١ تِيمُوثَاوُس 5 - كِتاب العَهد الجَّديد مِن الكِتاب المُقَدَّس

نَصيحَه عَن الأرامِل و الشُّيوخ

¹ ما تَوَبِّخ الشّيخ لَكِن أدّيهو نَصيحَه زي أبو، الشَّباب زي أخوان،

² النِّسوان الكُبار في السِّن زي أُمَّهات و الأصغَر زي أخوات، بِكُلّو قَلِب نَضيف.

³ إحتَرِم الأرامِل الهُم أرامِل بِالحَق.

⁴ لَكِن إذا أرمَلَه عِندَها أولاد ولّا أولاد أولادا، خَليهُم يِتعَلَّمو في الأوَّل أن يَحتَرِمو أهل بيتُم و يَرَجِّعو خير والِدينُم ليهُم. عَلَشان دا مَقبول قِدّام الله.

⁵ لَكِن الأرمَلَه، الهي أرمَلَه بِالحَق، البِقَت بَراها، تَخُت رَجاها في الله. و هي تِستَمِر تَصَلّي و تَسأل ليل و نَهار.

⁶ لَكِن الأرمَلَه التَّعيش بَس عَشان تَكون مَبسوطَه، هي مَيِّتَه ما دام عِندَها حَياة.

⁷ و آمُر بِالحاجات ديل عَلَشان هُم بِكونو بِدون لوم.

⁸ و إذا أي واحِد ما يَهتَم بِأقاريبو و خُصوصاً لِأهل بيتو، هو نَكَر الإيمان، و هو أكعَب مِن الما مؤمِن.

⁹ ما تَكتِب إسِم أرمَلَه إلّا عُمُرا زِيادَه مِن سِتّين سَنَه، و كانَت عِندَها راجِل واحِد.

¹⁰ و النّاس يَعرِفوها بِأعمالا الكوَيسَه. هي كانَت رَبَّت الأولاد، و فَتَحَت بيتا لِلغَريبين، و غَسَّلَت كِرعين القِدِّسين، و ساعَدَت المَظلومين، و أدَّت نَفسَها لِكُلّو عَمَل كوَيس.

¹¹ لَكِن الأرامِل الصُّغار، آباهُم، عَلَشان لَمّا شَهوَاتُم يَعمِلوهُم يَدورو العِرِس، هُم يَرَجِّعو عَن المَسيح.

¹² و كِدا يَجيبو حُكم عَلى نُفوسُم، عَلَشان هُم كَسَّرو الإتِّفاق الأوَّل.

¹³ و في نَفس الوَكِت، هُم يِتعَلَّمو يَكونو كَسلانات، و يَمشو مِن بيت لِبيت. و هُم ما يَبقو كَسلانات بَس، لَكِن يَقولو حِكايات بِدون فايدَه، و يدخُلو في الما يَخُصُّم، و يِتكَلَّمو عَن الحاجات المَمنوعَه.

¹⁴ عَلَشان كِدا، أنا عاوِز الأرامِل الصُّغار يِتزَوَّجو و يَجيبو الأولاد، و يَرَتِّبو البُيوت، و ما يَدّو العَدو فُرصَه لِلشَّتيمَه.

¹⁵ عَشان بَعض مِنَّهُم مِن قُبّال رَجَعو لِيَمشو وَرا الشّيطان.

¹⁶ إذا كان أي واحدَه البِتآمِن عِندَها أرامِل في أهل بيتا، خَلِيها تَساعِدُم، عَلَشان دا ما بِكون حِمِل لِلكَنيسَه. و عَلَشان كِدا، الكَنيسَه تَقدَر تَساعِد ديل البِالحَق عِندَهُم إحتِياج.

¹⁷ الشُّيوخ البِقودو كوَيس أحسِبوهُم مُستَحِقّين لِإحتِرام مَرَّتين، و بِالأكتَر البِتعَبو في الكِلمَه و التَعليم.

¹⁸ عَشان كِتاب يَقول: ”ما تَربُط خَشُم التّور و هو يدوس الدُّرَه،“ و: ”الشَّغال مُستَحِق أُجرَتو.“

¹⁹ ما تَقبَل شَكوى عَلى الشيخ إلّا بِشَهادَة إتنين ولّا تلاتَه مِن النّاس.

²⁰ و وَبِّخ البيَعمِلو الخَطيَّه قِدّام كُل النّاس، عَلَشان التّانيين بِخافو.

²¹ أنا بَدّيك أمر قِدّام الله و المَسيح يَسُوع و قِدّام المَلائكَه المُختارين أن تَحفَظ الحاجات دي بِدون ما تَحكُم قُبّال ما تَعرِف الحَق. و ما تَشوفو الوشوش في شُغلَك.

²² ما تَخُت إيدينَك عَلى أي واحِد بِالسُّرعَه. و ما تَشتَرِك في خَطايا التّانيين. أحفَظ نَفسَك بِقَلِب نَضيف.

²³ ما تِستَمِر تَشرَب المويَه بَس، لَكِن تاخُد شوَيَة خَمر فِشان بَطنَك و أمراضَك الكَتيرَه.

²⁴ خَطايا بَعض مِن النّاس بَايِنَه، و يَمشو قِدّامُم لِلحُكم. و خَطايا التّانيين يَمشو وَراهُم.

²⁵ و كِدا كَمان الأعمال الكوَيسَه بَايِنَه. و الما بَايِنَه ما مُمكِن يَدِسّوها.