَّه، البِجُرّو النّاس لِلخَراب و الهَلاك.

¹⁰ عَشان مَحَبَّة القُروش عِرق كُل الحاجات البَطّالَه. و بَعض مِن النّاس الطَّلَبوهو، ضَلّو عَن الإيمان و طَعنو نُفوسُم بِوَجَع كَتير.

بُولُس يأمُر تِيمُوثَاوُس

¹¹ و إنتَ، يا راجِل الله، أهرَب مِن دا. و أتبَع البِر، و خوف الله، و الإيمان، و المَحَبَّه، و الصَّبر، و الوَداعَه.

¹² حارِب حَرب الإيمان الكَويس. و أمسِك بِالحَياة الأبَديَّه. عَشان الله ناداك لِدا، و إنتَ شِهِدتَ الشَّهادَه الكوَيسَه قِدّام شاهِدين كُتار.

¹³ أنا بَدّيك أمر قِدّام الله البِدّي حَياة لِلكُل، و قِدّام المَسيح يَسُوع الشِّهِد قِدّام بِيلاطُس البُنْطي الشَّهادَه الكوَيسَه.

¹⁴ عَشان تَحفَظ الأمر، نَضيف و بِدون لوم لِظُهور رَبَّنا يَسُوع المَسيح.

¹⁵ و الله بِبَيِّنو في وَكتو، الله، المُبارَك، الحاكِم الوَحيد. هو مَلِك المُلوك و رَب الأرباب.

¹⁶ و هو بَس ما بِموت، و بِسكُن في نور الما نَقدَر نَقَرِّب مِنّو. ما في زول شافو ولّا بِقدَر يَشوفو. ليهو الإحتِرام و القُوَّه الأبَديَّه! آمين.

¹⁷ آمُر الغَنيين في الدُّنيا الحاضِرَه دي أن ما يَكونو مِتكَبِّرين ولّا يَتَّكِلو عَلى الغِنى الما يِستَمِر. لَكِن خَليهُم يَتَّكِلو عَلى الله الحَي، البِدّينا كُلّو حاجَه بِغِنى عَشان نَفرَح بيها.

¹⁸ و أدّيهُم أمر عَشان يَعمِلو الخير و يَكونو غَنيين في الأعمال الطَّيبَه، جاهِزين عَشان يَدّو و رَضيانين عَشان يَشارِكو.

¹⁹ و يَخُتّو لِنُفوسُم زي كَنز، أساس كوَيس لِلوَكِت الجّاي حَتّى يَمسِكو بِالحَياة الحَقيقيَه.

²⁰ يا تِيمُوثَاوُس، أحفَظ الحاجَه السَّلَّموها ليك. كون بَعيد مِن الكَلام الفاضي و الوَسخان و مِن البِعاكِس، البِسَمّوها ”المَعرِفَه“ بِالكِضِب.

²¹ و بَعض مِن النّاس بِقولو هُم عِندَهُم المَعرِفَه دي و ضَلّو عَن الإيمان. النِّعمَه مَعاكُم.