١ تَسَالُونِيكِي 5 - كِتاب العَهد الجَّديد مِن الكِتاب المُقَدَّس

¹ و لَكِن عَن الوَكِت و الفُصول، يا أخوان، إنتو ما مُحتاجين أن أكتِب ليكُم.

² عَشانكُم إنتو تَعرِفو بِالتّأكيد إنّو يوم الرَّب بِجي زي الحَرامي بِاللّيل.

³ لَمّا النّاس يَقولو: ”في سَلام و ما في خَطَر،“ في الوَكِت داك خَراب بِجيكُم عَلى غَفلَه زي الوَجَع الشَّديد لِلحامِل. و هُم ما بِقدَرو يَهرُبو.

⁴ لَكِن إنتو، يا أخوان، ما في الضُّلُمَّه، و اليوم داك ما بِجي عَليكُم زي الحَرامي.

⁵ فِشان كُلُّكُم أولاد النّور و أولاد النَّهار. نِحنا مُش مِن اللّيل ولّا الضُّلُمَّه.

⁶ عَلَشان كِدا، ما نَنوم زي التّانيين، لَكِن خَلّونا نحرِس و نَكون عاقِلين.

⁷ عَشان البِنومو، بِاللّيل بِنومو، و البِكونو سَكرانين، بِاللّيل بِكونو سَكرانين.

⁸ لَكِن عَشان نِحنا مِن النَّهار، خَلّونا نَكون عاقِلين، و نَلبَس دِرِع الإيمان و المَحَبَّه، و بَرنيطَة، الهي رَجاء الخَلاص.

⁹ عَشان الله ما إختارنا لِلغَضَب، لَكِن عَشان نَحَصِّل عَلى الخَلاص بِرَبَّنا يَسُوع المَسيح.

¹⁰ هو مات فِشانّا عَشان إذا نحرِس ولّا نَنوم، نَقدَر نَعيش مَعاهو.

¹¹ عَشان كِدا، عَزّو بَعضَكُم بَعض، و ساعِدو كُلّو واحِد التّاني، زي ما بِتَعمِلو كَمان.

التَّعليم الأخير

¹² لَكِن نَطلُب ليكُم، يا أخوان، أن تَعرِفو اليَتعَبو بينكُم، و يَقودوكُم في الرَّب، و يَحَزِّروكُم.

¹³ و نَسألكُم أن تَحتَرِموهم كَتير خَلاص في المَحَبَّه عَلَشان عَمَلُم. عيشو بِالسَّلام بَعضَكُم بَعض.

¹⁴ و نَطلُب ليكُم، يا أخوان، حَزِّرو النّاس الكَسلانين، و شَدِّدو الخايفين، ساعِدو الضَّعيفين، و أصبُرو عَلى الكُل.

¹⁵ شوفو عَشان واحِد ما يَرَجِّع لِلتاني الشَّر بِالشَّر. لَكِن كُلّو وَكِت أتبَعو الخير بَعضَكُم مَعَ بَعض و مَعَ الكُل.

¹⁶ أفرَحو كُلّو وَكِت.

¹⁷ صَلّو و ما تَقيفو.

¹⁸ أشكُرو في كُلّو شي، عَلَشان دي إرادَة الله فِشانكُم في المَسيح يَسُوع.

¹⁹ ما تَوَقِّفو عَمَل الرّوح.

²⁰ ما تَقولو النُّبوات ما مُهِمَّه.

²¹ إمتَحِنو كُلّو حاجَه. و أمسِكو بِالكوَيس.

²² كونو بَعيدين مِن كُلّو نوع الشَّر.

²³ و إلَه السَّلام نَفسو يَقَدِّسكُم بِالتَّمام، و يَحفَظ روحكُم و نَفسَكُم و جِسِمكُم كَامِلَه و بِدون لوم لَمّا رَبَّنا يَسُوع المَسيح بِجي.

²⁴ البِناديكُم، هو أمين، و هو بيَعمِل دا كَمان.

²⁵ يا أخوان، صَلّو عَشانّا.

²⁶ سَلِّمو عَلى كُل الأخوان بِسَلام مُقَدَّسَه.

²⁷ آمُركُم بِالرَّب يَسُوع المَسيح أن تَقرو الجَّواب دا لِكُل الأخوان.

²⁸ نِعمَة رَبَّنا يَسُوع المَسيح مَعاكُم. آمين.