١ تِيمُوثَاوُس 3 - كِتاب العَهد الجَّديد مِن الكِتاب المُقَدَّس

مُلاحِظين و خَدّامين الكَنيسَه

¹ الكِلمَه دي أمينَه: إذا أي واحِد يَطلُب يَكون مُلاحِظ، هو عاوِز عَمَل كوَيس.

² و المُلاحِظ لازِم يَكون بِدون عيب، راجِل عِندو مَرَه واحدَه، ماسِك نَفسو، عاقِل، مُحتِرَم، بِفتَح بيتو لِلغَريبين، بِقدَر يَعَلِّم.

³ هو ما بِكون سَكران، ما بِضرُب لَكِن بِكون لَطيف، مُش شاكال ولّا يَحِب القُروش.

⁴ هو لازِم يَرَتِّب بيتو كوَيس، و يَعمِل أولادو يَطيعوهو بِكُلّو إحتِرام.

⁵ عَلَشان إذا واحِد ما بِيَعرِف كيف يَرَتِّب بيتو كيف بِقدَر يَهتَم بِكَنيسَة الله؟

⁶ و لَكِن هو ما لازِم يَكون جَديد في الإيمان، عَشان يِمكِن يَشكُر نَفسو و يَقَع في حُكم إبْلِيس.

⁷ و كَمان هو يَكون عِندو شَهادَه كوَيسَه مِن النّاس الفي بَرَّه، عَلَشان ما يَقَع في لوم و فَخ إبْلِيس.

⁸ و زي دا كَمان، خَدّامين الكَنيسَه لازِم يَكونو رُجال مُحتَرمين، بِدون كِضِب في كَلامُم، ما بِكونو سَكرانين، ما طَمّاعين في قُروش وَسخانَه.

⁹ و هُم قاعِدين يَمسِكو سِر الإيمان بِضَمير نَضيف.

¹⁰ و لازِم يَجَرِّبوهُم في الأوَّل. و بَعَد دا، يَخَلّوهُم يَخدِمو إذا لِقوهُم بِدون لوم.

¹¹ و زي دا كَمان، خَلّي نَسوانُم يَكونو مُحتَرمات، ما بِشتِمو، يَمسِكو نُفوسُم، و أمينات في كُلّو حاجَه.

¹² خَدّام الكَنيسَه لازِم يَكون راجِل عِندو مَرَه واحدَه، و بِقدَر يَرَتِّب أولادو و بيتو كوَيس.

¹³ عَشان خَدّامين الكَنيسَه اليَخدِمو كوَيس، ياخدو لِنُفوسُم مَحَل طَيب و تأكيد كَتير في الإيمان في المَسيح يَسُوع.

¹⁴ أنا بَكتِب ليك الحاجات دي، و لَو عِندي رَجاء بَجي ليك بَعَد شوَيَه.

¹⁵ لَكِن إذا إتأخَّرتَ، إنتَ بِتَعرِف كيف النّاس لازِم يَعِيشو بين أهل بيت الله، الهو كَنيسَة الله الحَي، عَمود و أساس الحَق.

¹⁶ و نَشهَد أن سِر الدّين بِتاعنا مُهِم: هو ظَهَر في الجِّسم، و إتبَرَّر في الرّوح، و المَلائكَه شافوهو، و بِشَّرو بيهو بين الأُمَم، و آمَنو بيهو في الدُّنيا، و رَفَعوهو في المَجد.